Mata Sa Hustisya
(Sumapay sa panid 27)
(Gula 17)
MITUPAD paglingkod si Monsour Morales kang Malou Sayson. Gipasandig niya ang ulo sa babaye sa iyang dughan, gihapuhap ang buhok. Nakadesisyon ang detektib nga tug-anan ang hinigugma sa tinuod. “Si Donna Lopez, Malou.” “Siya ra man laging usa, sumala sa balita. Wa diay mokuyog niya si Dave Ligan?”
Mitarong paglingkod si Malou ug gitutokan si Monsour. Dihay nakitang pagduhaduha sa detektib sa mga mata ni Malou.
“Wa. Seloso si Dave, maoy sulti ni Donna. Tuyo siyang makigkita nako nga mao rang usa kay duna siyay gustong itugan nako.”
Gisaysay ni Monsour ang tanan. Misandig pag-usab si Malou sa dughan ni Monsour.
“Aw, makatabang man kaha ang impormasyon nga iyang giingon sa pagsulbad nimo sa naglimin nga misteryo sa kamatayon ni Angelo Lopez?”
“Dunay ikatabang, Malou. Kon tinuod nga gibaharan ni Angelo Lopez si Jeffrey Sandoval, dunay posibilidad nga giunhan ni Jeffrey si Angelo?”
“So, ipokus mo na ron ang tingob nga pagtuo nga si Jeffrey gyod ang nagpatay o kaha nagpapatay kang Angelo Lopez? How about sa laing suspek nga si Donna Lopez?”
Naghunahuna si Monsour Morales. Wa dayon siya motubag.
Gihukngay niya pag-ayo ang tubag sa pangutana ni Malou.
“Don’t forget, Mon, nga si Donna ang nagluwas nimo. Sa maong sitwasyon, utang mo niya ang imong kinabuhi.”
“Tinuod kana, Malou. Kon wa pa siya, maapil ko sa pagkapaig sa akong awto human sa pagbuto ani. Bahin sa imong giingon nga itingob ko ang akong atensiyon kang Jeffrey Sandoval, di sab na mahimo. Bisag utang ko kang Donna ang akong kinabuhi, nagpabilin siyang suspek sa pagkamatay ni Angelo Lopez.” Miyango-yango si Malou. “Duna say posibilidad, Mon, nga nagsuhol si Donna og tawo sa pagbutang og bomba sa imong awto. Ug kunohay giluwas niya ang imong kinabuhi aron duna ka nay utang kabubut-on niya ug sa ingon, magpanuko ka na sa pagpaniid kaniya ug di mo na siya iapil sa mga tawo nga supetsado sa pagpatay kang Angelo Lopez…”
“Gihunahuna ko sab nang imong giingon, Malou. Misamot kakomplikado karon ang pagsulbad nako sa tanghaga sa kamatayon ni Angelo Lopez.” Migakos si Malou sa detektib. “Sa pagka karon, Sweetheart, ang importante nga luwas ka sa kamatayon.”
“Bitaw, Darling. Mao gyod nay labing mahinungdanon. Mawad-an ka unyag guwapong boyfriend.” Gipislit ni Malou ang ilong ni Monsour. “Hambog. Uhm!” Unya nahilom na sab ang duha. Ang awto na ni Malou ang gigamit ni Monsour Morales sa iyang mga lakaw. Mao sab kini ang gusto ni Malou aron sayon na lang sa detektib ang pag-adto-nganhi sa dapit nga iyang gustong adtoan.
Usa ka hapon nga gikan si Monsour sa pagpakigkita kang SPO1 Homer Calderon, ug samtang nagmaneho siya sa kotse, nakahunahuna siya sa pag-adto sa sementeryo nga gilubngan ni Angelo Lopez. Magpaniid sab siya didto. Bisan asang dapit nga gituhoan niya nga makatabang kaniya sa kaso nga iyang gihupatan, iyang adtoon.
Gikan sa karsada, malantaw ang nitso ni Angelo Lopez. Human ikaparada sa detektib ang kotse sa daplin, mikanaog siya. Apan wa dayon siya makapadayon kay iyang nalantawan nga sa atubangan sa nitso nga gilubngan ni Angelo Lopez, adunay nagtindog nga babaye ug nag-atubang sa nitso. Apan di niya maklaro ang nawong niini kay nagpurong man kini og dako ug lapad nga malong nga puwa ang mga buwak-buwak nga gidisenyo. Nadiyong ang mga mata ni Monsour.
