KIDLAT TAHIMIK

Midaog sa Prince Claus Award

Bisaya - - Showbiztsika - Ni ELY T. ACAMPADO

ANG iyang mga obra maestra maoy nagpainila niining tawhana. Pipila ka adlaw sa wala pa moabot ang Bagyong Ompong, ang indie filmmaker dupot nga nagtrabaho sa editing room sa Baguio, aron paglimpiyo sa iyang bag-ong obra maestra nga “Lakaran ni Kabunyan”, usa ka bahin sa trilogy nga “Lakbayan” nga gitrabaho usab sa sikat nga mga direktor nga sila si Lav Diaz ug Brillante Mendoza.

Ang “Lakbayan” nga giandam nga ipagawas sa premiere sa Busan International Film Festival sa Oktubre, naghulagway sa usa ka laing odesiya, nga kasagarang tema sa mga obra ni Kidlat Tahimik. Ang maong pelikula, nagpakita sa mga biyahe sa iyang anak nga

si Kabunyan de Guia, gikan sa Luzon ngadto sa Mindanao.

Human sa Busan, molupad usab paingon sa Amsterdam, the Netherlands si Kidlat aron dawaton ang bag-o niyang pasidungog, ang Prince Claus Award sa Disyembre. Gihubit ni Kidlat nga ang maong kadungganan usa lang ka maanindot nga pikpik sa iyang likod.

Ang Prince Claus Award nailhan nga ginahatag ngadto sa mga tawo o grupo sa Aprika, Asya, Latin Amerika ug Caribbean nga nakatabang og dako sa kulturanhong kalamboan. Sama ni Kidlat, nakadawat usab sa maong pasidungog si Lav Diaz niadtong 2014.

“I believe I got this prize for my work as a cultural warrior,” miingon si Kidlat, kinsa giila sa iyang mga kontribusyon sa pelikula ug visual arts.

Ang mga kauban ni Kidlat nga pasidunggan naggikan sa nagkadaiyang mga nasod sama sa Uganda, Syria, Indonesia ug Brazil, nga nailhan sa ilang mga gipamuhat sa pag-ugmad sa teyatro, arkitektura, literatura ug peryodismo.

Matod ni Kidlat, sa minglabayng duha ka dekada nakigaway siya aron mapugngan ang padayong pagbanlas sa atong kulturanhong kabilin, nga gikankan sa dagkong balod sa kolonyalismo ug globalisasyon.

Giila nga Godfather of the Filipino New Wave, si Kidlat gitawag sa pamunoan sa Prince Claus nga usa ka masiboton nga tigpanalipod sa lumadnong kultura. Ang iyang mga obra maestra nga nahilahi sa naandan nga makita diha sa pelikula, potograpiya, paghablon, free- style architecture ug carved installations, usa ka disiplinadong arte aron pagpukaw sa kalikopanong kahiamgo. Ang tawo gidayeg usab sa iyang pagpanudlo sa mga batan-ong malalangon ug pagpasiugda og makinaugalingnon nga paglalang sa mga workshop.

Hinuon, ang yano ug kulturanhon nga tawo dili motambag sa iyang mga tinun-an nga mosunod sa iyang mga tunob ug mahimong laing Kidlat. Apan dili usab siya magmahay kon dunay batan-on nga mosulod sa industriya sa pamelikula ug mag-usab sa sistema gikan sa sulod. Kay hugot niyang gituohan nga ang usa ka tawo angay nga mosunod sa iyang kaugalingong dalan ug pangitaon ang iyang kaugalingong duwende.—

Newspapers in Cebuano

Newspapers from Philippines

© PressReader. All rights reserved.