Bisaya

Mata Sa Hustisya

- Nobela ni Oliver P. Flores

WA dayon makatulog si Detektib Monsour Morales. Nagkalawom na ang gabii apan nagpitok-pitok pa ang iyang mga mata samtang nagtutok sa kisame sa iyang kuwarto. Si Donna Lopez ang diha sa iyang hunahuna. Sa gipakita sa babaye kaniya samtang didto sila sulod sa lawak sa motel, mora bag importante kaayo siya sa kinabuhi niini.

Sa laktod, nahigugma si Donna Lopez kaniya. Dili kini angay nga mahitabo. Alang sa detektib, kon magminyo na sila si Malou di siya gustong dunay laing babaye nga magsamok-samok sa ilang kaminyoon.

Nakatan-aw si Monsour kang Malou nga diha sa iyang tupad. Nahinanok kini. Naluya gyod kini sa ilang panagduwa sa kama. Wa kini magsukit-sukit kaniya bahin sa iyang mga lakaw karong adlawa. Tingali nagtuo kini nga kauban niya si Donna Lopez apan

naglikay kini sa pagpanguta­na kaniya kay di gustong masakitan. Bisag duna kiniy pag-uyon nga makigsuod gyod siya pag-ayo kang Donna, apan nasayod siya nga sakit kaayo kini alang kang Malou.

Mihinay siya pagbangon. Mitikubo siya ug gihagkan sa aping ang hinigugma. Mitindog siya. Nagkuha siya og usa ka stick nga Marlboro. Nagpabuhot siya sa aso human niya dagkoti ang sigarilyo samtang misil-ip usab siya sa bukas nga jalousie.

Usa ka Navara ang nagparada atbang sa apartment nga iyang gipuy-an. Ug kalit lang kining gipadagan pahilayo. Nakamatiko­d tingali ang nagdala sa maong kotse nga diha siya sa bukas nga jalousie. Mikunot ang agtang sa detektib. Di siya mahimong masayop. Navara kadto ni Donna Lopez! Kalit nga nangumo si Monsour Morales. Gipanid-an siya ni Donna? Nagkadako na gyod ang iyang pagtuo nga kini ang utok sa pagkamatay ni Angelo Lopez.

Mikanaog si Monsour sa ground floor human lingia si Malou nga naghagok. Gitawgan niya si Donna Lopez. Dali ra kining mitubag. Gipugngan ni Monsour ang iyang kalagot.

“Gipanid-an ba ko nimo, Donna?” Gihinay sa detektib ang iyang tingog. Di siya gusto nga makadungog si Malou ug maoy mahimong hinungdan nga makamata kini ug matugaw ang maayong pagkatulog.

“Relaks lang, Mon. Be calm. Oo, ako ang nagsakay sa Navara. Wa tika panid-i. Gusto lang unta kong magkaestor­ya ta sa sulod sa imong apartment. Pero nakita nako si Malou nga mikanaog sa taksi ug misulod diha sa apartment. You know, Mon, karon nga naangkon mo na ang akong lawas, misamot kadako ang pagmahal ko nimo.”

“Nakahibawo ka na, Donna, nga si Malou ra ang babaye nga akong gimahal. Di ko gusto nga masamok ang among relasyon.”

“Wa koy plano nga samokon mo, Mon. Sa gikaingon ko na, kontento na ko nga gahinan mo og gamayng panahon. Malipay na ko ana.”

Nahilom si Monsour. Morag nahasuong siya sa malisod nga sitwasyon. Naghunahun­a siya pag-ayo. Makalingka­was siya sa pagpakigre­lasyon kang Donna kon iya kining madakop; kon aduna na siyay lig-ong ebidensiya batok niini. “Goodnight, Mon.” Wa na tubaga ni Monsour si Donna. Iyang gipalong ang iyang selpon. Nakadesisy­on siya nga tug-anan si Malou sa nahitabo kanila ni Donna Lopez. Wa siya magdahom nga moanhi sa apartment si Malou kay mao may sulti niini kaniya nga ugma sa

Gialironga­n si Monsour Morales sa lainlaing dagway sa tentasyon. Makasungas­ong kaha siya niini?

gabii pa siya matulog dinhi sa apartment. Tingali, gimingaw kaayo kini kaniya maong gisorpresa siya. Nagkinahan­glan siyag tambag gikan sa iyang hinigugma.

Samtang namahaw sila nianang pagkabunta­g, nangitag higayon si Monsour Morales nga kasultihan si Malou bahin kanila ni Donna Lopez.

“Tuod diay, Darling, wa pa ko nimo kasultihi sa inyong mga lakaw ni Donna Lopez gahapon. Sure ko nga nagkauban mo.”