Nagdaling mipadayon ang detektib aron pagsusi kon kinsa ang maong babaye apan lagsik kining mibiya. Mora bag nakamatikod sa pag-abot sa detektib. Mao na lay nakita ni Monsour ang babaye nga nagdaling misakay sa naghuwat nga taksi.
Mitan-aw si Monsour sa atubangan sa nitso ni Angelo Lopez. Wa siyay nakitang mga kandela nga nagbarog ug dinagkotan. Kon mao, wa managkot ang babaye sa lubong ni Angelo Lopez? Unsa man kahay tuyo sa babaye sa pagduaw sa lubong ni Angelo Lopez?
Nakapangagho ang detektib. Sa kadugay na niya sa iyang trabaho, karon pa siya makasugat og usa ka kaso sa pagpatay nga naglisod siya pagsulbad.
Unya, mitingog ang selpon ni Monsour. Sa pagsusi pa niya, si Divina Lopez Singson ang nagtawag. Dako ang iyang pagtuo nga magpaloap na sab kini sa kaso sa pagpatay sa iyang igsoon.
“Sa pagka karon, Div, wa pa koy ikahatag kanimong tawo nga maoy angay paninglan sa pagpatay kang Angelo Lopez. Very complicated ang kaso tungod sa gidudahang mga suspetsado.”
“Nakasabot ko, Mon. Ang importante nako nga naglihok ka bahin sa gisangon ko nimo.”
Kinsa kining babaye nga mibisita sa lubnganan ni Angelo Lopez? Unsay kalambigitan niini sa kaso nga gisulbad ni Monsour Morales?
“Salamat, Div, nga hisabtan ko nimo. Pero ipasalig ko nimo nga di gyod nako hunongan ang pagsulbad sa tanghaga sa kamatayon sa imong igsoon mentras buhi pa ko.”
“Salamat, Mon. Dako ang pagsalig ko nimo nga katagaan nimog hustisya ang pagpatay sa akong igsoon. Tuod, lain kong tuyo mao ang pagbuto sa imong awto. Maayo gani kay wa ka maapil. Nakahibawo ko ani sa balita. Pasensiya ka na nga karon pa ko makatawag nimo. Pila na ka adlaw man god kining nahitabo.” “Way sapayan, Div.” “Pag-amping kanunay, Mon. Ang mga suspek sa akong pagtuo, nakahibawo na nga ikaw ang akong gisuholan sa pagsulbad sa misteryo sa kamatayon ni Angelo. At this point, siya o sila nakaila nimo, samtang ikaw wa makaila sa kriminal.”
“Salamat sa pahimangno, Div. Anad na ko aning trabahoa. Pero para nako, kon oras ko na, oras ko na gyod.” Mikatawag hinay ang detektib.
Samtang nagmaneho si Monsour Morales sa kotse, gitawgan niya si Inspektor Homer Calderon. Iya kining gitug-anan sa iyang nadiskobrehan sa sementeryo.
“Kinsa kaha tong bayhana, Mon? Pero nakaseguro ko nga di siya gustong mailhan kay nagpurong man kahag malong.”
“Mao lagi, Homer. Di kalikayan nga magduda ko sa babaye. Wa man siya managkot sa lubong ni Angelo Lopez. Wa ganiy buwak nga gihalad sa nitso.”
“Segurado kong ang pagduaw sa babaye sa lubong ni Angelo Lopez importante kaniya, Mon. Basig duna siyay gipasalamatan kang Angelo o kaha duna siyay gisudya kang Angelo. Kon kinsa man ang maong babaye, Mon, usa ra ang akong pagtuo. Dunay utang kabubut-on ang babaye kang Angelo, o kaha dunay nabuhat nga sala si Angelo sa babaye, nga bisag patay na si Angelo gikasilagan gihapon kini sa babaye ug gibalik-balik niya ang maong pagdumot pinaagi sa pagsudya kang Angelo diha sa iyang lubong.”
Naamang ang detektib. Tanghaga kaniya ang maong babaye. Alang kaniya, nahidugang ang babaye sa iyang mga suspek sa pagpatay kang Angelo Lopez.
(PADAYONON)