TRILLANES POSIBLENG ISYUHAN SAB OG WARRANT OF ARREST SA LAING BRANCH

Nagpapanumpa kang Trillanes nagpakita og affidavit

Bisaya - - Tn Balita -

SA wala pa makapiyansa si Senador Antonio Trillanes IV sa Makati RTC Branch 150, mingsumiter ang iyang mga abogado og affidavit ni Col. Josefa Berbigal, ang opisyal nga nagpapanumpa kaniya niadtong miaplay siya og amnestiya. Ug sa usa ka press conference, iyang gipakita ang usa ka hulagway nga nanumpa siya kang Berbigal diin gipamatud-an ni Berbigal ang iyang apidabit sukwahi sa pasangil sa Department of Justice.

Matod ni Berbigal, ang usa sa ilang giprosesong amnestiya ang kang Sen. Trillanes kaniadtong Enero 2011.

Nabutang sad sa apidabit nga adunay “admission of guilt” sa habig ni Trillanes.

Ang apidabit gisumiter sa kampo ni Trillanes sa Makati Regional Trial Court Branches 150 ug 148. Unya gawas sa apidabit ni Berbigal, gisumiter pod ni Trillanes sa korte ang sertipikasyon sa iyang amnestiya nga nadawat kaniadtong tuig 2011.

Gusto sa Office of the Solicitor General (OSG) nga himoong paynal sa Korte Suprema ang pagbasura sa petisyon ni Trillanes nga mialkontra sa pagbalewala sa Malacañang sa iyang amnestiya.— TNB SA pagsulat niini maoy pagpagawas ni Makati Regional Trial Court (MRTC) Judge Elmo Alameda og warrant of arrest ug hold departure order batok kang Sen. Antonio Trillanes IV kalabot sa Proclamation 572 ni Presidente Rodrigo Duterte nga nagpabalewala sa amnesty nga gihatag sa miaging administrasyon ngadto sa senador kinsa giakusahan nga nahilambigit sa kasong rebelyon.

Kauban sa iyang abogado, miadto si Trillanes sa Makati RTC Branch 150 ug mibayad og piyansa nga P200,000.

Didto usab si Trillanes sa Makati City Police ug gipailawom sa documentary procedure o booking procedure sama sa fingerprinting ug picture taking.

Bisan og nakapiyansa, midesisyon gihapon si Trillanes nga adto lang gihapon siya moestar sa Senado. Ug miingon siya nga may posibilidad nga mopagawas sab og warrant of arrest ang Makati RTC Branch 148 nga nagtuki sab sa iyang kaso kalabot sa Oakwood Mutiny kaniadtong tuig 2003.

Nakadawat ang senador og report nga bisan unsang orasa mahimo siyang arestohon sa military labot sa Proclamation 572 ni Presidente Duterte.

Nakaingon siya nga napukan ang demokrasya niadtong adlaw nga giaresto na siya.

“Nanaig ang kadiliman at kasamaan sa ating bayan. Kung ano mang mangyayari sa hinaharap, nasa mga kamay na ng sambayanang Pilipino. Makikitang pinuwersa at binaluktot ang batas,” pahayag ni Trillanes atubangan sa mga tigbalita.

Samtang si Presidential Spokesman Harry Roque miingon nga mireak na ang korte bahin sa kaso ni Trillanes mao nga angayng hunongon na niya (Trillanes) ang iyang drama ug sa korte na lang siya mangatarongan.

Kahinumdoman nga sukad sa pagpagawas ni Duterte sa Proclamation 572, nahimo nang pinuy-anan ni Trillanes ang iyang opisina sa Senado aron dili siya maaresto sa AFP.—

Newspapers in Cebuano

Newspapers from Philippines

© PressReader. All rights reserved.