Bag-o na ang Tambayanan

Bisaya - - Kilat -

(tubag sa “Estambay Pagbalik”) Lahi na lagi ang dagway sa kaniadto akong tambayanan. Ang mga mata nga kaniadto dali ra mapuling, karon dili na kahibalo unsay dagayday sa tubig. Ang baba nga kaniadto maghagok, karon usa na ka miulbo nga bulkan. Ug wala na nako malilii ang akong kaugalingon diha kanimo. Ang tagsa-tagsa nimong mga dapit, nahimong bag-ong mga talan-awon. Wala na ko sa bisan haing dapit sa imong lawas: wala sa tabuntabon sa imong mga mata, wala sa mga linya sa imong mga palad, wala sa alom sa imong aping, wala sa mga ugat sa imong utok, wala sa dugo sa imong dughan. Ug kon di gyod nako mahikaplagan ang akong kaugalingon diha kanimo, palihog, tultoli, tudloi ko pag-usab. Magbaktas ko gikan sa tumoy sa imong buhok padu’ng sa mga kuko sa imong mga tiil. Linyahan ang mga lugar diin ako nagpabilin, ug pintalan pagbalik kon nadalag man ang gipangita nakong ako diha sulod kanimo. Ug kon diha kanimo, moamag na kog maklaro, palihog, mag-ila-ila ta, ikaw ang akong bag-ong tambayanan, ug ako ang imong karaang estambay. WILFREDA CABUSAS Dakbayan sa Talisay

Newspapers in Cebuano

Newspapers from Philippines

© PressReader. All rights reserved.