Ug Ang Takli Nahiuli
(pinupo sa Bibliya)
NGANONG ako?” sukot ni Noemi sa sakong sapot sa pagbangotan. Ang kasakit miigo.
Mga takli sa Moab nga taga Juda sila si Elimeleck ug Noemi ug duha ka anak nga lalaki. Si Elimeleck mitaliwan. Ug unya ang iyang mga anak mga sila si Mahalon ug Chelion. Ang batan-ong Orpha ug Ruth nga Moabnon mga balo sa iyang mga anak, hinuon buotan kaniya.
Apan mihukom siya sa pagpauli sa Juda. Iyang panghikit-an ang duot sa katawhan dala ang mga kareton, planggana, ug uban pa, nga nagbaklay inunhan ni Moses. Talan-awon nga iyang gipanaminan.
Ang Juda (diyos Yahweh) ug Moab (diyos Chemosh) nagkontra. Sila si Ruth ug Orpha dili niya makuyog. Lagmit pasipad-an didto.
Busa sila iyang gitambagan, “Lakaw na lang kamo sa inyong mga ginikanan. Itugot unta sa Diyos nga kamo makakaplag og mga bana o makalingkawas sa kalisdanan.”
Iyang gihagkan sila, ug mingtugbaw ang ilang tingog, mga mata sa mga luha gibiawan.
“Pamauli kamo mga anak ko, kay sud-onga ako tigulang na kaayo.” Sila si Orpha ug Ruth daghan pag kapuslanan. Ug si Orpha milakaw sigeng pahid sa luha. Apan si Ruth miingon: “Ayaw ako hangyoa sa pagbiya kanimo ug dili pagsunod kanimo, kay bisan asa ikaw moadto, ako moadto. Ug bisan asa ikaw mopuyo, adto ako mopuyo. Ang imong katawhan mamahimo nga akong katawhan, ug ang imong Diyos akong Diyos. Asa ikaw mamatay, adto ako magpakamatay, ug didto ako ilubong.” Wa na magdaghan pag sulti si Noemi. Ug sila nanghipos. Giukab ni Noemi ang karaang kaban. Sab-ay sa abaga ang mga putos, gibaktas nila ang batoong dalan. Kon mabarag si Noemi, gakson ni Ruth. Sa gabii, matulog sila ilawom sa kahoy o bato. Manghimasa sa sapa, sandal nagkaabog. Sa nagkaduol na sila, nawala ang nabara nga sukna sa kaisipan ni Noemi. Sa tumoy sa 50 ka milyang dalan tapos sa 10 ka adlaw, nahiabot sila sa Bethlehem, Juda.
Minghunong sa ilang paghabol ug pagtina sa lana ang kanhi mga silingan. Sila ming-ingon: “Si Noemi!”
“Ayaw ninyo ako tawgag Noemi, tawga ako og Mara; kay ang
Makagagahom nagpaantos kanako sa hilabihang kapaitan,” miingon si Noemi.
Ang Marah mapait nga tubig natilawan nilang Moses sa silot 40 ka tuig paglaroy-laroy sa desiyerto tungod sa ilang pagbiya kang Yahweh.
Wa molabay ang daghang adlaw. Sa ilang balay naniid si Ruth unsay mabuhat. Ug nananghid kang Noemi, “Paadtoa ako sa darohan, ug manghagdaw ako og mga uhay sa trigo.” “Lakaw, anak ko.” Ug si Ruth nanghagdaw sa mga umahan nga agi sa mga mangangani. Nahaadto siya sa umahan ni Booz nga adunahang paryente ni Elimeleck, ang bana ni Noemi.
Milantaw si Booz, nga nagbiste og sedang puti, sa iyang umahan ug misukot kon kinsay midugang og mamumuo. “Kinsa kanang babayhana?”
“Kana ang uban ni Noemi gikan sa Moab,” ang pangulo sa mangangani nangatarongan. “Siya nagpakiluoy, ‘Ako nagahangyo kaninyo, pahagdawa ako, ug manghipos ako sa mga binangan.’ Busa akong gitugotan siya ug nanghagdaw sukad pa kaganiha.”
Bugnaw nga miduol si Booz kang Ruth ug miingon: “Ayaw pagpanghagdaw sa laing uma, apan tipon sa kadalagahan ko. Sunod kanila. Ako nagtugon nga dili ka hilabtan. Kon ikaw uhawon, lakaw ngadto sa mga tadyaw, ug uminom ka.”
Miyukbo si Ruth ug miduko, ug miingon: “Nganong mitagad ka, Ginoo, sa langyaw?”
Tubag ni Booz: “Nasayran ko ang imong pagsilbi sa imong ugangan nga babaye sukad sa pagkamatay sa imong bana; ug gibiyaan mo ang imong mga ginikanan ug ang imong yutang natawhan imbes mobalik kanila ug mianhi ka sa katawhan nga wala nimo hiilhi hangtod karon. Ang Diyos magatumbas sa imong buhat.” “Salamat kaayo sa imong kaluoy, Ginoo.” Ug sa pagpangaon, si Booz mikamay kaniya, “Umari ka diri, ug kaon sa tinapay, ug ituslob ang imong tinipak sa suka.”
Ug si Ruth nga matahaon, milingkod sagol sa mga trabahador; ug sila nanghatag og mga sinanglag nga liso, ug siya mikaon, ug nabusog, ug mitindog ug nagtaan-taan pa sa pagpanghagdaw.
Si Booz nagsugo: “Pasagdi siya bisan sa taliwala sa mga binangan, ug ayaw siya pagpakaulawi. Ug bugnota usab ninyo pagtuyo alang kaniya ang pila ka buok gikan sa mga binangan, ug biyai.” Ug si Ruth nanghagdaw og uhay ug iyang gigiok. Ug iyang gisapnay ug si Noemi mapasalamaton sa abiyo. Ug sa sunod pang mga adlaw, nanghagdaw si Ruth. Si Ruth kanunay tudloan ni Noemi sa pamatasan.
SA pakli sa mga higayon, si Booz mihatag og mohar kun bugay kang Noemi ug mipahiluna kaniya sa maayong kahimtang ug tapos sa nissuin o kasal nilang Booz ug Ruth mao ang malipayong prosesyon sa kinasal ngadto sa balay ni Booz. Ug si Ruth nanganak kang Obed. Ug paglabay sa katuigan, gikan sa ilang henerasyon natawo ang moluwas sa kalibotan pinaagi sa gugma ug kaluoy.
(KATAPOSAN)
Ang kaluoy migakos kang Booz. Ug si Ruth nanghagdaw sa tinuyong mga biya sa umahan…