Universal Health Care aprobado sa bicam
GIISIP sa mga senador nga “historic day” ang pagsumiter sa bicameral conference committee sa Universal Health Care Bill nga nagtinguha nga makabenepisyo og 100% coverage nga health care services ang tanang mga Pilipino.
Kon mahimo na kining balaod, ang tanang Pilipino, kabos man o adunahan mahimong libre na sa pagpatambal sa publiko ug pribadong mga ospital nga accredited sa PhilHealth.
Awtomatik na usab ang enrollment sa tanang Pilipino ubos sa National Health Insurance Program sa PhilHealth, bisan pa kon sila direct o indirect contributors.
Hasta ang pagpatsek-ap apil na pod sa maong balaoron ingon man ang dental check-up ug ang maintenance medicine sa mga senior citizen mahimong libre na sab ubos sa Universal Health Care.
Sumala ni Sen. JV Ejercito, chair sa Senate Committee on Health and Demography, posibleng maratipikahan ang balaoron ug mahimong hingpit nga balaod sa dili pa mag-Pasko.
Kon mapirmahan na kini ni Presidente Rodrigo Duterte, ang tanang Pilipino awtomatik nang makabaton og PhilHealth coverage ug dili na magkinahanglan og PhilHealth ID.
Ang pundo alang sa maong balaoron pagakuhaon gikan sa sin tax collection; 50% sa National Government share gikan sa PAGCOR; 40% gikan sa Philippine Charity Sweepstakes Office charity fund, net sa Documentary Stamp Tax payments ug national subsidy sa General Appropriations Act.— TNB