Leksiyon sa Arte sa Panimuyo ug Panulat ang Panaw sa JAPAN
6 Ang Trabaho Tipik sa Eden
SA mubong TV interview sa Ryokan Matsumuraya en Koedo, Kawagoe, naingon ko nga magsulatan ko sa mga mantalaang Iningles ug Binisaya sa Pilipinas. Sugilanon ug balak. “Unsa kadali ang pagsulat mo og sugilanon,” sukot sa maanyag nga reporter. “Usahay tulo ka adlaw, usahay tulo ka buwan,” tubag ko. “Ikigai,” matod niya. Giisip ko ang pulong ikigai nga panamilit niya dala ang yukbo o lumalabay nga komplimento. Sa miaging tulo ka tuig kadto.
Karon nadungog ko pagbalik ang pulong ikigai sa apartment sa akong anak ug banang Hapon. May lain usab akong anak dalaga nga nanarabaho sa Japan.
Sa mga alas singko sa buntag sila nagkape na. Gitambo ko sila sa balkon ug nasaksihan ko usab ang mga trabahador babaye ug lalaki nga naglakaw sa 4 sentigrado nga katugnaw. May babaye nga sakay pa sa bisikleta ang duha ka anak, usa sa atubangan ug usa sa likod. Ang duha ko ka anak baskog nanglakaw sa baleg kilometro kapin ngadto sa tren aron mosakay ngadto sa laing mga dakbayan gitrabahoan. Migawas bisan makapakuray ang temperatura. Nagsud-ong sa mga bata kong hinagkan, gibati ko ang kahibulongang kaluoy! Sunod ang bana ni Nina nga nagbisikleta baleg 15 minutos ngadto sa gitrabahoan nga naa ra sa duol.
Mga panon makita ko sa mga hagdanan sa tren buntag ug hapon. Maglinya ang mga trabahador nga nag-amerikana ug matahom bisteda para sa mga opisina ug ang mga yano sa pabrika. Mawala lang sila sa sunod-sunod nga mga tren sa mga andana sa
estasyon o mall. Ug sa tren ang estudyanteng mga bata nanaginot pagtuon.
Sagad sa restawran na kami magkita. Dinaghan silag order, kay sa trabaho malat-angan ang pamahaw ug paniudto.
Sa pikas masayang lamesa nadungog ko ang pulong ikigai. Nagpakisayod ko sa kahulogan niini sa anak.
Ang ikigai prinsipyo o pilosopiya sa trabaho. Sa ikigai gipangita mo ang perpekto sa imong buhat alang sa imong gugma, alang sa kaayohan sa tanan, ug alang sa bayad. Magyukboay ang managkauban sa trabaho sa pagpamauli agig pasalamat sa ilang pagtinabangay sa mga oras.
Ang kinaibabwang tinguha mao ang kalipay sa kasayoran nga may nahimong matahom sa usa ka adlaw.
Wa masayop ang reporter sa TV nga miinterbiyo kanako. Kay tinuod anaay ikigai sa panulat sa kadaghanan kanato. Kon kini wala pa, kinsay maghago sa pagsulat nga di makadato?
Bahin sa akong pagpangempleyo sa gobyerno sa 25 ka tuig, natilawan nako ang paggukod-gukod uban sa ubang pasahero og dyip o bus paingon sa opisina mabuntag ug gikan sa opisina mahapon. Sa ulan ug init, aso ug abog. Natilawan nako ang dinaliang kape ug pandesal sa buntag. Naambitan nako ang mga problema sa mga kaubang nasakit.
Apan diay ang pag-usab lang sa panan-aw sa trabaho ang usa sa mga solusyon pagpaspas sa abog. Ang antos aron sa pagperpekto sa kaugalingon nga kinabuhi o pamilya, o sinulat maoy patilaw sa Eden. Kay ang perpekto kalidad mahipalgan lang sa Eden. Mao kahay hinungdan nga walay way trabaho sa Japan?
IKIGAI!—