ADUNAY KALAHIAN ANG KEMIKAL NGA MGA ABONO

Bisaya - - Showbiztsika - Ni ZAC B. SARIAN

ANG kompaniyang Yara nga nagbase sa Norway mao ang kinadak-ang tiggamaan og kemikal nga abono. Sa among pakighinabi, dako diay ang kalahian sa mga abonong kemikal nga gama sa Yara. Ang giingon ni Renelle delos Santos, usa ka ehekutibo sa Yara, mas gusto nilang tawgon ang ilang produkto og premium plant nutrition solutions imbes tawgog fertilizer kun abono.

Ngano? Sanglit dako kuno og kalahian ang ilang produkto sa kasagarang gigamit sa kaigsoonan natong mga mag-uuma. Adunay gamayng elemento kun sambog nga gidugang sa ilang abono. Pananglitan, ang mapalit nga kemikal nga abono sa merkado nagsangkap lang sa nitroheno (N), phosphorus (P), ug potassium (K), maong gianggaan kini sa simpleng NPK.

Ang urea sa Yara gidugangan og gamayng zinc, ug tungod niini, dako kaayo og ikahatag nga kaayohan. Pananglitan, adunay eksperimento nga gihimo sulod sa duha ka tuig sa Central Luzon State University (CLSU) sa Nueva Ecija. Gikomparar nila ang ordinaryong urea ug ang YaraVera Viking Ship Zn nga maoy urea sa Yara. Ang resulta? Moabot sa 22 porsento ang madugang sa ani niadtong giabonohan sa urea nga adunay zinc. Aduna

usay taho sa PhilRice nga kon mahatag ang panginahanglan sa zinc nga gikinahanglan sa humayan nga adunay irigasyon, madugangan ang ani og usa ka tonelada sa matag ektarya.

Gitun-an sa mga batid sa Yara ang kompletong panginahanglan sa lainlaing tanom aron makatibuok sila og balansiyadong pormula nga sibo sa panginahanglan sa matag matang sa tanom. Sama sa saging pananglit. Aduna silay pormulasyon nga gitawag og YaraMila Hydran alang sa saging. Aduna kiniy sambog nga 19% nitroheno, 5% phosphorus, 2% potassium. Gidugangan kini og gamayng sulfur, magnesium, zinc ug boron. Kon kini ang gamiton isip abono sa saging, dali rang managko ang lindog sa tanom ug dagko ug bug-at ang mga bunga.

Lahi usab ang pormulasyon alang sa mga utanon. Gitawag kini nilag YaraMila Winner. Aduna kiniy 15% nitroheno, 9% phosphorus, 20% potassium ug

gidugangan og manganese, magnesium, zinc ug boron. Maayo kining abono alang sa mga utanon. Paspas ang pagdagko sa mga utanon, taas og ani ug himsog ang prodyus.

Ang rekomendado sa humay nga adunay irigasyon mao ang YaraMila Aktibo nga adunay gidugang nga sulfur, magnesium ug boron sa 21% nga nitroheno, 6% phosphorus ug 12% potassium. Maayo usab kini alang sa tanom nga mais.

Aduna pay laing pormulasyon sa Yara sa lainlaing tanom. Ang dakong kalahian sa ordinaryong mga pormulasyon sa kemikal nga abono mao ang porma sa nitroheno. Pananglitan, ang nitroheno sa ordinaryong 14-14-14 o kanang gitawag og complete anaa sa pormang ammonium. Kining maong porma dili sayon masuyop sa tanom. Gikinahanglan pang moagi sa prosesong gitawag og nitrification kon iaplay sa mga tanom.

Matod ni Renelle delos Santos, samtang nagkausab ang porma aron mamahimong nitrate ang ammonium nga nitroheno, posibleng mawala ang katunga sa gibatnan niining nitroheno. Samtang

ang nitroheno sa mga pormulasyon sa Yara anaa sa pormang nitrate. Masuyop dayon kini sa mga gamot sa tanom. Aduna pay usa ka bentaha ang nitroheno nga nitrate. Dili kini makapaaslom sa yuta samtang ang nitroheno nga anaa sa pormang ammonium kusog mopaaslom sa yuta. Ang aslom nga yuta dili maayo sa tanom ug sa kalikopan. Kon naghingapin ang kaaslomon sa yuta, mahimong madunot ang mga gamot ug dili makasupsop og sustansiya sa yuta.

Karon, nasayod na ta nga aduna diay kalahian ang kemikal nga mga abono. —

YaraMila Winner usab ang rekomendadong abono sa mga utanon sama niining siling atsal.

Dagko ang bulig sa saging nga maabonohan og YaraMila Hydran.

Sa panukiduki sa Central Luzon State University, ang paggamit og urea sa Yara nga adunay zinc makapadugang og 22% sa ani matag ektarya.

Ang calcium nitrate gikan sa Yara gigamit sa mangga isip pangpabuwak ug pangpaligon sa pungango.

Dali rang modako ang oil palm kon abonohan og YaraMila Palmae.

Himsog ang mga lugas sa mais kon maabonohan og YaraVita Aktibo.

Newspapers in Cebuano

Newspapers from Philippines

© PressReader. All rights reserved.