drug money mokatap sa 2019 elections

Bisaya - - Kilat -

NAGTUO si Presidente Rodrigo Duterte nga bisan pa man sa kahigpit sa iyang kampanya batok sa ginadiling droga, mosiaw lang gihapon ang drug money sa umaabot nga eleksiyon sa Mayo 2019.

“Tingnan mo ngayong eleksyon, makita ninyo ‘yan. Drug money will play dito,” matod ni Duterte atol sa gipahigayon nga lecture on illegal drugs sa Cabinet dili pa lang dugay didto sa Malacañang.

Apan dili sab molunga ang gobyerno aron masumpo gayod ang illegal drugs sa nasod ug gamiton sa kagamhanan ang tanang assets niini sa pagpakigbatok sa ginadiling droga.

Samtang gusto sab sa Department of the Interior and Local Government nga madiskalipika sa eleksiyon ang mga kandidatong nangalambigit sa illegal drugs.

Gihisgotan ug gisaway usab ni Duterte ang pamilyang Parojinog sa Ozamiz City nga nalambigit sa illegal drugs.

“Kita mo hanggang ngayon itong naiwan na mga kapatid, mga relatives ni Parojinog, pinapatay pa pati judge. Talagang tarantado ang mga p—ina,” dugang pa sa presidente.

Nalakbitan sab ni Duterte sa illegal drug trade si Ozamiz Mayor Reynaldo Parojinog Sr. kinsa napatay sa gipahigayong pagronda sa kapolisan sa pinuy-anan niini.

Kahinumdoman nga nadakpan sab ang anak sa mayor kinsa mao ra sab ang iyang bise mayor nga si Nova Princess Parojinog ug ang lain pa gyod niyang anak nga si Reynaldo Parojinog Jr.

Ang naghupot sa ilang mga kaso napatay pod kaniadtong Oktubre 8 apan gipanghimakak sa mga Parojinog nga may kalabotan sila sa pagkamatay sa huwes.

Gipaneguro ni Duterte nga makapagawas siya og memorandum circular aron pagtibuok og national anti-illegal drug task force.

Ang motibuok sa task force naggikan sa Philippine National Police, Armed Forces of the Philippines, Bureau of Customs, Philippine Coast Guard ug uban pang government agencies.

Newspapers in Cebuano

Newspapers from Philippines

© PressReader. All rights reserved.