duterte naghunahuna kon moresayn na ba lang o mosige pa

DILI pa lang dugay sa pagsulat niini gipapha ni Presidente Rodrigo Duterte ang usa ka opisyal sa Philippine Military Academy (PMA) tungod kay nahilambigit kini sa corruption.

Si Duterte mismo ang mipirma sa dismissal order ni PMA Comptroller Maj. Hector Maraña gumikan sa malversation sa P15M sa PMA cadets’ fund.

“I want this dismissed PMA comptroller be sent to hell,” matod ni Duterte atol sa paglusad sa Pilipinas Angat sa Lahat program sa Malacañang.

Una niini, daan nang gikataho nga adunay 20 ka opisyal sa AFP Medical Center lakip na sila si Brig. Gen. Edwin Leo Torrelavega ug Col. Antonio Punzalan nga gipanaktak gumikan kay nadiskobrehan nga nahilambigit sa ghost delivery nga P1.4 milyones ug uban pang mga anomaliya.

Si Presidente Duterte mimando nga ipailawom sa court martial ang maong mga opisyal sa kasundalohan.

Dili pa lang sab dugay nga nakaingon si Duterte nga nakahunahuna siyang moluwat na lang sa iyang katungdanan tungod kay gikapoy na kaayo siya sa paglutos sa mga korap sa gobyerno ug sa iyang kampanya batok sa ginadiling droga.

Daan na niya kining gisulti atol sa command conference sa AFP-PNP sa Malacañang nga gitimbang-timbang na niya kon moresayn na ba lang kaha siya kon makakita og maayong ihulip kaniya pagka presidente sa nasod.

“I’m tired and I don’t think I can fulfill the promise of ending these problems,” seryoso si Digong.

Apan miklaro siya nga dili siya gusto nga si Vice Pres. Leni Robredo ang mobanos kaniya bisan pa man tuod og maoy nahilatid sa Konstitusyon nga kon mawala o mobiya ang presidente, ang bise presidente maoy mohulip sa puwesto.

“I have nothing against VP Robredo. But I do not think she will improve anything here,” panapos ni Duterte.—