Nalipay sa hilom si Monsour kay makahigayo­n na siya sa pagtug-an sa tanan ngadto kang Malou. Miinom una ang detektib og tubig ug unya miagahad. Miginhawa siyag lawom. Gilig-on ang kaugalingo­n.

“You know, Sweetheart, nagkauban gyod mi si Donna Lopez gahapon.” Unya gisaysay sa detektib ang tanan ngadto kang Malou. Wa dayon makatingog ang babaye nga mitutok pag-ayo sa detektib.

“Nagkasabot na ta daan, Malou, nga makigsuod gyod ko pagayo kang Donna Lopez.”

Mitando ang babaye. Miinom siya og tubig. Miginhawa siyag lawom. “Nasuko ka nako, Sweetheart?” “No. Wa ko masuko nimo, Darling. Dako ang pagsalig ko nimo. Pero last na ni, ha?”

Nahadiyong ang mga mata ni Monsour Morales nga nakatanaw pag-ayo sa hinigugma. “Last? Wa ko makasabot, Sweetheart.” “Oo. Last na ning pagpakigre­lasyon mo sa babaye nga imong nag-unang suspetsado sa kaso nga imong pagakuptan. Di na ko mosugot nga duna pay laing babaye nga imong ikadulog. Kon masulbad na nimo ning kaso sa pagpatay kang Angelo Lopez, kinahangla­ng pakaslan na gyod ko nimo!”

Nagnganga ang baba ni Monsour Morales apan way bisan usa ka pulong nga migawas. Igo na lang niyang gisundan sa pagtan-aw si Malou nga nagdaling mibiya kaniya. Sa unang higayon, nakita sa detektib nga nangabubho ang hinigugma. Na- insecure ba kini sa katahom ni Donna Lopez? hilom nga nakaingon si Monsour.

Gipasagdan ni Monsour si Malou nga way tingog-tingog kaniya. Ang iyang gihimo mao ra ang pagbalik-balik sa iyang panumpa ngadto niini.

“Ikaw ra ang akong gimahal, Sweetheart. Bugtong babaye ka sa akong kasingkasi­ng.”

Mikidhat ang detektib sa hinigugma. Mikatawa si Malou. Nawala ang iyang pagkusmod. Iyang gilayog si Monsour. Diha sila sa kuwarto niadtong tungora. Kusog nga miigot ang kama tungod kay nagkaligir­ay sila sa ibabaw niini. Unya nahilom sila. Misulod si Malou sa iyang trabaho. Nagpabilin si Monsour sa apartment. Mikiring ang doorbell sa pultahan sa apartment. Nangandam si Monsour. Hugot niyang gihakgom sa tuong kamot ang pul-an sa iyang sa kalibre .45.

Kalit niyang giablihan ang pultahan. Ingon siya niini, usa kini niya ka paagi nga kon daotan mang tawo ang iyang bisita, makalitan kini ug matarantar.

Apan si Monsour Morales ang nakalitan sa iyang nakita. Usa ka matahom ug mapahiyomo­ng babaye ang nagtindog sa iyang atubangan. “C-Cassandra, ikaw man diay?” “Oo, Mr. Morales. Gisugo ko ni Ate Divina sa pagpaanhi nimo. Adto ka papaniudto­ha sa ila. Birthday niya karon.”

“Kasagaran god motawag man siya nako sa selpon, Cassandra.”

Wa tuyoa nga hilom nga nakapanlad-ok sa laway si Monsour Morales samtang nagsud-ong kang Cassandra Galvez. Bisag gamayon kining pagka babaye apan milutaw gyod ang katahom ug kanindot sa lawas niini tungod sa gisul-ob nga fit nga miniskirt. Miamag sa kaputi ang lingin nga mga paa sa babaye.

“Sus, gitagaan gyod ko niyag adres nimo, Mr. Morales, aron matultolan tika. Gusto ni Ate Divina nga makasuroy sab ko. Sukad god nga nagpuyo na ko sa balay sa ilang luyo, ug patay na si Angelo, wa na man koy ganang mogawas-gawas. Di na lang ko magdugay, Mr. Morales. Mopauli na ko. Unsa man, adto ka maniudto sa ilang balay ni Ate Divina?”

“Oo, Cassandra. Kuan diay, Monsour na lang ang itawag nako. Ayaw na pag- mister.”

Mitando si Cassandra Galvez. Sa wa pa kini mobiya, nagbilin kini og pahiyom sa detektib.

(PADAYONON)

 ??  ?? “Tuod diay, Darling, wa pa ko nimo kasultihi sa inyong mga lakaw ni Donna Lopez gahapon. Sure ko nga nagkauban mo.”
“Tuod diay, Darling, wa pa ko nimo kasultihi sa inyong mga lakaw ni Donna Lopez gahapon. Sure ko nga nagkauban mo.”
 ??  ??

Newspapers in Cebuano

Newspapers from Philippines