Janah Zaplan
Padayong Misulbong ang Karera Isip Recording Artist
SA bag-ong mga recording artist karon, usa si Janah Zaplan sa paspas nga misulbong. Gawas nga nakaangkon og maayong tingog, maanyag ug utokan sab ang bag-ong singing sensation.
Desisayis anyos lang si Jana ug Grade 11 student sa O.B. Montessori, Sta. Ana. Usa siya ka volleyball player ug captain ball sa ilang varsity team. Kon nakapaminaw ka sa iyang “Di Ko Na Kaya,” lamaton ka usab sa bag-o niyang single nga “Mahal Na Kita” nga parehong available karon sa iTunes, Spotify, Youtube, Deezer, ug Amazon.
Nagsugod sa showbiz ang dalagingding sa dihang nakasulod siya sa “Music Hero” sa “Eat Bulaga” ug nahimong semi-finalist. Pero four years old pa lang nagsugod na siya sa pagkanta. Usa siya sa mikanta sa “Alon ng Puso”, ang theme song sa indie movie nga “Rendezvous.”
Usa ka dakong blessing niya karong tuiga ang pagkanominar isip New Female Recording Artist of the Year alang sa iyang single nga “Di Ko Na Kaya” sa bag-o lang natapos nga Star Awards for Music sa Philippine Movie Press Club (PMPC).
Labihang lipaya ni Janah sa maong pasidungog. Naglahugay ang iyang emosyon sa dihang nasayran nga nominado siya. Busa labihan ang iyang pagpasalamat sa Star Awards for Music ubos sa PMPC nga gipaminaw ang iyang kanta ug gihatagan kinig oportunidad nga mahimong kabahin sa awarding. Kauban niya sa nominasyon sa maong kategoriya sila si Maymay Entrata, Kisses Delavin, Kyline Alcantara, Regine Tolentino ug daghan pang uban.
Pangandoy niya nga mahimong usa ka piloto, mahimong artista ug padayon nga maugmad ang iyang pagkanta ug pagka recording artist. Ug labaw sa tanan mahimong ikapasigarbo siya sa iyang pamilya ug sa mga tawo nga nagpalibot ug nagmahal niya.
Sa iyang pagkanta, maoy iyang giidolo si Sarah Geronimo.
“Parang lahat nasa kanya na, total performer, magaling siya mag-express ng feelings niya through singing and ‘di lang siya kumakanta, sumasayaw siya, nag-a-acting siya… kaya sobrang idol ko po si Sarah,” maoy butyag ni Janah.
Si Janah, nga gianggaan usab isip Millennial Pop Princess nafeature usab sa Wish 107.5 Bus niadtong miaging Septiyembre 22 sa SM by the Bay.
Human siya nakakanta sa Wish Bus, mikanta usab siya sa gawas niini og lima pa ka kanta. Dinhi, nahimo siyang front act sa Aegis.
Dako ang pagpasalamat ni Janah sa mga tawo nga mihatag niyag oportunidad aron makauban ang Aegis.
“Sobrang honored ako, kasi hindi lahat nabibigyan ng ganoong opportunity lalo na at front act ka sa Aegis, plus nakakanta ka pa sa Wish Bus na sobrang sikat for singers,” matod pa ni Janah nga nagpahiyom.
Sa mga gustong makita si Janah nga mokanta, ato siyang atngan karong Disyembre 14 isip front act ni AC Bonifacio sa Skydome, SM North EDSA.—