Mirror Of Fortune

(ANG INYONG KAPALARAN SA DISYEMBRE 5 – 11, 2018)

Bisaya - - Mirror of Fortune - Ni Madam Gertrudes-Lee

PISCES – (Pebrero 20 – Marso 20) – Niining semanaha mahuman na ang nataligam-an mong buluhaton. Panglimbasogan mo nga madoble ang imong kakugi aron maapil ka sa promosyon. Itingob mo ang imong panahon sa pamilya. Agnihon ka pagpanuroy sa imong gihalaran. Suwerte mong adlaw ang Biyernes ug palaran mong numero ang 4, 3, ug 7.

ARIES – (Marso 21 – Abril 20) – Mahapsay na ang dagan sa imong panginabuhi. Ayaw kalimot sa paggahin sa imong kinitaan alang sa Ginoo. Makadawat ka pag dugang grasya. Dupot nang magtuon ang imong mga anak. Masabtan mo ang mensahe sa pahiyom. Miyerkoles ang suwerte mong adlaw ug 9, 5, 2 ang palaran mong numero.

TAURUS – (Abril 21 – Mayo 21) – Niining semanaha mopakanaog kag hukom nga makapauswag sa imong kahimtang. Dawaton mo na ang tanyag nga trabaho sa layo. Madugangan ang pagsalig mo sa imong kaugalingon. Magmalipayon ka uban sa imong minahal sa kinabuhi. Suwerte mong adlaw ang Domingo ug palaran mong numero ang 6, 1, 8.

GEMINI – (Mayo 22 – Hunyo 21) – Tun-an mog maayo ang transaksiyon nga imong sudlan. Ubanan mog paneguro ang imong pagsalig sa imong isigkaingon. Mag-ampo ka kanunay aron panalanginan ang imong mga paningkamot. Makahibalag kag binuhat nga mounong kanimo. Sabado ang suwerte mong adlaw ug 7, 5, 1 ang palaran mong numero.

CANCER – (Hunyo 22 – Hulyo 22) – Niining semanaha moganansiyag dako ang imong tindahan. Daghan ang makagusto sa imong serbisyo. Ayaw kalimot sa pagsimba kanunay. Daghan pang grasya nga imong maangkon. Ayaw pagtubay sa mga tsismis. Tugob sa kahinam ang pasiplat. Suwerte mong adlaw ang Martes ug palaran mong numero ang 4, 8, 6.

CAPRICORN – (Disyembre 22 – Enero 21) – Niining semanaha mokusog ang order sa imong produkto. Modaghan ang bag-o mong kostumer. Ipadayon mo ang maayong pagtagad sa imong isigkaingon. Ayaw kalimot pagdonar sa simbahan. Di ka makabalibad sa imong minahal. Suwerte mong adlaw ang Martes ug palaran mong numero ang 7, 1, 9.

LEO – (Hulyo 23 – Agosto 23) – Mopakita kag kadasig sa pagtrabaho aron himoon kang ehemplo sa imong mga igsoon. Dupot ka na usab nga magtuon sa imong mga libro. Dako ang purohan nga mamentenar mo ang taas nga grado. Makasinati kag talagsaong kalalim. Biyernes ang suwerte mong adlaw ug 9, 3, 2 ang palaran mong numero.

VIRGO – (Agosto 24 – Septiyembre 23) – Niining semanaha mahawhawan na ang nagaliwaros mong kahiladman. Kinahanglan nga makabaton kag kalinaw sa kaisipan. Sangpit sa Ginoo kay di ka pasagdan. Relaks lang samtang nagtrabaho. Tugbangan ra ang pangindahay mo sa kahidlaw. Suwerte mong adlaw ang Lunes ug palaran mong numero ang 6, 2, ug 4.

LIBRA – (Septiyembre 24 – Oktubre 23) – Mapitol mo na ang badlongon mong igsoon. Paningkamotan mo nga mausab ang iyang batasan aron makahuman sa pag-eskuyla. Dako kag ikatabang nga mousbaw ang kahimtang sa imong pamilya. Magmabulokon ang dagan sa relasyon. Domingo ang suwerte mong adlaw ug 1, 9, 8 ang palaran mong numero.

SAGITTARIUS – (Nobiyembre 23 – Disyembre 21) – Maengganyo ka nga moapil sa grupo sa kababayen-an nga maningkamot nga makaton bahin sa panginabuhian. Kinahanglan nga adunay diskarte aron madugangan ang kinitaan. Madungog na ang imong pag-ampo. Kusog ang imong sex appeal. Lunes ang suwerte mong adlaw ug 2, 3, 5 ang palaran mong numero.

SCORPIO – (Oktubre 24 – Nobiyembre 22) – Niining semanaha madawat na ang gikahinaman mong gipaabot. Mahinayon na ang imong giplanong bakasyon. Nagkinahanglan kang makarelaks aron mobalik ang kadasig sa imong kaugalingon. Makapatandog sa kahinam ang kidhat. Suwerte mong adlaw ang Huybes ug palaran mong numero ang 3, 5, 7.

AQUARIUS – (Enero 22 – Pebrero 19) – Makasugakod ka na nga magtukod og kaugalingon nga negosyo. Adunay mopahulam kanimo nga idugang sa imong puhunan. Ayaw kalugak sa imong pangandoy. Makab-ot mo kini basta kanunay kang mangaliya. Pahinuntan mo ang parayeg. Huybes ang suwerte mong adlaw ug 5, 6, 8 ang palaran mong numero.

Newspapers in Cebuano

Newspapers from Philippines

© PressReader. All rights reserved.