DAGAN ILIGAN: DIYANDI FESTIVAL RUN
DUHA ka adlaw sa wala pa ang lumba, nahimuot ug nakapahiyom ko nga naghunahuna sa gitambag kanako sa usa ka babaye sa pawnshop nga usa sa mga esponsor. “Tay, adto ka sa I-K ipon sa mga bata edad 12 paubos”. Hala… Mga bata akong kaatbang? Aw, okey lang.
Human nakog bayad sa registration (P250.00), nakaingon ko sa akong kaugalingon: Ako nay mag-una sa maong lumba. Kinsay ngalan anang sekretari? (Jegica?) Akong ipakita nga mangamote na sila…
Bisan ang sekyu niingon, “Ikaw nay first ana, Tay. Usa ra ka kilometro, puyde ra i- meter dash nimo.”
Sa adlawng Domingo, petsa 2 sa Septiyembre, alas 5:00 sa kabuntagon, ako lang gidagan gikan sa Barangay Del Carmen paingon unta sa Robinson sa Barangay Tubod, Dakbayan sa Iligan. Galing kay gisuwerte man nuon, nalabyan ko og usa ka awtong pula nga gimaneho sa magtiayong Arquisa, ila kong gipasakay, gikan sa Barangay Pala-o paingon sa benyu.
Sa maong lugar (Robinson), nisamot ang akong kalipay nga kaming mga runner gilibotan sa mga sundalo (A.F.P) ubos sa Tabac Division. Dunay duha ka armored car, 3 ka siksbay nga truck nga kompleto, morag moatake og gera. Wala ko sila makuhai og hulagway kay wala ko makaduol nila.
Diay, usa sila sa mga esponsor sa maong marathon— ginganlan og “RUN TO SUPPORT OUR TROOPS”. Gani, apil man sa lumba sa dagan ang usa ka platoon sa polis (babaye ug lalaki) ug usa ka platoon pod sa Army (babaye ug lalaki) gihapon. Didto sab sila si Ginong Brian Quiamco ug Ginong Jeffrey Sotto, propesyonal nga mga runner.
Human sa pangaliya, adunay diyotayng pahimangno. Gisugdan sa alas 6:00 sa buntag pinaagi sa starting gun nga gipabuto ni Ginong Michael Nire, ang direktor sa lumba. Nag-una ang grupo sa 10-K, gisundan sa 5-K ug kami— 1-K.
Gipauna nako ang mga bata og napulo ka metro aron pagsukod asa kutob ilang hangin. Apan ang 3 ka bata kusog man diay managan? Dili nako maapsan? Naningkamot ko. Tunga na unta sa kilometro, apan nisakit akong tiyan. Unsaon nga nianang Sabado sa gabii, nakahurot ko og 2 ka botelyang ihi sa kabayo. Naigo ko sa kanta ni Max Surban “Di na Gyod ko Mousab, Kausa
na Lang”. Sa tan-aw ko sa mga bata, mora og mga langgam Sayasaya nanglupad.
Nahimutang ko sa ikaupat nga dapit. Si Ginang Inday Nire nga nagtsek ug nikuha og hulagway nagkatawa kay nalupig ko sa mga bata. Apan daghan pang mga bata naulahi. Wala nako ikahiubos, bisan walay medal nga nadawat, kay ang maong kantidad (P250.00) dako nang tabang sa mga sundalo nga nangasamdan o kaha nainutil sa gera sa Marawi. Dili baya lalim, kinabuhi ang ilang gitaya tungod sa engkuwentro. Matod sa race director, “Ayaw katagam, anaa pay marathon karong 16 sa Septiyembre.
MIABOT ang adlaw sa “DAGAN ILIGAN: DIYANDI FESTIVAL RUN” nga gisuportahan sa City Government. Ning tungora mas naagresibo ko. Matod pa lagi sa panultihon: “Ang kawal na masusugatan mas lalong tumatapang”.
Siyempre, wa ko magpaulahi sa kontes. Apan dili na mga bata akong kaatbang, mga professional runner na. Sa 5-K ko mipatala. Diha sa akong hunahuna, “Top 10” lang okey na. Daghang estudyante nangapil— moduol dosentos tanan.
Pastilan, ika-16 ko nga niabot sa finishing line sa oras nga 23 minutos nga kaniadto, sa nag-edad ko og 40 kapin makuha ko lang og 21 minutos ang lima ka kilometro. Kuyog sa akong edad (senyor setisen) nagkahinay na ang akong kusog. Apan malipayon ko, baskog ang lawas ug walay mintin nga tambal kay walay sakit.
Ania ang mga ngalan sa nagpakadaog sa 5-K (Men’s Division): Unang dapit, nadughit ni Ginong Brian Quiamco sa oras nga 16 minutos ug 58 segundos. Ang ikaduha nakuha ni Ginong Jeffrey Sotto, 17 minutos ug 31 Segundos; ug ang ikatulo naangkon ni Ginong Rico Dala sa oras nga 18 minutos ug 13 segundos.
Sa 5-K (Women’s Division): Unang dapit naangkon ni Gining Dolyn Dala— 21 minutos ug 6 segundos; ikaduha si Gining Rosabel Pura, 22 minutos ug 18 segundos; ug ang ikatulo napunggit ni Miss Alicia Villanueva, 18 minutos ug 12 segundos.
3-K (Men’s Division): Unang dapit nakuha ni Richie Dala, 10 minutos ug 4 segundos. Ang ikaduha nadaog ni Rasy Tolentino, 10 minutos ug 19 segundos; ug ang ikatulo mao si Joel Sambalod sa oras nga 10 minutos ug 39 segundos.
Sa 3-K (Women’s Division), wala gyod papiri ang pamilya Dala. Naangkon ni Roselyn Dala ang unang ganti, sa oras nga 12 minutos ug 9 segundos. Ikaduha si Ronalyn Pura, 12 minutos ug 11 segundos; ug ang ikatulo naangkon ni Mary Diaz sa oras nga 12 minutos og 20 segundos.
Ginahimo kini nga kalihokan kada tuig, duha ka semana
una ang piyesta sa Dakbayan sa Iligan— pets petsa 29 ni San Miguel Arkang Arkanghel, ang patron. Gipaningkamo Gipaningkamotan gyod ni Ginong Michae Michael Nire ( event organizer) nga m makakuha og igo-igong kanti kantidad sa City Government para pa sa maong event.
Niini, mapasalamaton kaayo siya kang Mayor Celso Regencia, sa konsehales sa Dakbayan, ni Ginang Lorna Mercidita U. Mata, ang Sports & Games Regulations Officer II, ubp. Sila wala ug dili magmakuli kay alang man sab sa kaayohan sa kabatanonan nga malikay sa daotang mga bisyo. Ug nga (basin pa) aduna kitay ikapadala sa nasyonal nga mga kompitisyon puhon.
Hinuon, sa pagka karon, matod pa ni Nire, “maglisod pa kita pagpatsampiyon sa internasyonal nga kontes. Basin sa umaabot nga katuigan, kita na ang mangharos.”—