UNITY JAM FOR NAGA, MALAMPOSONG GIPAHIGAYON SA INABANGA, BOHOL

Bisaya - - Showbiztsika - Ni NEMESIO B. SINANGOTE Inabanga, Bohol

DILI mahubit sa pulong ang gibati sa matag usang mingsaksi ug mingsadsad dihang nagbagat sa unang higayon ang 14 ka banda sa Bohol nga pulos sakop sa grupong BKM kun Bol-anong Kompositor ug Musikero alang sa gikahinamang Unity Jam For Naga nga gipahigayon didto sa Inabanga Cultural Center niadtong Oktubre 20 ning tuiga. Ang maong kalihokan gipasiugdahan sa mga sakop mismo sa BKM ug nahimong posible dihang giayudahan kini sa nagdilaab nga moral ug pinansiyal nga suporta gikan sa Inabanga LGU pinangulohan ni Hon. Mayor Roygie Jumamoy ug sa iyang anak-lalaki nga numero unong kagawad ug kanhi mayor usab sa Inabanga nga si Kagawad Jono Jumamoy.

Wala gyod makawang ang mga paningkamot sa tanang naghago kay nahimong malamposon ang kalihokan bisan pa man nga sa sayong gabii gihudlat kini sa nagpungasi nga bunok sa uwan. Puwerte gyong lingawa sa tanan. Hapit na gani way laming ipauli sa balay. Kinsa man lagiy ganahang mopauli nga bisan si Kagawad Jono Jumamoy kuyog si Bise-Mayor Ronnie Jumamoy ug kaubanang opisyales sa Lungsod sa Inabanga wa man gyod mobiya hangtod wa mahuman ang kataposang tugtog sa konsiyerto. Gumikan sa ilang maunongong presensiya, nahurot gyod ang belib sa tanang mingtokar nga banda ug sa tanang mga tawo nga mingtambong sa kalihokan.

Tumong sa maong konsiyerto nga makatigom og relief goods aron ikahinabang sa nangabiktimang mga Nagahanon nga nanagsubo gumikan sa usa ka wa damhang trahedya nga mikalas og dul-an sa usa ka gatos ka kinabuhi wa pay labot sa wala na igkita kay natabonan sa yuta. Kahinumdoman nga usa ka dakong landslide ang nahitabo didto sa Brgy. Tinaan, Dakbayan sa Naga, Sugbo sa sayong kabuntagon niadtong Septiyembre 20 ning tuiga

diin ang midahiling bungtod nga mipakurat sa wa kaandam nga mga mulupyo mitamok ug mitabon sa mga balay ug kabtangan sa tibuok Sityo Sindulan sa maong barangay.

Sa sinugdanan, hisgot-hisgot ra gyod unta to sa mga sakop sa BKM kon unsay angay mahimo nga makatampo og gamayng tabang alang sa mga biktima sa trahedya sa Naga kay usa sa mga membro sa BKM nga si Fire Officer 01 Harry Villanil (kompositor ug lead guitarist sa bandang Broken String) kinsa usas gi- deploy sa BFP kun Bureau of Fire Protection ngadto sa Naga alang sa rescue operation nakasaksi man kon unsa kalisod ang kahimtang sa mga biktima nga nanginahanglan gyod og ayuda. Laing sakop sa BKM nga nakasud-ong sa pag-antos sa mga biktima sa katalagman mao ang batanong negosyanteng si Cha Avenido Pobar (kompositor ug bassist sa bandang Retro View ug anak sa kasamtangang unang babaye nga presidente sa Bohol Island State University nga si Dr. Regucivilla B. Avenido-Pobar) nga membro usab sa mountaineering group nga Pack Boy Adventures nga nagbase sa Dakbayan sa Sugbo. Si Cha daan nang hilom nga nagbalik-balik paghatod og mga hinabang ngadto sa mga biktima sa Naga.

Sa ngadto-ngadto, nagkasabot ang mga

sakop sa BKM nga magtampohay na lang og ginagmayng kantidad nga ibayad sa sound system nga gamiton sa giplanong unity jam. Pero ang problema mao kon asa og tukmang venue nga adto ipahigayon ang concert for a cause. Gawas pa sad, kuwang gihapon ang nakolektang pundo sa mga sakop sa BKM aron matigayon gyod ang plano. Hangtod nga miabot sa punto nga nagkasabot ang tanan nga suwayag duol ang halangdong inahan sa Lungsod sa Inabanga nga si Hon. Mayor Roygie Jumamoy.

Ug gibuligan gyod sa panahon ang maong maayong tinguha. Kay usa ka gabii niana, samtang ako ug si Cha maoy duha sa upat ka maghuhukom sa gipahigayong battle of the bands didto sa gamayng pista sa Sityo Cauway, sakop sa Brgy. Bugang, Inabanga, wa damhang nahibalag namo si Mayor Roygie didto sa balay sa maabi-abihong kapitan sa Bugang nga si Kap. Boy Gudes. Ug wa na namo palabya ang higayon. Bisag medyo uwaw baya gamay pero (ah, bahala na, hehe…) dihadiha gisuginlan namong duha ni Cha si Mayor Roygie kabahin sa giplano sa BKM nga concert for a cause alang sa Naga. Ug ang inahanong tubag ni Mayor Roygie maoy nagdangilag nga ipadayon namo ang plano. Gani, bisan didto taliwala sa gamayng hawanan diin gipahigayon ang tigi sa mga banda agig pagsaulog sa pista sa Sityo Cauway, personal gyod kong gitawag niya ug niduol kos lamesa ni Mayor Roygie

aron pagpiho sa maong plano. Unya kay banha man lagi adtong tungora gumikan sa padayong tokar sa mingsalmot nga mga banda, giingnan mi sa halangdong mayora nga paadtoon na lang mi sa iyang opisina sa munisipyo bisan unsang orasa aron mahisgotag maayo ang giplanong kalihokan.

