Sophie Albert,

Nahatagan ra Gyod og Regular Show sa GMA-7

KON maghulat duna gyoy mapaabot. Kini ang nasinati ni Sophie Albert nga naghulat og halos usa ka tuig human mipirma og kontrata sa GMA-7 ang kanhi TV5 artist. Karon nahatagan ra gyod siya og regular show pinaagi sa Kapuso primetime teleserye nga “Pamilya Roces” nga gisugdan na pagsalida niadtong Oktubre 8. Sa pagpirmag kontrata ni Bianca Lyttle Reyes, sa tinuod nga kinabuhi, migawas siya sa mga programa sa Kapuso network sama sa “Magpakailanman”, “The One That Got Away”, “Daig Kayo ng Lola Ko”, “Sherlock Jr.”, “The Stepdaughters” ug “Victor Magtanggol.” Dako ang pagtuo sa 28 anyos nga aktres sa tayming. Tingali kon duna pay regular show ang dalaga human siya mipirma, mahimong dili pa siya andam. Mao nga nalipay sad siya nga hinay-hinay rang gihatag sa management ang pagsulod niya sa mga show ug pag- build up sa iyang karera sa GMA-7. Sukad sa iyang pagbalhin, wala siya laayi sa paghinulat kay kanunay man siyang tagaan og trabaho, bisan og dili kabahin sa mga regular show. Malipayon kaha siya sa dagan sa iyang karera sa Kapuso network? “I’m starting from scratch again since moving to GMA. I’m pretty happy with the things are going now. I feel like the show is really opening, getting me out of my shell. That’s all I asked for naman— to be continuously working and to be learning,” matod pa sa palalab ni Vin Abrenica. Ang papel ni Sophie nga wild but lovable nga si Amber Bolocboc-Roces sa “Pamilya Roces” maoy iyang biggest break so far. Originally, ang maong papel gihatag ngadto kang Winwyn Marquez, apan gibalibaran kini sa actress-model aron matuman ang mga responsabilidad niini isip reigning Reina Hispanoamericana 2017. Niini, way problema ni Sophie kon dili man siya ang first choice. Kay niya pa, “It’s a privilege, it doesn’t take away anything from it. I am luckier because it was not supposed to be mine.” Makauban ni Sophie sa “Pamilya Roces” sila si Carla Abellana (isip Crystal Rose Roces-Javellana), Christian Bautista (isip Ralph Gomez), Rocco Nacino (isip Hugo Javellana), Gabbi Garcia (isip Jade Roces), Jasmine Curtis-Smith (isip Pearl Pineda), Shaira Diaz (isip Amethyst Roces) ug daghan pang uban. Ang teleserye ginasundan na karon sa GMA Telebabad, nga magsugod sa alas 9:20 sa gabii inigkahuman sa “Onanay”. Gidirehian kini ni Award-winning Director Joel Lamangan. Sa laing bahin, gi- deny ni Sophie nga magkapasal na sila sa boyfriend niining si Vin. Dili pa sila ready ug daghan pag plano nga angay atimanon usa sila mosulod sa kaminyoon. Pero anytime, ready kuno siya nga mahimong Mrs. Abrenica.—