Mata Sa Hustisya

Bisaya - - Gumalaysay - Nobela ni Oliver P. Flores

(KATAPOSANG GULA)

NAKAHUKOM si Detektib Monsour Morales nga mopauli dayon sa Cebu. Nabalaka siya sa kahimtang ni Divina Lopez Singson. Maayo gani kay nakalukat sab dayon siyag tiket sa ayroplano nga alas onse sa buntag ang flight. Samtang naghuwat siya sa oras sa pagbiyahe sa ayroplano, gitawgan niya sa selpon si Divina. Nagsigeg kiring ang selpon ni Divina apan wa gyod tubaga niini ang iyang tawag.

“C’mon!” Nakaingon sa hilom ang detektib samtang naglakaw- lakaw siya sa departure area. Gusto niyang ikasulti gyod si Divina. Pabantayon niya kini kang Sandra Galvez nga nagpakaaron- ingnon nga si Cassandra Galvez. Nagsige gihapog kiring ang selpon ni Divina. Gikulbaan na gyod si Monsour. Ngano kahang wa man makatubag si Divina? Imposibleng wa kini makadungog sa pagkiring sa selpon niini? Gisultihan na siyang daan sa babaye nga di kinaiya niini ang pag- silent sa selpon.

Misantop sa hunahuna ni Monsour ang higalang si Inspektor Homer Calderon. Sa sitwasyon nga nagkinahanglan dayon sa daling responde, ang higalang polis ang kanunay niyang mahunahunaan sa pagpangayog tabang.

Dihang nadungog ni Monsour nga cannot be reached si Divina Lopez Singson, gitawgan dayon sa detektib si Homer.

Nalipay si Monsour kay mitubag dayon ang higalang inspektor.

“Homer, nia ko ron sa airport sa Cagayan de Oro. Nagpakisusi ko bahin kang Angelo Lopez sa iyang gitrabahoan kaniadto diri sa Iligan. Patay na diay si

Cassandra Galvez. Si Sandra Galvez ang gikapuyo ni Angelo diha sa Cebu. Managkaluha sila si Cassandra ug Sandra. Gustong manimawos si Sandra kang Angelo Lopez ug sa kaliwat ani tungod sa paghikog ni Cassandra. Unya ko na isulti nimo ang uban pang detalye kay nag- apas ta sa oras. Adtoa si Divina Lopez Singson sa ilang balay kay nabutang sa peligro ang iyang kinabuhi karon. Wa nay duhaduha pa, si Sandra Galvez nga nagpakaaron- ingnon nga mao si Cassandra Galvez ang utok sa pagpatay kang Angelo Lopez.”

“Sige, moadto dayon ko, Mon. Gitawgan mo ba siya aron makabantay sa lagmit daotang buhaton kaniya anang giingon mong Sandra Galvez?”

“Gitawgan ko karon si Divina pero nagsige lag kiring ang iyang selpon. Way tubag gikan kaniya.”

Nakaginhawa og luag si Monsour Morales human sa ilang panagsulti ni Inspektor Homer Calderon sa selpon. Dako ang iyang pagsalig sa higalang polis.

Wa mahimutang si Monsour sa iyang gilingkoran sa sulod sa ayroplano nga bag- o pa lang nga milupad paingon sa Cebu. Gusto niyang kontakon si Inspektor Homer Calderon apan di niya kini mahimo kay gidili sa mga pasahero ang paggamit og selpon samtang nagbiyahe sa kawanangan ang gisakyang ayroplano.

Dihang nahiabot na ang ayroplano sa Cebu ug naka- landing na sa airport ug nakakanaog na ang mga pasahero, nagdaling mitawag si Monsour sa higalang polis. Nakatubag dayon kini kaniya. “Nia ka na sa Cebu, Mon?” Nasabtan sa detektib sa tingog ni Inspektor Calderon nga dunay problema.

“Mao pay pagsulod nako sa arrival area, Homer. Unsay nahitabo diha sa balay ni Divina? Komosta siya? Gibantayan ba ninyo si Sandra Galvez nga di makaikyas?”

“Dia mi sa gawas sa balay ni Divina Lopez Singson, Mon. Tua sa sulod si Sandra Galvez. Iyang gi- hostage si Divina.” “Ha? Sige, moanha dayon ko.” Misakay dayon og taksi si Monsour Morales ug nagpahatod sa dapit nga nahimutangan sa balay ni Divina Lopez Singson. Pagkanaog niya sa taksi, misenyas kaniya si Inspektor Homer Calderon sa pagpaduol. Daghang polis sa gawas sa balay ni Divina. Diha say mga press people.

“Mosulod ko, Homer,” sugyot ni Monsour Morales dihang nagkaestorya na sila si Inspektor Calderon. “Delikado, Mon.” “Anad na ko aning sitwasyona, Homer. Aside from that, gusto kong masulbad ang tanghaga sa kamatayon ni Angelo Lopez kay dako ang pagsalig ni Divina nako nga ako gyod kining mahimo.”

