sugilagming BITIK

Bisaya - - Showbiztsika - Ni RENATO S. PONO Mantuyong, Mandaue City, Cebu

SILINGAN ni Sol si Avel, usa ka edaran nga ulitawo nga buotan ug matinabangon. Si Avel maoy ilang madali-dali kon naay problema sa ilang kuryente ug sa tubig.

Kadaghan na mahitabo nga nag-agas ang ilang tubig nga may leak sa tubo nga gitaya. Way kalibotan si Sol nga nagtuyok diay ang ilang metrohan. Nahingangha na lang si Sol sa kadako sa ilang bill sa tubig nianang bulana. Si Avel maoy kanunayng makaalinggat nga nagtuyok ang ilang metrohan bisan wa gamita. Maayo lagi

kon kanunay moadto si Avel sa merkado nga mahilabay gyod sa ilang Sol. Usahay, naa sa coupling nga molusot ug moagas ang tubig. Tingalig kulang ba sa hugot sa pagsumpay hinungdan nga morag molugak ug mosirit ang tubig.

Sukad nga diha na si Avel nga maoy tig-asikaso sa mga koneksiyon sa ilang tubig, nakaginhawag maayo si Sol sa problema. Gamay na lang ilang bayranan matag bulan.

Sa ila usab nga kuryente, si Avel pod ang nag- maintain niini kay mahadlok si Sol nga makuryentehan busa dili gayod manghilabot si Sol. Dihay hapon nga wa niya masakpi si Avel, nag-antos lang si Sol ug ang iyang anak sa kangiob ug kangitngit kay wa mosiga ang ilang suga.

Sa edad nga katloan ug duha, si Sol bigot kaayong tanawon maglakaw. Walay makapugong sa iyang pagpaseksi ilabi na kay biyuda na siya. Sayong namatay si Berto nga iyang bana. Bisan unsay iyang isul-ob, angayan gayod siya. Daghan ang mibati og kaibog sa biyuda. Naay mga batan-on, mga biyudo ug mga hamtong nga naninguha sa biyuda. Apan pulos nagpalayo kang Sol kay di man ganahan ang biyuda makig-atubang kanila.

Si Avel, sa hilom may pagtan-aw sa biyuda. Apan sobra kahilom ug maulawon nga moatubang kang Sol. Maayo gani kay daghan siyag kamaohan nga buhat, busa naduol siya sa dughan sa biyuda. Siya maoy madali-dali kanunay unya dili pa gayod mobungat og pilay bayad sa gipabuhat sa biyuda.

“Sa sunod na lang, Sol, kay gamay ra man,” maoy sagad niyang itubag. Apan iluklok gayod ni Sol sa bolsa ni Avel ang bayad ayawat naa siyay mapalit. Hinuon, di man siya manigarilyo. Dili moinom og ilimnong makahubog ug dili sad manugal.

Adlawng Domingo, nahisabay si Avel sa ilang Sol. Gikamay ug gitawag kini ni Sol. “Vel, dali ra god, Dong, kay naa koy ihangyo nimo apan ayaw gyod kog balibari, ha! Manuyo gyod ko nimo, Vel.” “Unsa diay na, Sol?” sa ulitawo. “Ang akong katabang,” sugod sa batan-ong biyuda, “mipauli lagi kay nasakit ang iyang tatay. Mobalik ra kuno to siya inigkaarang-arang na sa iyang amahan. Lima ka libo ang akong isuweldo nimo kada bulan. Okey ka ana, Dong Vel?”

“Di gyod ko kabalibad nimo, Sol. Apan dako ra man ang lima ka libo.”

“Sa akong katabang, Vel, upat ra ka libo. Apan lahi ra siya nimo nga bisan unsay akong ipabuhat mahimo man nimo sa tumang kasayon. Maka- save pa gani ko nimo! Hunahunaa ra nga di na ko nimo makahatag og dunay diperensiya sa kuryente ug tubig!”

“Sige, ugma lang sa buntag, Sol, kay andamon ko pa ang akong mga gamit.”

Tuod man, sayo sa buntag, diha na si Avel sa balay ni Sol. Gipainit siyag tubig ni Sol ug nangape silang duha nga giparesan og sandwich. Si Orlie nga anak ni Sol giandaman na ni Avel og kinutaw nga gatas.

