Mirror Of Fortune
(ANG INYONG KAPALARAN SA OKTUBRE 31 – NOBIYEMBRE 6, 2018)
PISCES – (Pebrero 20 – Marso 20) – Niining semanaha daghan ang mohugop sa imong kawsa bahin sa pag-ugmad sa kabatan-onan. Magmalamposon ka sa imong gitinguha. Makakuha kag suportar sa simbahan. Mapalapdan mo pa ang imong pagserbisyo. Matagbawon ang romansa. Suwerte mong adlaw ang Martes ug palaran mong numero ang 9, 3, 7.
ARIES – (Marso 21 – Abril 20) – Maangkon mo na ang hustisya human molutaw ang kamatuoran. Di ka na mobalik sa mga hiwi mong binuhatan. Hingpit ka nang mag-usab sa imong batasan. Mobalik ka pagseryoso sa imong kurso. Makadimdim kag kalalim. Huybes ang suwerte mong adlaw ug 5, 3, 2 ang palaran mong numero.
TAURUS – (Abril 21 – Mayo 21) – Niining semanaha mabalik ang pagsalig sa imong kaugalingon human mo madungog ang maymay sa imong inahan. Makalingkawas ka na sa imong obligasyon. May motabang kanimo nga di kabalibaran. Pahinuntan mo ang kablit sa kahidlaw. Suwerte mong adlaw ang Sabado ug palaran mong numero ang 6, 5, 8.
GEMINI – (Mayo 22 – Hunyo 21) – Modesidir ka na ug mohukom pagpanrabaho sa layo. Agwantahon mo na lang ang kamingaw kay aron makaeskuyla ang imong mga anak. Di makadispasir ang imong kinitaan kon anhi ka lang magtrabaho. Masabtan mo ang aghat sa kidhat. Martes ang suwerte mong adlaw ug 3, 4, 6 ang palaran mong numero.
CANCER – (Hunyo 22 – Hulyo 22) – Niining semanaha matugaw ang imong pagmalinawon sa hinanali nga panghitabo. Kalma lamang kay di ka pasagdan sa Kahitas-an. Ayaw kalimot sa pagsangpit sa Ginoo. Magmalaomon ka kanunay. Kusog ang imong sex appeal. Suwerte mong adlaw ang Biyernes ug palaran mong numero ang 1, 9, 2.
CAPRICORN – (Disyembre 22 – Enero 21) – Niining semanaha magsugod ka na sa pagdaginot kay modako ang imong galastohan. Mangita kag diskarte nga madugangan ang imong kinitaan. Katuohan ang imong ipahayag. Masum-ok kag relasyon nga magmalungtaron. Suwerte mong adlaw ang Domingo ug palaran mong numero ang 9, 6, ug 3.
LEO – (Hulyo 23 – Agosto 23) – Mopatigbabaw gihapon ang imong prinsipyo taliwala sa kontrobersiya. Ayaw kabalaka kay molutaw ra ang kamatuoran. Isentro mo lang ang imong atensiyon sa pagtrabaho. Ipadayon mo ang pag-apil sa kawsa. Modalit kag lahing pahiyom. Domingo ang suwerte mong adlaw ug 5, 4, 3 ang palaran mong numero.
VIRGO – (Agosto 24 – Septiyembre 23) – Niining semanaha masulbad na ang giatubang mong problemang pinansiyal. Makakita kag paagi nga makakuha og ekstrang income. Doblehon mo pa ang imong pagpaningkamot aron makasalbo ang imong kinitaan. Maagni kas pasiplat. Suwerte mong adlaw ang Lunes ug palaran mong numero ang 8, 7, 6.
LIBRA – (Septiyembre 24 – Oktubre 23) – Maani mo na ang gitanom mong kaayohan. Mobalos kanimo ang imong igsoon nga gigastohan mo sa pag-eskuyla. Ipadayon mo ang imong pagka manggihatagon sa uban. Makadawat kag dugang grasya. Makahibalag kag binuhat nga maunongon. Huybes ang suwerte mong adlaw ug 5, 8, 2 ang palaran mong numero.
SAGITTARIUS – (Nobiyembre 23 – Disyembre 21) – Padayon kang madasigon sa pagtuman sa imong katungdanan. Di mo angayng palabyon ang kahigayonan nga mopabor kanimo. Doblehon mo pa ang imong kakugi aron makabot ang imong gitinguha. Bation mo ang katagbaw ug kalalim. Biyernes ang suwerte mong adlaw ug 4, 7, 3 ang palaran mong numero.
SCORPIO – (Oktubre 24 – Nobiyembre 22) – Niining semanaha mahinuktokan mo ang nahimo mong kasaypanan. Daghan ang nausik mong panahon. Gipalabay mo lang kining walay gisangpotan. Dupot ka nang magtuon sa imong mga leksiyon. Ikapahungaw na ang gitipigan mong pagbati. Suwerte mong adlaw ang Miyerkoles ug palaran mong numero ang 3, 7, 6.
AQUARIUS – (Enero 22 – Pebrero 19) – Kawilihan ang imong mga pasiaw. Apan sa tinuoray seryoso ang imong tumong nga malingaw ang iyang apohan. Moboluntaryo ka pagserbisyo sa simbahan. Di mo ihikaw ang paghalad sa imong talento. Mainiton ang salohang romansa. Lunes ang suwerte mong adlaw ug 5, 6, 7 ang palaran mong numero.