ANG MILAGROSANG BIRHEN
SA LINDOGON
(IKA-2 SA LIMA KA BAHIN) Ang Prediksiyon Nga Nagnuod
MITIDLOM kanako ang gibug-aton sa gipahayag ni Frater Martin sa unsay naglimin sa Lindogon Hill sa iyang kinatibuk-an kanhi sa awaaw nga mga tagaytay sa balangay sa Simala. Sa pag-aninaw nako sa kalikopan, tungod sa naghiyak-hiyak nga mga bungtod, nagsulti lamang si Frater sa lunsayng matuod. Ug niini, igo lang ko nga nakayango- yango. Apan unsay linugdangan ngano nga ang Lindogon nga kanhi daw giislagan sa guna sa mga mag-uuma ug wala gyoy nangahas paggahin og oras sa pagbunglay nga sukwahi sa mga gipamulong sa talahorong monghe, ang reyalidad sa maong lugar nagpahun-ag man og masaarong ugma sa pagka karon?
Apan adunay usa ka karaang tawo nga nangagpas. Siya mao si Ireneo Villamayor nga niya pa, “Moabot ang adlaw nga kining Lindogon mabulahan pag-ayo. Bulahan siya tungod sa hugot nga pagtuo ug sa kasagrado
sa langitnong panalangin. Adunay moabot nganhi nga usa ka babayeng puti nga magsul-ob usab og sapot sa anis-is nga kaputi. Moabot siya nga way hisgot kon kanus-a.” Tungod sa maong prediksiyon ni Ireneo niadtong tungora, hisaypan na lang hinuon siya nga nakigsulti og usa ka engkantada.
Apan nagnuod ang panagna ni Ireneo Villamayor. Nahiabot ang mga monghe sa Lindogon uban sa Mahal nga Birhen. Gipatin-aw ni Frater Martin ang lintunganay sa presensiya sa imahen ning maong dapit. Ang punoan sa gamot sa asoy sumala pa ni Frater Martin, nagsugod dihang usa ka adlaw niana adunay miabot nga usa ka babayeng wala magpaila, apan igo lamang miingon, “Daghan kog koleksiyon nga mga imahen nga mga matahon kaayo. Lahi kini siya kaysa uban, busa inyoha na kini.”
Ug ang Lindogon karon uban sa Mahal nga Birhen, halayo na kaayo sa kanhing kagahapon. May mga tanom nang nanginabuhi ug minglipang. Ang mga monghe nga maoy nagpaduas sa init ug ulan maoy nagkulit og mga kalainan. May tubig na nga masanggab. Ug ang kalugotan ug kabungtoran daw usa na ka paraiso nga sa mga mata makabusog. Kon atua ka na sa monasteryo, mahalid-ik usab ang babation sa mga deboto nga nagsagukom sa pagtuo sa espirituhanong diwa. Mao usab kini ang among nasinati.
Ang unang pagsuyla sa kahibulongang hitabo o sa milagro nga gipabatyag usa ka adlaw niana, usa sa mga monghe nga nanagkot og mga kandela, may nasingo nga alimyon, sa kahumot nga daw makagiyon. Napahangad siya sa imahen sa Mahal nga Birhen. Ug sa kadako sa iyang kahingangha, nakita niya ang pagdagayday sa mga luha niini. Nagduda nga gimata-mata, mikipat-kipat siyag maayo aron pagsuta sa katinuod. Gibati niya nga mora siyag gidalipaso. Nahapaso-paso siya nga wala mahinultol kon unsay angayng buhaton. Ang dali lamang niya nga natuaw mao: “Naghilak ang Mahal nga Birhen! Naghilak ang Mahal nga Birhen!” Ug bisan siya, sa iyang kaugalingon, gituhop ug giganoy sa talagsaong pagbati ngadto sa kahipno sa iyang pagtuo. Nagasinggit siya nga nagpanawag samtang way puas usab ang iyang paghilak.
Ang mga monghe isigduol sa kaubang alagad sa pagbudlay. Apan igo lamang silang nagtinutokay sa usag usa. Tanan sila
Ang unang pagsuyla sa kahibulongang hitabo o sa milagro nga gipabatyag usa ka adlaw niana, usa sa mga monghe nga nanagkot og mga kandela, may nasingo nga alimyon, sa kahumot nga daw makagiyon.
nahiugbok. Unya gikabig ang ilang mga pa’d sa paghikap sa aping sa Birhen, ug nasuta nila nga mainit-init kini sa kaalindanga. Ug giganoy sila sa kamatuhopon sa sitwasyon. Wala nila kapugngi ang ilang mga luha. Apan nakaalimatmat si Frater Martin sa unsay angayng buhaton. Gibaoran niya ang kauban niyang mga monghe nga kinahanglan wala usay masayod labi na sa taga gawas sa maong pagpabatyag sa Mahal nga Birhen.
May mga katarongan siyang gihanip. Kon dunay laing masayod ning maong pagpabatyag sa birhen, bayag modagsang lang unya hinuon ang taga media ug mangatarantar sila. Malagmit silang imbestigahon. Alig-igon sa mga pagsukit-sukit. Busa nagkasabot sila nga tak-omon lang nila ang ilang mga ngabil. Apan walay natago ngadto sa mga tawo sanglit aduna na may pipila nga nakasaksi sa paghilak sa Mahal nga Birhen. Ug nanakod ang kasayoran. Daghan na hinuon ang mingdugok
tungod sa kakuryoso nga masayod.
Kay wala mahinultol sa unsay mga lakang nga takos himoon, namorag bata nga nakighinabi si Frater Martin Mary ngadto sa imahen sa Mahal nga Birhen. Niya pa:
“Mama Mary, kon buot ikaw nga mamatud-an ang imong pagpabatyag, intawon adto na lang sa Basilika sa Sto. Niño o kayha sa simbahan sa Sto. Rosario, ug uban pang dagkong mga simbahan.” Sa tinud-anay, nabalaka gayod si Frater Martin sa kisaw unya sa media ug tingalig mao lamang unya hinuoy makaaghat sa kadagkoan sa simbahan nga sila imbestigahon. Nahinumdom man god siya sa Carmelites sa Lipa mahitungod niadtong nabaniog bahin sa gipabatyag nga mga rosas. Giimbestigar ang kadagkoan sa Carmelites nga gitubayan pa gayod sa Roma diin mipadala pa gani kinig tinugyanan aron lang gayod sa pagsuta sa maong pagpabatyag. Ang komunidad sa Carmelites nauyog ug naukay pag-ayo ug nga, daghan pa gani ang nahimalingka pabor sa milagro. Gani, may mga madre nga mingbiya na lang hinuon sa kombento. “Ug posible nga ang nahitabo sa Carmelite mahitabo usab kanamo nga mga monghe sa Lindogon. Ug malagmit pa usab hinuon nga mabungkag ang among grupo,” maoy nag-ukun-ukong pamahayag ni Frater Martin.
Ug dinhi nagsugod pagdayo ang mga masakiton ug nga, sa birtud sa hipno nga pagtuo, nangaayo sila sa ilang mga sakit. Ang gahom sa pagsalig ug pagtuo maoy nanigbabaw sa kasingkasing sa mga deboto. Namituon ang paglaom sa mga masakiton sanglit ang pagtuo gabay man sa kaluwasan. Agig pruyba niini, atua didto gitapok ang mga ginamit niadtong nakalakaw na sama sa kratses, wheel chair, walker ug daghan pang pagmatuod nga ang mga petisyon nga gipadangat ngadto sa Mahal nga Birhen natubag na.
(PADAYONON)