“Bahala nag wa kay mabuhat dinhi sa balay, Vel, basta unaha gyod ang bata, ha! Ug unsa may imong buhaton ipaulahi lang na. Makabuhat ka basta naa ko nga mobantay sa bata. Pagtan-aw lang sa ref og unsay gusto mong lutoon. Ari na ko, Vel.” Nagdaling migawas sa gate si Sol nga mipaingon na sa iyang gitrabahoan nga call center.

Usa ka adlaw niana nga way trabaho, nanghagpat si Sol sa iyang bulingong mga sinina ug sa iyang anak kay manglaba siya. Maayo ang panahon kay init kaayo ug kadali rang mauga ang mga hinayhay apan dakong kahikurat ang mitagbo sa iyang mga mata! Ang iyang uniporme sa iyang trabahoan gikitkit sa ilaga. Daghang buslot agi sa kinutkotan. Kahilakon si Sol nga nagsud-ong sa iyang uniporme nga di na maggamit.

“Ngano bang kini mang akong uniporme ang gihilabtan, uy! Lain unta!” yawyaw nga kahilakon sa biyuda.

Sa pagkadungog ni Avel sa iyang amo nga nagyawyaw, iya kining giduol ug iyang gioperan samtang nagkugos sa batang iyang gibantayan. “Magpalit tag bitik sa ilaga, Sol.” “Naay baligya?” “Naa!” “Sige, magpalit ta karon dayon! Unya makamao kang mobitik?” “Sayon ra, butangan lang og paon,” sa ulitawo. Nianang gabii, gitaan ni Avel ang bitik. May usa ka longganisa nga wa mahurot sa ilang panihapon, maoy iyang gipaon. Sayo sa buntag, gisusi ni Avel. Sus! Dakoa sa ilaga, morag iring! sa hunahuna pa ni Avel nga nagsud-ong sa mananap sulod sa bitik.

Sa pagkasayod sa biyuda nga nakakubit og ilaga ang bitik, puwerte gyong lipaya ni Sol. “Nakabalos na gyod ko!”

Nianang pagkagabii, gitaan na usab ni Avel ang bitik apan nianang pagtibaw niya sayo sa buntag, wa kini tandoga sa mananap. Nalimot si Avel nga hugasan diay ang bitik, sabonan ug ibulad sa init aron mosulod pagbalik ang mananap. Kining mananapa maayo kaayong manimhot ug manimaan. Makabaho gani sa baho sa kauban nilang mananap, di na gyod kini mosulod ug magpalayo bisag unsa pay ipaon!

Nanuktok si Avel sa kuwarto ni Sol. Mao kiniy mando sa iyang amo nga mosulod si Avel samtang natulog pa ang bata nga dili matugaw sa iyang paghinanok. Iniggawas ni Sol, si Avel maoy mopuli.

Nag-ukun-ukon si Avel pagsulod sa lawak kay nakita niya nga nagbitbit pa si Sol sa bra niini. Apan gipugos siyag pasulod. Nahanggap sa ulitawo ang kahumot sa biyuda. Nangalisbo ang kahumot sa dughan ni Sol samtang nagtaod kini sa iyang bra. Giganahan si Avel sa iyang nakita. Iya untang gakson si Sol, hagkan ug unsa pay gusto niyang buhaton apan dili siya makahimo.

“Hangtod karon, Vel, wa kay namatikdan ug naamgohan?” Milutaw ang kanindot sa iyang mga mata nga mitutok sa ulitawo. Malukmayon ug madanihon ang biyuda nga mapahiyomon kaniya. Sa walay duhaduha, gihalokan sa biyuda ang ngabil sa ulitawo. Dihadiha, natandog ang pagka lalaki ni Avel ug gigakos usab niya ang biyuda. Ang uhaw nga ngabil ni Sol miukob sa ngabil sa ulitawo.

Sa usa ka suok, adunay ilaga nga hapit na mosulod sa bitik kay nadani sa paon nga longganisa. (KATAPOSAN)

Ambot kon unsang ilagaa ug unsang bitika ang alang sa gugma...

Sayo sa buntag, gisusi ni Avel…

Newspapers in Cebuano

Newspapers from Philippines

© PressReader. All rights reserved.