trust ug approval ratings ni duterte mitibugsok
ANG labing ulahing survey sa Pulse Asia nga gipahigayon kaniadtong Septiyembre 1-7 nagpakita nga mihagsa ang trust ug approval ratings ni Presidente Rodrigo Duterte.
Gikan sa 88 percent approval sa presidente mius-os kini sa 75 percent. Samtang ang iyang trust rating mikunhod sab og 15 percent nga gikan sa 87% mitibugsok ngadto sa 72 percent na lang.
Apan bisan pa man og mikunhod ang trust ug approval ratings ni Pres. Duterte, giisip pa gihapon sa Malacañang nga nagpabiling ‘very good’ ug taas pa gihapon ang pagsalig sa katawhan sa presidente.
Matod pa ni Presidential Spokesman Harry Roque, padayon nga naningkamot si Duterte nga mahatagan og solusyon ang problema sa nasod ilabi na ang isyu sa bugas ug presyo sa uban pang mga produktong agrikultural sama sa pagpagawas niya (Duterte) og lainlaing kamandoan aron tugotan ang importasyon sa bugas, kamay ug uban pang agri products aron mokunhod ang presyo niini sa mga tindahan.—