Libreng Kurso Sa Panulat

AGIG dugang pagdasig sa kabatan-onan nga may hilig sa panulat, gidapit namo ang tanan sa pagapil sa Young Blood Writer section ning Bisaya diin ang mosalmot makapahimulos ning mosunod nga mga benepisyo:

1.) Kahigayonan nga mapatikan og sinulat; 2.) Kon kapatikan na, makadawat og bayad sa sinulat; 3.) Awtomatik nga entry alang sa pasidunggang “Labing Masaarong Bagong Magsusulat Sa Bisaya”; 4.) Libreng pagtudlo ( tutorial) ug 5.) Kahigayonan nga mahimong hingpit nga magsusulat ugma damlag.

Ang kinsa mang batan-ong interesadong moapil kinahanglang mopa- enroll o mopahibalo kanamo nga andam siyang mopailawom sa YBW uban ang tampong sinulat.

Hinuon, klarohon namo nga ang entranteng makapahimulos niining libreng pagpanudlo kadto lamang magtatampo nga adunay akses sa internet— e-mail address o kaha facebook account.

Kining maong paagi makapadali sa pagkat-on kon unsaon gyod pagsulat sanglit tudloan man ang si bisan kinsang interesado sa pribadong pamaagi nga di na kinahanglang mabasahan sa kadaghanan dinhi sa magasin. Ang mga kahuyangan sa ilang sinulat, matabangan ug mahilot nga walay bayad. Mahimong mosukot ang si bisan kinsa og usa ka lehitimong pangutana bahin sa panulat og kini tubagon usab dayon. Niining paagiha, mawala na ang naandang kahasol ug ang tanan makasugyot ug makapartisipar sa bisan unsang diskusyon nga may kalabotan sa panulat apil na ang paghisgot sa batadila.

Ipadala ang mga tampo sa e-mail add: bisaya_ manilabulletin@yahoo.com uban ang pag-Tag sa mga pulong Young Blood isip subject sa email.— KAPANGULOHAN