ESTORYANG HINUBOG
KON magkalami na ang tagay, manggawas dayon ang mga Iningles ug mga estoryang wa- diri- wa- didto. Usahay, malingaw na lang tang maminaw sa mga hubog sa ilang mga panagtabi ilabi na kon mokalit kini og kaseryoso.
Sa dihang nakadlawnan ko sa pagsakay og dyip paingon sa amoa, miaksiyon kog kabalaka dihang adunay duha ka hubog nga mingsakay. Nangandam ko sa akong kaugalingon basin kon adunay mahitabong kagubot.
Sa dihang naghisgot og pagsalig sa Ginoo ang mga hubog, sekreto kong naminaw sa ilang panagtabi.
“Kining yawa, Pre, brayt kaayo. Mangita gayod kini og paagi nga matental ang tawo sa pagbuhat og sala,” sugilon sa usa sa mga hubog.
“Kahibawo ka, Pre, adunay tulo ka armas nga gamiton ang yawa para matental ang tawo: tentasyon sa panan- aw, tentasyon sa panghunahuna, ug tentasyon sa pasigarbo sa kinabuhi.”
Nakapangutana ko sa akong kaugalingon kon tinuod ba nga aduna diay armas ang demonyo aron matental ta. Tungod niadto, ganahan kong mosusi kon unsay buot ipasabot sa tulo ka armas. Busa, mipadayon kog paminaw nila.
“Sampol, Pre, naa kay kuwarta para bayad sa imong utang. Dayon naay bag- ong selpon gipakita sa TV. Nainteresado ka niini tungod kay nindot; mao kini ang tentasyon sa panan- aw. Unya pagkakita nimo nga nindot ang kamera kay moguwapo kang tan- awon bisan tuod dili gyod, imo dayon kining gipalit; mao kini ang tentasyon sa panghunahuna. Ug tungod kay bag- o ang imong selpon, daghan ang masina nimo, ug imong ipanghambog; mao kini ang tentasyon sa pasigarbo sa kinabuhi.”
Niadtong higayona, mitando ko sa akong kaugalingon. Nakauyon ko sa iyang buot ipasabot.
Ang demonyo magtuon una sa usa ka tawo ug mangitag paagi aron ang tawo matental, makasala, ug mapalayo sa Ginoo.
Nangutana ang iyang kauban, “Pre, kon ikaw usa ka sundalo, Kristiyano ka unya ang gitudlo sa simbahan kay dili mopatay— unya kon ang mando sa inyong komander: shoot to kill! Unsay imong tumanon: ang gitudlo sa imong pagka Kristiyano o ang mando sa imong komander sa trabaho?”
Nakugang ko sa pangutana sa iyang kauban. Mismo ako, naglibog kon unsa ang angay sundon. Dili man pod mahimo nga dili nako tumanon ang mando sa akong komander sa trabaho apan dili sad nako makaya nga isalikway ang akong pagka Kristiyano.