Panagtapok sa Sumusubol nga mga Magsusulat sa Dakbayan sa Iligan

Bisaya - - Showbiztsika - Ni GIL NAMBATAC Tubod, Iligan City

HUMAN sa malamposong tigi-workshop niadtong ika-6 sa Oktubre 2018, nagkatigom og balik ang mga fellow isip bag-ong sakop sa Himugso Kolektibo para sa kinaunhang asembliya. Tumong sa maong panagtapok ang paghisgot sa kinatibuk-ang pagpadagan sa grupo ug mahitungod sa umaabot nga mga kalihokan.

Gamayng pagsugid sa Himugso Kolektibo: naporma ang maong grupo ubos sa pagpaningkamot ni Prop. Delfin Mundala sa Departamento ng Filipino at Iba’t ibang Wika (DFIW) sa MSUIligan Institute of Technology (MSU-IIT) tuig 2015. Nagkaila mi ni Sir tungod kang Prop. German Gervacio nga usa ka Palanca awardee ug iladong magsusulat sa Tagalog nga naila sa iyang mga obrang tula ug kwentong pambata, balak, nobela, ug mga sugilanon. Nahimo nako siyang magtutudlo sa Literatura 1 samtang kauban ni Sir Delfin si Sir German sa DFIW ug iya sad kining kanhing magtutudlo sa Katitikan ug Malikhaing Pagsulat.

Adtong tungora sa pagdapit ni Sir Delfin nako para makaalalay kaniya sa pagpatindog sa grupo, gaproblema ko sa kakulang sa aktibidad labot sa pagpanulat sa Iligan. Kon aduna man, labing exclusive kini nga tambongan lang og pipila ka magtutudlo sa MSUIIT ug ilang mga kaila. Bag-o lang ko nakatambong sa 22nd Iligan National Writers Workshop (MSU-IIT, Dakbayan sa Iligan) ug

31st Cornelio Faigao Annual Memorial Writers Workshop (USC, Dakbayan sa Cebu). Maong init kaayo akong dugo nga mapadayon ang klase sa environment nga naa sa usa ka writing workshop: mga tawo nga adunay kritikal nga mga hunahuna ug adunay nag-urosuros nga pagbati alang sa katitikan ug pagsulat. Naghandom sad ko nga adunay samang pundok dinhi sa Iligan nga gahatag og igong pagtagad sa pagpanulat ug pagbasa ilabi na sa Katitikang Binisaya ug uban pa gawas sa pinulongang Tinagalog ug Iningles.

Maong pag-abot sa bulan sa Nobiyembre 2015, giorganisar namo ang usa ka writers forum isip lawak nga mapaila namo ang Himugso sa kadaghanan ilabi na sa mga batan-on nga adunay hilig sa pagsulat pero way igong ideya kon unsaon niya ang iyang mga obra sa cabinet sa ilang balay.

Dako ang among pagpasalamat sa Himugso sa tulo ka magsusulat nga mingsanong sa among imbitasyon isip mga resource speaker sa maong porum: sila si Nyor Marcelo Geocallo, Prop. German Gervacio, ug Ginong Ton Daposala (magbabalak ug magtutudlo sa Dakbayan sa Cagayan de Oro). Wala gyod nila ihikaw sa mga nanambong ang ilang mga kasinatian ug kahanas sa pagpanulat. Wala sad mahimong babag ang among kagamay ug kabag-o isip grupo para dili makatambong sa forum.

Sukad sa maong unang public appearance sa grupo, sunodsunod na ang pagkitaay sa mga membro aron hisgotan ang pipila ka obra nilang Gumer Rafanan, Marcelo Geocallo, Satur Apoyon, Gratian Paul Tidor, ug uban pa. Kanunay sad namong gidasig ang mga kaubang magsusulat sa pag-apil sa mga workshop ug mga tigi. Nakatambong sad mi isip usa ka grupo sa mga nasodnong kombensiyon sa Lubas sa Dagang Bisaya (LUDABI) ug sa Bathalan-ong Halad sa Dagang-Mindanao (BATHALADMindanao).

