Binay: ‘Age of consent’ sa pagpakighilawas patas-an ngadto sa 16 anyos

GIDUSO na sa Senado ang balaorong itaas ngadto sa 16 ang edad sa gitawag og “age of consent” sa pagpakighilawas gikan sa 12 nga pangedaron.

Sa Senate Bill 1895 nga giendorso ni Senadora Nancy Binay, gilatid niini nga ang Pilipinas adunay labing ubos nga age of consent mao nga dili matawag nga statutory rape ang gikataho nga paglugos sa usa ka polis sa anak sa usa ka drug suspect.

Matod ni Binay, gigamit sa uban ang ubos nga age of concent aron paglingkawas sa mas taas nga silot.

Nagtuo si Binay nga kon patas-an ang age of consent labi pang makunhoran ang pagpangabuso sa mga babayeng menor de edad.

Samtang gikondenar ni kanhi Solicitor General Florin Hilbay ang kagamhanan sa giingon nga pagsuporta niini sa daotang binuhatan sa ubang polis nga ming-abusar sa ilang gahom.

“Sa ginagawang paghikayat ng pamahalaan na gumawa ng karahasan, ngayon wala nang takot ang ilan nating pulis na pumatay, manghuli, labagin ang batas at manggahasa,” pahayag ni Hilbay.

Nagtuo sab si Hilbay nga labi pang magmatngon si Presidente Rodrigo Duterte sa pagluwat og pamahayag nga mahimong mosangpot sa pagpanamastamas ug pag-abuso sa gahom partikular na sa kapolisan.

Dugang pa gayod ni Hilbay nga kinahanglang adunay higpit nga imbestigasyon bahin sa kaso sa mga polis nga giingong nanglugos aron kahatagan og hustisya ang mga biktima.—