Anino Sa Imong Panit

Bisaya - - Sugikiblat - Ni R JOSEPH DAZO

SA imong pagsulod balik sa condo building nga nahimutang sa Banilad, dala ang way sulod nga itom nga gym bag, gitutokan ka pag-ayo sa security guard. Buot unta niyang tawgon ang imong atensiyon, apan nahimo ra kining pahiyom. Mailhan ra gyod ka bisan taas na ron imong bungot ug ang imong buhok puyde nang mapugngan. Aduna na ganiy ariyos nga krus sa imong walang dalunggan ug gi- tattoo nga linya sa balak ni Dylan Thomas sa imong bukton ug imahen nga bagulbagol sa unggoy nga may migawas nga bitin sa mata niini. Tuod, miniwang ka. Ubay-ubay na ang nausab apan aduna kay timailhan: imong mga mata. Oo, masulub-on gihapon kini. Daw imo kining hinuwaman (ug wa na iuli) sa usa ka tawong miadtog usa ka gera.

Nag-inusara ka nga misulod sa elevator. Gipindot ang 8. Buot unta ka nga mokuot sa imong bolsa ug mokuha sa nahibiling Marlboro Ice Blast, apan nakahinumdom ka sa imong saad nga karong buwana kinahanglang di ka makahurot og usa ka pakete sa sigarilyo sa sulod sa usa ka semana.

Nakamatikod ka nga way nausab sa hallway sa imong paglakaw padu’ng sa imong lawak, 808. Mag-usa ka tuig na tingali sukad ka mibiya.

Nagpadayon kas paglakaw ug gikuha ang card. Misiga ang sensor human nimog paduol niini. Miapas dayon imong lawom nga pagpanghupaw. Sa pagkaabli sa pultahan, ang kahilom misugat, makabungol.

Misiga ang lawak, mao gihapon imong nakita sukad ka mibiya: buak nga botelya, ang bino niini mimansa sa carpet, anaa pa ang box sa pizza nga adunay nahibilin nga usa ka hiwa, dugo nga miuga sa bungbong, wa mahugasi nga mga plato, kutsara, tenedor, kaldero; sa banyo, puno ang balde og tubig (gamay na lang ug moawas na kini); guba nga bookshelf ug nangatagak nga mga libro ni Wilde, Ginsberg, ug Cavafy. Ug guba nga bangko. Ug guba nga selpon sa sawog. Ug kutsilyo sa sawog. Sa katre, sa gum-os nga hapin ug didto ka mitutok, nagpabilin ang kurba sa iyang lawas

nga hagbay rang mibiya. Iyang brip hilom nga nagpahipi ilawom sa tiilan sa katre. Adunay buhok sa unlan. Adunay bulbol sa sabon. NAHUMAN kag limpiyo sa lawak. Nahan-ay, nahipos, ug nalabay na ang kinahanglang han-ayon, hiposon, ug ilabay. Napuno na ang gym bag sa mga bulingon ug mga gamit nga buot nimong dad-on. Milingkod ka. Nag- earphones. Gipatokar ang kanta ni Nick Cave & The Bad Seeds nga “Into My Arms – 2011 Remastered Version”. Migamit ka sa selpon. Mi- notify ang Twitter ug Blued.

Naa gihapon ang iyang numero nga wa nimo i- delete kay tingalig motawag pa siyag balik. Labi na sa alas onse, diin moingon dayon siya nimo nga matulog na siya. Usa ka tuig na sad ka nga kada kadlawon na matu’g, nagpaabot nga mo- ring ni. Ang imong buttoned shirt nga gisul-ob ron, gipasagdan gihapon nimo nga di matarong pagkabotones kay naanad ka nga siya ang motiwas ug motarong og serado niini.

Mibarog ka aron pawngon ang suga. Ngitngit ang palibot. Hanap na man sad god imong panan-aw. Wa kay makita. Gikuot nimo ang sigarilyo nga nahibilin og giduslitan. Ang siga, daw nag-inusarang saag nga aninipot sa halapad nga kangitngit. Ug samtang nagbarog ka taliwa sa ngiob nga lawak, mao gihapon ang imong nakita sukad ka mibiya: buak nga botelya, ang bino niini mimansa sa carpet, anaa pa ang box sa pizza (nga adunay nahibilin nga usa ka hiwa), dugo nga miuga sa bungbong, wa mahugasi nga mga plato, kutsara, tenedor, kaldero; sa banyo, puno ang balde og tubig. Gipaagasan nimo ganina ang gripo aron lang moawas ang tubig. Guba nga bookshelf ug natagak nga mga libro ni Wilde, Ginsberg, ug Cavafy. Ug guba nga bangko. Ug guba nga selpon sa sawog. Ug kutsilyo sa sawog. Sa katre, kahibawo ka nga gum-os gihapon ang hapin, di na kinahanglan tutokan; nagpabilin didto ang kurba sa iyang lawas nga hagbay rang mibiya. Ug utog sa buntag ilawom sa puting habol. Iyang brip hilom nga nagpahipi ilawom sa tiilan sa katre. Masimhotan pa nimo ang isog nga baho sa iyang tulos. Adunay buhok sa unlan. Adunay bulbol sa sabon. Aduna gihapon siya. Aduna gihapon mo. (KATAPOSAN)

Ang handomanan dili maantigong malimot. Buhi kini sama sa damgo, tinuod kini sama sa urom…

Aduna gihapon siya. Aduna gihapon mo…

Newspapers in Cebuano

Newspapers from Philippines

© PressReader. All rights reserved.