DANTE LUZON: MAGSISIBYA UG DIBUHISTA

Bisaya - - Showbiztsika - Ni JOHN TAM. YBAÑEZ

(Ika-2 ug Kataposang Bahin)

SA pagtuo nga kasaligan na ang maong pangita nga gitanyag ni Sonza, nakahukom si Dante pagpakasal sa iyang hinigugmang si Leonor ‘Norie’ Ilagan niadtong 1981. Nag-edad pa siya niadtog 24 samtang ang dalaga 21. Nahimugso ang una nilang anak nga si Hector nianang pagkasunod tuig nga gisundan ni Karla sa misunod pang tuig.

Unya nakabig na usab ang pagtagad ni Dante sa telebisyon. Ang Unilever nagkinahanglan og host sa sinemana nilang pasundayag sa TV nga “Sali Kami” ug siyay gikuha sa maong trabaho. Bag-o kadtong medium alang kaniya apan nadasig ug nakauyon siya. Gidala siya sa Unilever sa Manila aron magsilbing co-host nila ni Tito, Vic ug Joey sa Superwheel Search for Singing Stars kansang grand finals didto ipahigayon sa Araneta Coliseum. Kadto ang unang higayon nga nakita siya sa national television.

Human niadto ingon sa nakalimtan na niya ang radyo hangtod nga ang University of Mindanao Broadcasting Network (UMBN) miagni kaniya pagdumala sa DxUM. Midailos ang rating sa maong sibyaanan dihang mibiya ang manedyer nga si Mike Balbin, Jr. kay mibalhin sa DySS-FM. Gidawat

niya ang hagit ug naningkamot nga mapatugbaw og balik sa kabantog ang DxUM. Apan matag Sabado mo- host, mokanta ug molingaw gihapon siya sa mga tumatan-aw sa telebisyon alang sa Sali Kami.

Apan naputol ang iyang pag-alagad sa UMBN dihang gikuha siya sa Manila Broadcasting Company sa bag-o niining FM station— ang BM-FM nga aduna lay 1k nga transmitter. Ang DxXL-FM ang No. 1 nga music station niadto sa Davao busa buot kining puhalan sa DxBM. Pero nianang pagka 1986, ang manedyer sa BM-FM, si Roland Raval, na- promote ug gipauban sa MBC Sales sa Manila ug siya si Dante ang gitudlong mohulip. Apan nagpadayon gihapon siya pag- host sa TV matag weekends.

Pagka-1987, nahunong ang Sali Kami sa Unilever human sa unom ka tuig nga pagdominar sa local television. Mibiya usab si Dante sa BM-FM sa samang tuig ug misuway pagsuong sa laing kalibotan sa pangalagad. Misulod siya pagka part time teacher sa Ateneo de Davao. Siya lamay bugtong college dropout nga nagtudlo og communication arts. Gawas niini, magkantahan usab siya sa Brian’s Steak House and Piano bar su’d sa halos usa ka tuig. Niadtong higayona ang iyang mga anak nagtungha na sa junior ug senior kindergarten.

Mibuto ang People Power 1 nga nagpalagpot sa rehimeng Marcos ug nahimong presidente si anhing Corazon ‘Cory’ Aquino. Gibuksan og balik ang ABS-CBN nga gipatakopan ni Marcos niadtong 1972. Gipabilanggo sa kanhi diktador ang tag-iya nga si Genny Lopez apan nakaikyas kini gikan sa Kampo Krame uban kang kanhi Sen. Sergio Osmeña III.

Unya giablihan og balik ang ABS-CBN Davao nianang Agosto 8, 1988 ug gitanyagan siyang mohost sa sinemanang TV show nga “Wow Bigat”. Giawdisyon siya sa local TV Patrol ug nahimong main anchor. Nakadayeg ang iyang mga amo sa gipakita niyang trabaho hinungdang gipadala siya sa Sugbo pagka 1989. Giabi-abi siya sa mga Sugboanon ug nahimong main anchor usab sa TV Patrol ug matag Sabado siyay mag- host sa Campus Beat.

Paglabay sa unom ka buwan, gidala ni Dante ang iyang pamilya sa Sugbo. Pagka-1992 gitanyagan siya sa ilang kadagkoan nga mouban sa ABS-CBN Manila. Makapaengganyo ang maong tanyag apan lisod kabiyaan ang iyang banay ug ang pagdala niini sa Manila dakong risgo. Iyang gitimbang-timbang ang tanan ug maoy gipili ang pagpabilin sa Sugbo nga giisip na niyang ‘panggubatan’.

Nianang pagka 2006, buwan sa Septiyembre, miduso siyag hangyo sa management sa ABS-CBN alang sa early retirement sa edad nga 49. Buot niyang motutok sa laing lihokon nga hawa sa presyur. Tuod man, naaprobahan ang sayo niyang pagretiro sugod sa Enero 16, 2007. Gani, ang iyang mga kauban minghatag man kaniyag ‘ tribute on- the- air’ ug ‘ farewell party’. Human sa 17 ka tuig nga pagserbisyo, hingpit nga gitalikdan ni Dante Luzon ang ABS-CBN.

Apan wala kaayo magdugay ang pagpahuway ni Dante kay gikuha man siya sa Cebu Catholic Television Network (CCTN) alang sa operation ug programming. Maisip nga ‘ all around’ ang iyang trabaho sanglit apil man siya sa tanang ‘onthe-air operation’ sama sa anchoring, hosting, directing, singing, acting ug editing. Paglabay sa pito ka tuig, nakahukom na usab siya nga mobiya kay para niya, igo na ang napakita niyang katakos.

Gibubo niya ang iyang panahon sa pagdibuho su’d sa duha ka buwan hangtod nga gikuha siya sa DyRC Aksyon Radyo

Cebu ubos sa Manila Broadcasting Company. Dinhi nagkahimamat kami ni Dante kay gikuha man usab kining tagsulat sa maong sibyaanan pinaagi kang Ramil Paican alang sa news writing.

Nagtuo si Dante nga mao nay kataposan niyang kalibotan ang DyRC apan naunsa bang kalit man usab kining mitibugsok (kay wala mamaayo pagdumala) hinungdang nakahukom siya pagbiya. Ug karon, anaa na usab siya magyampungad sa MyTV, usa ka lokal nga kompaniya sa telebisyon nga makita sa Skycable.

Gawas sa iyang pag-alagad sa MyTV, nagpadayon usab si Dante sa iyang alampat sa pagdibuho gamit ang brutsa. Gani, sumala pa niya, una gyod niyang gugma ang painting. Nagsugod-sugod siya pagdrowing sa edad nga 5 ngadto sa 6 anyos. Gani, buot unta siyang mokuhag Fine Arts sa kolehiyo apan gibugnaw siya sa iyang amahan kay giingong dili makabuhi og pamilya ang maong kurso.

Nahimugso si Dante sa mga ginikanang Vicente ug Isabel Luzon sa Butuan City niadtong Marso 13, 1957 apan sa pag-edad niyag 9 namalhin sila sa Davao tungod sa trabaho sa iyang amahan sa logging company.—

Mga mugna sa alampat ni Dante.

Lain pang sampol sa obra ni Dante.

Pipila ka obra ni Dante nga gieksibit sa usa ka mol.

Ang magtiayong Dante ug Norie Luzon sa dapit diin giladlad ang mga produkto sa dibuhista ug magsisibya.

Newspapers in Cebuano

Newspapers from Philippines

© PressReader. All rights reserved.