Andi Eigenmann,

Malipayon sa Yanong Kinabuhi sa Siargao

NAHIMAMAT nato si Andi Eigenmann kauban si Philmar Alipayo, ang boyfriend niya karon, didto sa boarding area sa NAIA 4. Gitug-an sa dalaga nga malipayon siya tungod kay nakita niya ang kaugalingon ug kalipay nga iyang gipangita sukad nga nanimuyo siya sa Siargao.

Halos moabot sa dunggan ang pahiyom ni Andi samtang naghinubay sa yano niyang kinabuhi sa Isla sa Siargao.

Momata kuno siya sa dili pa mosidlak ang Adlaw ug halos tibuok adlaw silang mag- surfing kauban ang palalab— ang surfing champion nga si Philmar. May mga higayon nga manikop usab sila og lab-as nga isda ug tabugok nga ilang kan-on.

“This is something I’d been wanting for myself ever since I was little. Siguro, ngayon ko lang nadiscover din na I can do something about it,” pu’ng pa ni Andi.

Gitubag sa dalaga ang atong pangukit kon unsay iyang reaksiyon sa mga nasuya sa iyang yanong pamuyo sa isla.

“Para sa akin, hindi dapat mainggit dahil lahat naman tayo kaya yun and also, because yung akin, genuine happiness happens… Alam ko naman na sa ibang tao, iba. Hindi naman kailangan kapareho. There are also people who find enjoyment in having finer things in life and there’s no problem with that,” matod pa sa dalaga.

Gipakaingon nato nga mihunong na sa pag-artista si Andi apan ang labing tinuod, wa pa lang gyoy mihatag niyag proyekto. Apan thankful siya kay gitawgan siya ni Boss Vincent del Rosario ug gikuhang bida sa horror movie nga “All Souls Night” nga maoy Halloween presentation sa Viva Films.

Kon walay project o commitment si Andi sa kaulohan, busy siya sa pagatiman sa bed and breakfast business nila ni Philmar sa Siargao. —