Ang Lalaking Absalon

Ayaw estimaha ang tawo sa iyang porma. Usahay, may taras kini nga makapaukyab sab diay…

Bisaya - - Sugilagming - Ni BERNITO A. DALIT Cagayan de Oro City

USA ka buntag niana sa tindahan ni Nang Terya, nag- inom na sab ang lima ka batan- ong bugoy nga sila si Mando, Crispin, Lito, Osting ug Gary. Wala silay laing gihisgotan mao ra gyod ang pagpanghilabot sa bag- o nilang silingan nga usa pod ka batan- on nga si Coco nga matod nila usa ka absalon kay dili kuno makamaong manguyab.

“Matay bitaw, Bay, akoy gianugnan sa pagka lalaki anang Coco kay hangtod karon walay uyab, absalon kaayo!” ni Mando human makayarok sa ilimnong makahubog nga gitagay kaniya ni Crispin.

“Ambot bitaw nga guwapo man unta nang tawhana, gamay lang gyod untang espeking sa babaye, Bay, makauyab man gyod unta na siya,” dason usab ni Lito.

“Kon ikaw lagi ang pasultihon kay dukirok ka mag babaye. Pero sa kang Coco, lisod na niyang mabuhat kay

di man to makaingon kay absalon baya!” tingsi usab ni Osting.

“Dili kaha na bayot, Bay? Sa kadugay na nato dinhing dapita wa man gyod ta makadungog nga nakauyab na siya. Sa akong tan- aw, morag mabasa lang nang iya kon maligo,” sagbat usab ni Crispin nga midawat na sab sa baso nga gitunol.

“Dili sab tingali, Bay, kay wa man sab ta makakita niya nga namayot,” bahakhak nga pamahayag ni Gary nga maoy labing balbahutog kanilang lima.

Si Nang Terya nga gialingugngogan sa lima ka bugalbugalon, misagbat og kalit. “Hoy! Kamong lima ba, mga bugalbugalon kaayo mo! Hilabtanon kaayo mo sa tawong wala manghilabot ninyo. Mayra bag nagsunodsunod mo sa tanan niyang lakaw! Tigmal bitaw mo kon makapaburos na si Coco og mga babaye dinhi sa ato! Layo ra baya mog hitsura anang bataa kon mao nay mamostura!” badlong ni Nang Terya sa lima nga nanglakaw ra sab dayon human nilag tagay sa ilimnong makahubog.

Ingon niini ang hulagway sa tindahan ni Nang Terya. Sa higayon nga magkaabot na gani ang lima ka managbarkada, wa gyod silay laing hisgotan: ang pagka absalon ra gyod ni Coco.

Samtang si Coco, sa pikas bahin, gipalapos lamang sa pikas dunggan ang tanang biaybiay nga iyang nabati. Wala siya magpaapekto. Seryoso siya sa iyang trabaho isip construction worker sa dakong bilding nga gipanag- iya sa usa ka negosyanteng Insek sa ilang dapit.

Nagpanuigon na si Coco og 25 anyos, dili layo sa pangedaron sa lima. Husto og barog si Coco. Ambongan ug bus- ok ang lawas. Walay nakaila sa iyang kagikan kay kalit man lang ning miabot dinhi sa ilang dapit ni Nang Terya sa Barangay Kauswagan.

Hilomon si Coco. Sa higayon nga makasuroy ang ulitawo sa iyang tindahan aron sa pagpamalit sa mga kinahanglanon niini, kumpasan usab ni Nang Terya ang pagpakisayod sa iyang kinabuhi apan wa siya molampos. Pirme siyang mapakyas. Ang gitug- an ni Coco kang Nang Terya mao ra gyod ang kagamay kuno sa iyang suweldo sa agalon niyang Insek ug ang kakulang sa mga benepisyo niini.

Usa ka hapon niana, ang upat ka batan- on nga silang Mando, Crispin, Lito, ug Osting nagkaabot na sab sa tindahan ni Nang Terya. Ming- order sila og usa ka kahon nga Red Horse kay lumsan kuno nila ang ilang kasingkasing nga napuno sa kaguol.

Nahibulong niini si Nang Terya sa taras nga gipakita sa upat. Apan wala siya magpasabot. Hilom lang siyang naminaw ug naniid niini. Pipila ka gutlo ang minglabay nasayran ni Nang Terya ang hinungdan sa paghubog sa upat. Ang ila diayng mga uyab nangaburos ug ang responsable mao si Coco.

Nasayran usab ni Nang Terya nga si Coco ila diayng giplanohang patyon tungod sa gihimo niini sa ilang uyab, Apan naulahi na sila kay pag- abot nila sa bilding ni Mr. Chan nga giestadahan ni Coco, wala na kini didto ug nasuko pa gani kuno ang Insek kay naka- cash advance kini og dakong kantidad ayha nakalayas.

Igo lamang nakapanglingo si Nang Terya sa gidangatan sa upat. Wa siya magtuo nga ang Coco nga ilang gibiaybiay makapaburos ba diayg upat.

Sa maong kahimtang, kalit lang napugwat si Nang Terya sa wala damhang pag- abot ni Gary, ang ikalima nga maoy labing bugalbugalon sa grupo. Mihilak kini nga morag bata nga giilogan og dulaan.

“Bay, hu- hu- hu, tabangi ko ninyo! Pangitaon nato si Coco!” ni Gary nga nagtiyabaw.

“Ha!? Kay ngano, naunsa man pod ka?” Hapit magkadungan pagtubag ang upat kang Gary.

“Animal nga Coco! Ang akong pangasaw- onon nga si Cora, gidagit! Gitaban sa panuway nga Coco, abi man nakog bayot tong tawhana, lawom man diayg dulot,” tubag usab ni Gary ngadto sa upat niya ka barkada.

“Kay parehas man bitaw ta. Ang amo pong mga uyab gibirahan sa hangal! sumbalik- tubag usab ni Crispin.

“Mayna lang ang inyo kay naa ra man na!” tubag usab ni Gary. Ang ako gyod, wala na! Giayo- ayo na tingali tog dulog karon sa panghak.”

Si Nang Terya nga naniid lang sa sulod sa iyang tindahan wala makapugong sa gibating kahimuot. Imbes nga maluoy siya sa lima, nakatuaw sa pinugngang tingog: mirisi!

(KATAPOSAN) pa

Sa maong kahimtang, kalit lang napugwat si Nang Terya sa wala damhang pag-abot ni Gary, ang ikalima nga maoy labing bugalbugalon sa grupo…

Newspapers in Cebuano

Newspapers from Philippines

© PressReader. All rights reserved.