Ang Batong Marmol
Sa halapad nga palad sa kabungtoran ilang gipatukod ang tore nga kinatas-an; Dalion ni natog human aron dili na ta makab-ot sa kabukiran nga umahan ray kalamposan Atong gamiton ang atong kaalam aron kita dili na ilhong mga indio nga mal-educado, Ipakita nato nga kita anaay katakos nga motunob sa ilang sementadong uniberso, Himoon natong mapangahason ang atong kaugalingon aron magmadaogon! Naigking sa kasakit ang kabungtoran kay ang tunga-tunga sa iyang palad mao may naigo sa gidukdok nilang lansang, Napapas na pod ang mga badlis niini tungod sa kainit sa semento nga gibubo sa walay puangod nga mga tawo, Mikurog kini sa kahapdos tungod kay ang iyang dughan may nasamdam. Iyang gikumkom ang pakyas nga kapalaran! Midugdog ang iyang pagbakho tungod sa ilang gidangatan; Gibuhian na ni Enrique ang bao sa iyang amo. Naghinam-hinam na pod siyang matungas ang gihangad niadtong mga perlas. Iyang gisaulog ang pagsuksok sa yuta sa iyang mga kuko ug ang mapinanggaong pagpanuslok sa mga bato sa iyang lapalapa. Gitik pod alang kaniya ang pagkudlit niini sa iyang panit daw lihokan kini nga pagsugid sa mamamatik kabahin sa mga panghitabo niadtong wala pa siya ikatagbo. Basa niadto ang yuta ug si Iking midailos, nahulog ug ang iyang ulo naigo sa tipak sa batong marmol nga misagol sa yuta sa miaging delubyo. Gihuwap-huwap ni Iking ang maong bato ug didto siya nakahunahuna: nga wala pa diay siya makabalik sa iyang tribu. RICHELLET P. CHAN Dakbayan sa Mandaue