Ug pila ray estorya, gawas nga gitugotan ni Mayor Roygie Jumamoy nga gamitong libre ang Inabanga Cultural Center, mipuno pa gyod siyag hatag og dako kaayong kantidad sa salapi aron idugang sa pundo sa BKM pagbayad sa mas de kalidad nga sound system nga gamiton sa maong concert for a cause. Ug dugang pa gyod niini, mitabang usab ang LGU-Team Inabanga agig sanong sa mando sa halangdong inahan sa lungsod pag- promote sa unity jam pinaagi sa pagbalik-balik og post niini sa social media diha sa official Facebook page sa Municipality of Inabanga nga may dul-an sa 40 mil ka Bol-anong followers dinhi sa nasod ug lakip na ngadto sa nagkalainlaing suok sa kalibotan.

Atol sa gabii sa konsiyerto, nag-ulhosay pagpakita sa ilang talento sa pagtokar kining mosunod nga mga Bol-anong banda:

1.) Wild Grass; 2.) Jump n’ Shout; 3.) Magtutudlo; 4.) The Frabs; 5.) Frostburn 2.0; 6.) Tongues of Fire; 7.) Broken String; 8.) Silence Please; 9.) 6Peers; 10.) Thumbtackz; 11.) Apos Tuhod feat. Drexlyn; 12.) Vedrocks; 13.) Inabanga River Band (IRB); 14.) Men In Uniform.

Unya samtang nagpadayon pagtugtog ang mga banda sulod sa cultural center, nagpadayon usab didto sa may entrance area ang mga boluntaryo sa Pack Boy Adventures pagpanawat sa mga donasyong maoy nagsilbing tiket aron makasulod ang buot motan-aw sa konsiyerto. May 20 pesos usab nga dugang admission fee nga iyawat ikapuno-puno sa kita adtong gabhiona. Lakip sa donasyong gipangdawat mao ang mga de lata o canned goods, noodles, hygiene kits ( napkin, diapers, toothbrush, toothpaste, sabon, shampoo, deodorants), kape, gatas, binotelyang tubig, school bags, sapatos ug tsinelas.

Sa tunga-tunga sa konsiyerto, misal-ot pagpalanog sa iyang hamubo apan undanon nga pakigpulong si Kagawad Jono Jumamoy nga mas nakapadasig pa sa tanang banda ug mga tawo nga mingtambong sa kalihokan.

Unya gitapos ang pagtugtog sa gabii pinaagi sa pag-awit sa tanang mga banda ala “We Are The World” sa mass song nga “Bol-anon” nga gitagik ni Pareng Boy Aparici sa IRB. Ang kantang “Bol-anon” sa IRB maoy bag-ong mananaog nga People’s Choice Award sa Radio Cebu TV— ang bag-ong online radio ug telebisyon nga madungog ug makita karon sa bisan asang suok sa kalibotan.

Human sa konsiyerto, nagsumada dihadiha dayon ang mga sakop sa BKM sa wala pa mamauli sa tagsa-tagsa ka panimalay. Ug didto nakita nga gawas sa makabaguod nga mga donasyong relief goods nga nakolekta, may limpiyo pa gyong salaping cash nga kapin sa 10 mil pesos nga gihurot gihapog palit og dugang goods pinaagi sa Pack Boy Adventures volunteers diin sila na mismo ang minghatod niini didto sa nanagbangotan nga mga Nagahanon.

Sa makausa pa, sa ngalan sa tibuok hugpong sa BKM kun Bol-anong Kompositor ug Musikero, kining tagsulat moingon nga salamat sa tanang mga Sano ug Sana kinsa kinasingkasing nga mingdonar ug mingsuporta atol adtong Unity Jam For Naga didto sa Inabanga. Ug ilabi na gyod sa Inabanga LGU nga gipangulohan sa inahanong paggiya ni Hon. Mayor Roygie Jumamoy inabagan sa konseho nga gipangunahan ni Kagawad Jono Jumamoy.

Daghan kaajong salamat ninjong tanan!—

Ang mga membro sa BKM ug Pack Boy Adventures ibabaw sa stage tapos sa unity jam!

Si Kagawad Jono Jumamoy (nagtindog sa luyo, ikalima gikan sa wala) ug Bise Mayor Ronie Jumamoy (nagtindog, ikaupat gikan sa tuo) kuyog ang ubang opisyales sa lungsod sa Inabanga kauban ang mga sakop sa BKM samtang sa luyo padayong mitokar ang bandang IRB.

Ang poster sa konsiyerto.

Rakrakan uban sa bandang Apos Tuhod!

Mainitong giabiabi sulod sa buhatan ni Inabanga Mayor Roygie Jumamoy (tunga) ug Kagawad Jono Jumamoy (ikatulo gikan sa wala) ang mga sakop sa BKM nga sila si (gikan sa wala) Boyax Aparici, Jeeryl Logroño, Alfie Añana, FO1 Harry Villanil ug SPO1 Meshielo Vedra. Giplansa ning maong tigom ang plano sa pagpahigayon sa Unity Jam For Naga.

Si Cha Pobar (nag-shade) malipayong mihatod sa mga hinabang didto sa Naga.

Ang mga sakop sa BKM nga nagsumada sa kita human sa concert for a cause.

Newspapers in Cebuano

Newspapers from Philippines

© PressReader. All rights reserved.