RUBEN SORIQUEZ

Dako ang Pagdayeg Kang Steven Seagal

PARA ni Direk Ruben Soriquez, usa ka espesyal nga panapos sa tuig ang iyang nasinati. Kay dili na ang iyang pagka direktor ang iyang gipakita kondili ang iya ra gyong pagka aktor.

Gani, nakapahigayon man sila og espesyal nga screening sa pelikulang “The Lease” sa 21st edition sa Cine Europa Filmfest nga gipahigayon sa Cinematheque Manila sa FDCP niadtong Nobiyembre 20-25. Ang pelikula nga gibidahan nila ni Garie Concepcion nahatagan usab og higayon nga mag- screening sa Shangrila Cineplex niadtong Disyembre 7-16.

Kasagaran sa mga pelikula sa iladong actor-director nga si Ruben siya mismo ang aktor ug direktor. Pero sa pelikulang “The Lease”, ang Italianong direktor nga si Paolo Bertola ang nagdumala niini.

Gibutyag ni Ruben nga nag- enjoy siya sa iyang papel isip aktor nga wala maghunahuna kon asa ang maayong posisyon sa kamera ug uban pang bahin sa produksiyon sa naasoyng pelikula. Nalingaw siya sa iyang gibuhat labi na kay kini ang unang higayon nga miapil siya sa horror movie.

Samtang gihimo ang pelikula, giangkon ni Direk Ruben nga nakabantay siya sa iyang lahi nga pamatyag sa mga dapit diin sila nag- shooting. Gani, bisan ang iyang leading lady nga si Garie nakabantay usab sa lahi nga awra sa lugar.

“We shot in a haunted house and not only me, other people in the production team, they felt the presence and also the noise,” matod niya. Psycho-horror ang tema sa pelikula nga gibase sa nobela ni Mario Alaman. Gipasalig ni Direk Ruben nga ang ilang pelikula maghatod og nahilahi nga horror experience sa moviegoers. Matod pa sa direktor, bisan og indie film ang “The Lease”, pang- mainstream ang tipo niini. Hadlok ang mga esena ug puno sa suspense ang pelikula. Sa laing bahin, matan-aw usab si Direk Ruben sa umaabot nga pelikulang “The Spider’s Man”, usa ka black comedy bahin sa autism and family ties nga ang ubang mga esena didto pa kuhai sa Italya. Nakauban dinhi ni Direk Ruben sila si Richard Quan, Jeffrey Tam, Lee O’Brian, Rob Sy, Red Ibasco, ug ang iyang misis nga si Lanie Gumarang. Maoy iyang plano nga isumiter ang matapos nga pelikula sa international film festival. Dugang niini, kauban usab si Direk Ruben sa international TV series nga “General Commander” nga gibidahan sa Hollywood star nga si Steven Seagal. Sa maong serye, gidala niya ang papel ni Santino Amato, sinaligan ni Orsina nga usa ka Italian mafia boss nga gidala ni Italian actor Edoardo Costa. Ang maong TV series nagpakita sa kinabuhi ni Jake Alexander (gidala ni Steven Seagal), nga usa ka kanhi ahente sa balaod nga nagtukod og grupo aron pakigbatokan ang nanag-unang mga kriminal sa kalibotan. Matod pa ni Ruben, puno sa nindot nga mga aksiyon ang naasoyng TV series. Gani midayeg man siya sa pagka propesyonal ni Steven Seagal. “Mabait siya sa set, ngunit mahirap na lumapit dahil sa four bodyguards niya na laging sa kanya nakatabi. At ang production, they didn’t allow any picture taking kay Steven. Pero masasabi ko na magaling siya at siyempre, siya ay napakapropesyonal and almost good, the first take, lagi,” pu’ng pa ni Direk Ruben.—