HUSTISYA...

paghatag og hustisya sa kamatayon ni Mr. Lopez ang akong ikahatag nga impormasyon nimo.” “Salamat, Sir.” Nalipay si Monsour Morales kay mikooperar kaniya ang general manager ni Angelo Lopez.

“Nadestino si Mr. Lopez sa Iligan, sa among branch didto isip bookkeeper. Almost two years siya didto. Ang among branch manager didto nag- request dinhi sa main office nga ibalik si Mr. Lopez dinhi sa Cebu.”

“What reason, Sir?” Naghinam-hinam si Monsour nga masayod sa dugang pang isulti sa manedyer.

“Babaye ang hinungdan, Mr. Morales. Dunay nahimong girlfriend si Mr. Lopez didto nga manghod niyag edad. Guwapa kini. Nagtrabaho sab sa among branch didto. Nabalaka ang among branch manager didto kay minyo man si Mr. Lopez. Dunay dugo sa pagka Muslim ang babaye. Basig buhatag daotan si Mr. Lopez sa mga kaliwat sa babaye. Naatol sab nga ang chief accountant dinhi sa main office miretiro, maong nabalik gyod si Mr. Lopez dinhi ug siya ang napuli sa bakanteng posisyon sa pagka chief accountant.”

“Wa ba magsulti ang inyong branch manager didto kon unsay ngalan sa babaye, Sir?” “Wa man sab, Mr. Morales.” “Molarga ko ugma paingon sa Iligan, Sir. Magpakisayod pa ko og dugang didto.”

“Maayo nang imong nahunahunaan, Mr. Morales. Didto, makahibawo ka sa gusto mong masayran gikan sa among branch manager.”

Unya gihatagan si Monsour sa general manager og address sa ilang branch didto sa Iligan. Gihatagan sab si Monsour sa ngalan sa branch manager.

Nagpasalamat ang detektib. Gitawgan ni Monsour Morales si Malou Sayson bahin sa iyang paglarga paingon sa Iligan ugma. Gihangyo sa detektib nga di paanhaon sa gipuy-an niyang apartment ang hinigugma unyang gabii. Misabot si Malou, ug miuyon sa gusto sa detektib.

Wa mopauli og diretso si Monsour Morales sa gipuy-ang apartment. Naglukat una siyag tiket sa ayroplano para Cagayan de Oro kay wala may direct flight paingon sa Iligan. Wa siya maglisod sa paglukat kay duna pay mga bakante sa mobiyahe sa alas otso sa buntag.

Unya, mipauli na si Monsour sa gisak-ang apartment. Sa sulod sa iyang kuwarto, nagsulod siyag pipila ka biste ug uban pa niyang gamit sa igo-igong gidak-on nga travelling bag. Mikanaog siya sa silong pagkahuman ug mikuhag usa ka botelyang serbesa sa refrigerator. Milingkod siya sa sopa ug gisugdan pagtungab ang serbesa. Nagdagkot sab siyag usa ka stick sa Marlboro. Samtang nagpabuhot siya sa aso, lawom ang iyang gihunahuna. Naglaom siya nga unta sa pag-adto niya sa Iligan, aduna siyay maayong mga impormasyon nga makuha ug madiskobrehan nga maoy mag-ila sa utok sa pagpatay kang Angelo Lopez.

Kalit nga naigpot si Monsour dihang mikiring ang iyang selpon nga gipatong niya sa center table nga diha sa iyang atubangan. Usa ka incoming call. Pagsusi sa detektib, si Donna Lopez ang nanawag.

“Mon, mag- dinner ta unya. Didto gihapon sa gikan-an natong restawran sa uptown. Gimingaw ko nimo, Mon.”

Matentalon ang paraygong tingog ni Donna. Nahinumdom si Monsour Morales sa kamaayong modala niini sa duwa sa kama. Kon magpadala siya sa lawasnong kalipay, si Donna ang kanunay niyang mahunahuna. Apan duna siyay self control labi na gyod sa emosyon. Kon di pa lang gusto niyang laangon si Donna, di siya makigsuod niini,

Unsaon kaha paglikay ni Monsour niining gipakita nga lihok ni Donna Lopez? Di kaha siya mabitik niini?

ug labaw na nga di siya magpadala sa pagtental niini kaniya.

“Sa sunod na lang, Don. Medyo naglain ang paminaw ko sa akong lawas ron.”

Wa isulti ni Monsour nga mobiyahe siya ugma sa buntag paingon sa Iligan agi sa Cagayan de Oro. Gusto siyang makapahuway gyod unyang gabii.

“Gikinahanglan gyod ko nimo aning panahona, Mon. Maayo kong momasahe labi na sa agtang sa tawo. Kon nanakit ang imong lawas, ug naglabad ang imong ulo, anhaon tika sa gipuy-an mong apartment. Pisilon nako imong tibuok lawas ug agtang.”

Kalit nga nahatindog si Monsour. Sa sinultihan ni Donna Lopez, nagpakita na kinig kaagresibo ug kaisog. Nagpaila lang kini nga di kini mahadlok kang Malou bisag magkaabot sila sa gipuy-an niyang apartment. Nakapanlad-ok sa laway ang detektib. Apan wa siya magpasabot kang Donna nga nabalaka siya sa panag-away unya niini ug sa iyang hinigugma. “Ayaw na lang, Don. Nagtomar na man kog tabletas.” Kalma nga mipasabot si Monsour. Nasayod na siya nga sa ingon niining sitwasyon, ang kahapsay sa panghunahuna ug emosyon ang gikinahanglan. Naagian na niya kining maong sitwasyon sa usa ka babaye nga iyang gikarelasyon tungod sa kaso nga iyang gikuptan. Ang maong babaye nagpakita usab og kaagresibo ug kaisog ug wa mahadlok kang Malou. Suspetsado ang babaye sa krimen nga iyang gikuptan.

Apan namatay ang babaye dihang miikyas sakay sa motorsiklo niini human makompirmar nga guilty kini sa maong krimen ug maoy utok sa gihisgotang salaod. Gigukod kini ni Monsour sa gisakyan niyang Vios. Sa katarantar sa babaye, gipakusgan niini sa pagpadagan ang gimanehong motorsiklo. Ug wa kini makabantay sa ten wheeler truck nga gikasugat. Maayong pagkapasok sa ilawom sa trak ang babaye ug ang gisakyang motorsiklo. Dead on the spot ang babaye. Ug nahunahuna karon ni Monsour ang kaagresibo ni Donna. Ug kini ang gikabalak-an ni Monsour. Morag nangabubho ra ba si Malou kang Donna Lopez. Di siya gusto nga mahiubos si Malou kaniya. Gimahal kaayo niya ang hinigugma. “Sabta ko, Don.” “Sige. Basta sa sunod, ayaw na ko pakyasa, Mon.” Nasabtan sa detektib sa tingog ni Donna Lopez nga di na kini magpabalibad sa sunod higayon nga gusto kining makigkita kaniya. Napugos sa pagtando si Monsour dungan sa paghunahuna nga likayan na gyod niya si Donna kay di siya gusto nga masamok ug magubot ang ilang pagminahalay ni Malou. (PADAYONON)