Ang Bayok ni Gunong
Gikuyawan siya nga tingali unyag dili magmalamposon ang ilang transaksiyon niadtong gabhiona.
Alas 12:36 na sumala sa taknaan ni Dr. Hernaez. Hapdos na kaayo ang pamati niya sa iyang tiyan. Didto sa pikas lawak, ang asawa ug mga anak ni Candido nanaghagok na. Mitindog si Dr. Hernaez ug miduol sa tigulang. “Buyno,” miingon siya, “ikapasalig ko hinuon nimo, Tay, nga dili ka magmahay nga akoy imong gibaligyaan ning imong kinulit. Adto ko kini ibutang unya sa museyo sa unibersidad ug way makahilabot niini didto.” Unya iyang gisugo si Candido pagputos pagbalik sa kinulit aron kini ibalik pagsulod sa kahon ug iyang madala.
“Magdugo ang akong dughan nga magtan-aw niana nga mahimulag nako, Sir,” ni Tatay Isko pa nga naglantaw sa iyang misteryosong kinulit nga nagmahilomon didto ibabaw sa gamayng talad. Ang nag-isa nga walang kamot sa itom nga kinulit daw nagtulisok kang Tatay Isko.
Apan si Dr. Hernaez wala na maglangay pa. Gibuksan niya ang expanding envelope nga iyang dala ug giiphan og P15,0 P15,000 si Tatay Isko. Mingpasad atubangan sa tigulang ang mga papel de banko. “May mahimo ka na niining kantidara dinhi sa siyudad, Tay,” miingon siya, “ug kon may problema ka un unya nga sa imong pagtuo makatabang ko, adtoa lang d dayon ko sa unibersidad. Pakuyog lang kang Candido.” Ug mipasigpat siya kang Candido nga nalipay kaayong nagtanaw sa salapi didto atubangan sa tigulang.
“Maayo tingaling dili ka magsaba-saba ni bisan kinsa, Doktor, nga gikan ni Tatay Isko kining kinulit,” miingon si Candido.
“Ayaw kabalaka, Candido. Way laing masayod ining tanan gawas kanato dinhi,” mipasalig si Dr. Hernaez.
Tapos maputos ang itom nga kinulit gibalik kini pagsulod ni Candido sa kahon sa dakong pagmatngon. “Sige, Doktor, tana,” miingon siya ug milingi kang Dr. Hernaez. “Ihatod tika sa imong kotse.” Unya gipas-an niya ang kahon ug nagkuyog sila si Dr. Hernaez pagpanglakaw paingon ngadto sa dakong dalan. Gipuno ni Dr. Hernaez ang iyang dughan sa bugnawng hangin sa kagabhion. Iyang namatngonan nga morag bag-o lang siyang nakagawas gikan sa usa ka mangiob nga langob. Ang kahayag sa mga suga sa dakong dalan nakapahuwas kaniya. (PADAYONON)