Regla

Bisaya - - Mirror of Fortune -

Talagsaong talimad-on ang panagtakdo sa usa ka dugoong Bulan nga nagtambo sa usa ka gisapot nga bulkan kansang kapungot gikatahong milubong sa usa ka simbahan ug liboan ka pangandoy sa milabayng katuigan. Mingkisaw ang ubang lumulupyo sa atong nasod aron susihon ang makapanlimbawot nga panghitabo, nga segun sa sugilanon, nahitabo na sa minglabayng pipila ka dekada. Naglumba silag pasundayag sa ilang mga kamera ug teleskopyo aron sutaon kon kang kinsang kahimanan ang labing tin-aw nga moabot gayod sa naglamokay nga langit. Apan igo lamang ba sila sa pag-aninaw ug sa pagpanakop og mga letrato? Ug kon nasayod pa lang ang bulkan sa mga panghitabo sa yutang iyang naugbokan diin ang iyang hinaguros ug kainit dili kapukan sa mga agulo ug siyagit sa mga ginikanan kansang mga anak natusokan og tambal nga mas makalilisang kaysa balatian; kon ang Bulan mao pod ang kasamtangang pagmando nga gimansahan sa dugo, wala gayoy mahimo ang bulkan bisan kapila niini putlon ang iyang gul-anan sa pagsinggit ug tupsan ang iyang alingagngagan sa lahar. Dili gayod mahimong kab-oton bisan ang iyang aso; kuptan ug sagpaon ang pulang dagway sa Bulan nga gipanalipdan sa buta nga kabituonan.

KENNETH MICHAEL BABA Dakbayan sa Talisay

(Si Kenneth Michael Baba kasamtangang nagtungha sa University of the Philippines-Cebu ug nagkuha sa kursong BA in Political Science. Membro siya sa TINTA, ang pangkampus nga publikasyon sa maong eskuylahan. Napatikan na siyag mga sugilanon ning Bisaya. Kining maong balak pagaisipong basehan sa pagapiliong “Labing Masaarong Bag-ong Magsusulat sa Bisaya sa Tuig 2019”.)

Newspapers in Cebuano

Newspapers from Philippines

© PressReader. All rights reserved.