Spring Resort: Bunga sa Gugma ug Paningkamot
TINUOD nga bunga sa gugma ug paningkamot ang Rene Regidor Family Spring Resort (RRFSR). Sa gugma ni Pepang Regidor sa maanindot ug hayahay nga palibot. Ang iyang talagsaong kasibot sa pagtanom og pang-adornong mga tanom nagbunga sa kaanindot sa RRFSR nga nakadawat og mga pasidungog gikan sa Department of Tourism. Ang gamayng lasang sa pine trees sulod sa RRFR, pruyba sa way kutas nga hilig ni Pepang sa pagpananom og kahoy. Gani, pasiaw nga gidagnayan siya sa iyang bana og little Gina Lopez. Tungod sa pangaresgar ni Pepang, namalit ang magtiayon og mga luna sa kabukiran ug mokabat na sa 20 ektaryas niini ang natamnan og palkata ug mahogany.
Si Pepang nagbaton og talagsaong panempla kon unsay makadasig sa mga mata. Busa, suportado ni Rene ang iyang landscaping ug ubang kahimoan sulod sa RRFSR. Dako ang tampo ni Pepang sa pagplano ug pagdisenyo sa pasilidades ug kagamitan sa RRFSR. Kay estrikto sa pagpatuman kon unsay anaa sa iyang hunahuna, dili siya magmakuli sa pagpausab sa mga nasugdan o nahuman na kon kini wala niya maangayi, bisan pa kon makadugang ang mga kausaban sa badyet o gasto sa prohekto. Si Pepang usab ang nangita, namili ug namalit sa nagkadaiyang artifact nga gipahimutang sa museyo sa RRFSR.
Ang RRFSR bunga sa paningkamot kay gipatuloan og singot sa magtiayong Rene ug Pepang Regidor. Sahi sa ubang resort nga dihadiha ang pagkatukod, anam-anam ang paglambo sa RRFSR gikan sa gamayng kaligoanan ni Dr. Almer Alfonso nga napalit sa magtiayon niadtong tuig 2005. Karon usa na kini ka dako ug luho nga kaligoanan ug lulinghayawan.
Nadugangan sa kasikbit nga mga luna nga napalit, sa pagka karon, mikabat na sa 10 ekyaryas ang propedad. Way labot ang luna nga gihimong dalan gikan sa haywey paingon sa RRFSR nga may gitas-on nga 2 ka kilometro. Ang resort nga nahimutang sa Dologon, Maramag, Bukidnon, nag-umbaw sa lapad nga bahin sa Pulungi River diin mikanat ang ubos nga isla nga namugna sa nagkatipon-tipon nga banlik tungod sa dam sa Pulangi River Hydroelectric Plant.
Sa pagka karon, ang kaligoanan
sa RRFSR naglangkob sa 4 ka dagkong swimming pool, 5 ka gagmayng swimming pool ug ang bag-ong gibuksang “Pirates Lake”. Adunay daghang balay-sak-anan kun cottages para sa mamahulay ug matulog sa resort, function hall nga magamit sa mga katigoman ug espesyal nga okasyon, parkingan ug restawran. Alang niadtong mga dumuduong nga dili na mapahiluna kay walay reserbasyon, bag-ohay lang nga gibuksan ang usa ka balay-abtanan sa entrada sa resort didto sa daplin sa Sayri Highway.
Ang RRFSR nahimong dinugokan sa mga tawo, pamilya ug barkada nga gustong mangaligo, mangaon ug magtapok-tapok. Mokabat sa 1,500 ka tawo ang mga bisitang mangabot sa lulinghayawan sa adlawng Sabado ug Domingo. Modagsang ang mga parokyano sa panahon sa Pasko ug bakasyon sa eskuyla. Kadaghanan sa mga parokyano nagagikan sa Valencia City ug mga lungsod sa Maramag ug Quezon. Mangabot usab ang gikan sa Malaybalay City ug ubang lungsod sa Bukidnon ug langyawng mga turista.