INTERESANTENG KATAGILUNGSOD NGA NAILHAN NAMO
SA mga katigoman sa panguma nga sama sa Agribiz Kapihan ug Agrilink Trade Show, may nahimamat kita nga nakapahimuot kanato. Sila ang mga katagilungsod nato nga anaa sa natad sa panguma. Sama sa tulo ka magsoon nga gikan sa Bacolor, Pampanga nga kapin pa lang sa 30 anyos ang ilang mga pangedaron apan dako na kaayo ang gipasiugdahan nga proyekto.
Ang tulo ka magsoon mao sila si Raymond, Robert, ug Brian Chua nga namuhi og 80,000 ka quail breeders. Ang buot ipasabot, ang ilang binuhi ilang gipaitlog ug gipapiso ang mga itlog. Nasayod ba mo kon pila ka piso ang ilang gipugad matag adlaw?
Moabot og 20,000 ka piso ang produksiyon nila matag adlaw. Apan 10,000 lang ang mapahimuslan nila niining maong gidaghanon. Mao kini ang mga bayeng piso nga gibaligya nila og P7 ang matag usa ka day-old nga piso nga baye. Ang 10,000 ka laki gilabay na lang o kaha kuhaon sa ubang tawo aron lutoon ug ipakaon sa ubang hayop sama sa baboy.
Dako kaayo ang ilang negosyo ug dako kaayo ug kapuslanan. Dili problema ang handosan nila sa piso. Kamatuoran, kon gusto ninyong mag-order karon, sa Disyembre pa kini makuha. Ingon kadugay ang pagpaabot. Daghan kuno ang namuhi og buntog sa Nueva Ecija, Tarlac ug Pampanga nga gisuplayan nilag piso.
Dili lang kay sa piso sila mingkita. Sila usab ang nagsuplay og lawog nga nagbaton og taas nga protina. Ug sila usab ang mopalit sa itlog sa buntog niadtong mga mamuhiay sa ilang gisuplay nga piso. Siyempre, aduna usay kita sa ilang gibaligya nga lawog ug sa mga itlog nga ilang gikompra. Kasagaran nga anaa sa 500,000 ka itlog ang ilang angkaton kada adlaw gikan sa mga mamuhiay og buntog ug ila ning mabaligya ang tanan. Makapahimuot, di ba?
Nahimamat namo ang magsoon sa Agribiz Kapihan niadtong Oktubre 13 sa Harbest Events Center sa Taytay, Rizal.
MAGTIAYONG TAGA ZAMBALES – Lahi usab ang magtiayong nahimamat namo sa Agrilink Trade Show kaniadtong Oktubre 4, 2018. Sila mao si Gilbert ug Rachel Bugia nga tagiya sa NW Farm sa Palauig, Zambales. Kanhi OFW si Gilbert ug ang iyang kapikas usab kawani sa usa ka broadcasting company sa Dakbayan sa Quezon.
Niadtong 2015, nakahunahuna sila pagluwat sa ilang isigkatrabaho aron mapalambo ang ilang walo ka ektaryang umahan sa Palauig. Ug unsa man sab ang gibuhi nila? Namuhi sila karon og 500 ka baka ug 2,000 ka kanding. Ang ilang umahan giisip nga sub-farm sa usa ka dakong kompaniya nga nagpabaton nila og mga baka ug kanding. Ang mother company mao ang DV Boer International nga adunay 85 ka sub-farm sa lainlaing suok sa nasod.
Paanakay nga baka ang giatiman ni Gilbert. Ang uban usab ilang gipatambok aron matansahon. Gitudloan sila sa hustong pag-atiman sa mga hayop pinaagi sa mga eksperto nga nagbansaybansay nila. Ang kitaon nila mao ang bahin sa anak sa gipaanak nga baka ug kanding. Himsog ang binuhi nilang mga hayop. Ang
kadaghanan gipakaon og corn silage. Sila mismo ang naggama sa silage. Nagpatanom sila og mais sa ubang mag-uuma nga maoy tigsuplay sa ilang gam-anan og silage. Ang mga kanding gipakaon og silage tulo ka higayon tibuok adlaw ug tambogan pa og sagbot nga kinumpay.
Nasayod ba mo kon unsa kadaghan ang silage nga gipakaon nila sa mga hayop sulod sa usa ka buwan? Mokabat sa 200 toneladas!
Aduna pa kamiy nahimamat nga interesante usab. Apan sa umaabot na lang natong sinulat kay nasagipo na kita sa espasyo. —