Human sa pipila ka pagtampohay sa mga hunahuna, gisulayan sa grupo nga magpahigayog tigi. Mao na kadtong nahitabo sa niaging Oktubre 6, 2018 sa Iligan City Museum and Ethnic Center. Napulo ka batan-ong magsusulat sa dakbayan ang mingsanong sa among tawag ug midawat sa hagit sa pagpalambo sa kalihokan nga may kalabotan sa katitikan ug pagpanulat ilabi na sa Binisaya— kini sila mao si Geralie O. Albert, Dawn Prencess Caburog, Kyle Christian C. Concepcion, Peter Y. Dalura, Jr., Danielle M. Detera, Dyana Harrah O. Logroño, Milberth Lomingkit, Keren Joani L. Morales, Renner A. Sasil, Michelle Anne P. Sayre, Sharmaine Bonachita ug si Rosemarie Dizon.

Dako sad ang among pagpasalamat sa mga magsusulat nga mingtuo sa among adbokasiya ug mga plano: nilang Nyor Marcelo Geocallo, Nyor Raul Moldez, Nyor Seth Salcedo, ug ni Gratian Paul Tidor. Among pagpasalamat sad sa lokal nga kagamhanan sa dakbayan ug sa Wild FM Iligan ug SILAHIS, ang mantalaan sa mga magtutungha sa MSU-IIT, nga maoy media partners nga mingabag sa pagpakaylap sa impormasyon sa maong kalihokan.

Ug mao tong pagtungtong sa ika-27 sa Oktubre 2018, nahitabo ang unang asembliya sa Himugso Kolektibo. Gisabotan sa grupo ang nagkalainlaing kalihokan nga nagsentro sa pagpalambo sa craft sa pagpanulat. Sama sa mga writing exercises ug kada bulan nga peer mentoring. Apil na sad diha ang panaghisgot sa nagkalainlaing obra ug sa nagkalainlaing magsusulat sa Kabisay-an ug Mindanao.

Himoon sad nga ang diskusyon dili lang magtuyok sa pagpanulat isip usa ka matang sa arte, behikulo sa pagpadayag sa pagbatig hunahuna. Pagaisipon nga usa ka kulturanhon ug politikal nga hilisgotan ang matag diskurso sa mga obra ug dili lang makulong sa estruktura ug porma nga napatik sa matag panid nga maoy (posible) nga makapabuta kanato sa nagkalainlaing reyalidad nga buot ipakita sa sinulat. Usa kini ka dakong tahas, usa ka ambisyon nga sangko sa langit. Pero walay kumo sa pagsulay.

Gigamit sad nga kahigayonan ang panagtapok aron makahatag og update mahitungod sa delegasyon sa Himugso Kolektibo ngadto sa Local Youth Development Council (LYDC) ubos sa mandato sa Sangguniang Kabataan (SK) nga maoy gitahasan aron pagpanday sa mamahimong blueprint sa pagpadagan sa mga opisyal sa SK sa ilang tagsa-tagsang areas of responsibility. Girepresentahan sa grupo ang sektor sa kultura ug arte sa dakbayan ug gipangulohan ang komitiba sa “Active Citizenry” sa council nga maoy responsable sa pagmugnag mga kalihokan ug lehislatibong mga lakang aron mapalambo ang kulura ug arte, ug partisipasyon sa kabatan-onan sa dakbayan.

Sa pagka karon, na- propose na ngadto sa Sangguniang Panglungsod ang approved nga plano sa LYDC ug kasamtangan nang gipanday ang espesipikong mga timeline para sa matag aktibidad. Andam na kining maimplementar sa tuig 2019.

Maingon nga linghod pa gyod ang grupo sa Himugso Kolektibo. Maski ang grupo anaa nagbarog sa nag-awas-awas nga kulturanhong bahandi sa Iligan ug Lanao del Norte nga puyde maexplore sa matag usa kanamo, anaa pa gihapon ang pagduda kon kaya ba kining masagubang nga tahas para sa bag-o pang natukod nga pundok. Maong among ikalipay ang tabang ug suporta sa mga buot mogahin sa ilang kahanas. Kon masalaag man gani mo sa Iligan, unta makapanampit mo namo. Dako namong kalipay nga mailhan ang nag-unang mga magsusulat sa nasod. Anaa man sad mi sa Facebook: fb.com/himugso.kolektibo.9 o dili ba kaha sa among email: [email protected]

Nanagpakisi ug naghinam-hinam na mi nga makauban mo namo diha sa pagpalambo sa Binisaya nga Katitikan.—

[ Wala nagdto sa tuo] Silang Kyle Concepcion, Renner Sasil (nagtindog), Michelle Sayre, Danielle Detera, Gil Nambatac (tagsulat), ug si Prop. Delfin Mundala; atol sa panagtapok sa Himugso Kolektibo.

Newspapers in Cebuano

Newspapers from Philippines

© PressReader. All rights reserved.