Gipaundayonan ni Inspektor Calderon ang detektib. Wa i- lock ang pultahan sa kosina. Dali rang nakasulod si Monsour. Diha gihapon sa iyang hawak ang iyang kalibre .45. Wa niya kupti. Makigsulti siya kang Sandra Galvez nga way armas nga makita niini nga iyang gikuptan aron pagkombensir niini nga moampo na lang. Iyang nakita ang katabang ni Divina sa sala nga gigapos ang mga kamot ug mga tiil, ug gibaatan og masking tape ang baba. Gibadbaran sa detektib sa gapos ang katabang, gikuha usab ang masking tape sa baba niini. Unya gipagawas niya ang katabang sa balay human niya masayri gikan niini nga tua sa kuwarto ni Divina sa itaas sila si Sandra Galvez.

Kalma nga misaka si Monsour. Unya nanuktok siya sa pultahan. Di siya mosulod og diretso kay basig makalitan si Sandra Galvez ug pusilon dayon siya niini. Nagtuo siya nga dunay armas ang babaye sa pag- hostage kang Divina. Human manuktok, hinay nga giablihan sa detektib ang pultahan.

Mibantang sa panan- aw ni Monsour si Sandra Galvez nga nagtion sa gikuptan niyang pistola kang Divina nga ginapos ang mga kamot ug mga tiil ug gibaatan ang baba sa masking tape samtang naglingkod sa taliwala sa kama. Nagpurong og malong nga binuwakag pula si Sandra Galvez.

“Maayo kay nia ka, Monsour Morales. Kamong duha si Divina ang akong patyon karon!”

Nasabtan ni Monsour nga naulipon sa kasilag si Sandra Galvez. Nagpabilin siyang mabugnawon ug kalmado samtang nagtindog layo sa babaye.

“Sandra Galvez, nailhan na tika. Didto ko gikan sa Iligan. Ayaw dugangi ang imong mga sala. Ampo sa balaod nga malinawon. Isaad nako nga tabangan tika nga mamenosan ang silot nga ipahamtang nimo.”

“Dili! Patyon ko si Divina aron mahingpit ang akong pagpanimawos kang Angelo! Oo, ako ang nagpatay niya sa hotel. Gihago ko siya pag- ayo sa romansa hangtod nga nakatulog. Ug diha ko na siya pusila. Karon, Detektib Monsour Morales, kamong duha ang isunod ko pagpatay kang Angelo Lopez nga maoy hinungdan sa paghikog sa akong kaluha!”

Nasabtan ni Monsour nga pusilon gyod ni Sandra si Divina. Apan nakapangandam na siya sa ingon niining kahimtang. Dali niyang gilanit gikan sa iyang hawak ang iyang service pistol ug gipusil dayon si Sandra. Usa ra ka bala ang mitama sa babaye apan sa ulo kini naigo. Nahagsa si Sandra sa salog nga wa nay kinabuhi.

Daling gibadbaran ni Monsour sa gapos si Divina, ug gitangtang ang masking tape nga gibaat sa baba niini. Naghilak si Divina nga migakos sa detektib.

“Salamat, Mon, sa pagluwas mo nako. Karon, nahatagan nag hustisya si Angelo. Kawa’ ko magtuo nga maingon ani ang linugdangan sa tanan.”

“Oo, Div. Isulti ko nimo unya ang tanan bahin kang Sandra Galvez ug Cassandra Galvez.”

Unya nahiabot si Inspektor Homer Calderon kuyog sa pipila niya ka sakop. Gilamano sa inspektor si Monsour tungod sa laing kalamposan na usab sa pagsulbad sa kasong pagpatay nga iyang gikuptan. “Congratulations, Mon.” “Salamat, Homer. Daghan kog isulti nimo bahin sa managkaluhang Galvez.”

Sa pagpanglabay sa mga adlaw, nalimpiyohan ang ngalan ni Donna Lopez. Nakahukom si Monsour Morales nga pakaslan na si Malou Sayson aron hingpit siyang makalingkawas sa mga pagtental ni Donna kaniya.

“Thanks to Donna, Mon. Kon wa pa siya moabot sa imong kinabuhi, di unta ko nimo pakaslan.”

Paraygon kaayo ang tingog ni Malou samtang gibaswat siya ni Monsour Morales paingon sa kuwarto sa hotel nga ilang gisak- an. Unang gabii karon sa ilang kaminyoon.

(KATAPOSAN)

Gikaatubang ra ni Monsour Morales ang mamumuno ni Angelo Lopez…

“Maayo kay nia ka, Monsour Morales. Kamong duha si Divina ang akong patyon karon!”

Newspapers in Cebuano

Newspapers from Philippines

© PressReader. All rights reserved.