Mga kurakot sa Customs panaktakon — Gordon

GIPAHUNONG na ni Senate Blue Ribbon Committee Chairman Sen. Richard Gordon ang imbestigasyon sa ikaduhang insidente sa ‘ smuggling’ sa ilegal nga droga ug miingon siya nga angay na gayong limpiyohon sa hingpit ang Bureau of Customs (BOC), lakip na ang BOC X-Ray Inspection Project (XIP).

Midugang si Gordon nga makaayo alang sa Adwana nga sundon sa bag-ong Customs Commissioner nga si Rey Leonardo Guerrero ang iyang (Gordon) sugyot kaniadto kang kanhi BOC Commissioner Isidro Lapeña nga taktakon o paphaon ang tanang mga “inutil” sa naasoyng ahensiya, lakip na ang mga sakop ug opisyal sa XIP.

“Dapat tanggalin ang mga ‘andun (XIP); si Comm. (Rey Leonardo) Guerrero na ang bahala ‘dun,” matod ni Gordon.

Kahinumdoman nga gihulipan ni Guerrero si Lapeña sa puwesto gumikan sa mga hitabo nga may nakalusot nga mga droga, sukwahi sa report sa MICP-XIP nga “walay sulod” ang upat ka magnetic scrap lifters.

Gituohan nga ang nahisgotang mga ‘ magnetic scrap lifter’ nga nakaplagan sa sulod sa usa ka abandonadong bodega sa GMA, Cavite kaniadtong Agosto maoy gihiposan o didto gitagoan ang kapin sa usa ka toneladang shabu nga gipayuhot dinhi sa Pilipinas sa usa ka dakong sindikato sa ilegal nga droga niadtong buwan sa Hulyo, 2018.

Miingon pa gyod si Gordon nga kasong ‘drug smuggling’ ang ipahamtang ngadto kanila ni ex-Police Colonel Eduardo ‘Jojo’ Acierto, ex-PDEA Deputy Director General Ismael Fajardo ug BOC Intel Agent Jimmy Guban. Ug kaso nga pagpabaya o pagpasagad ( gross negligence) ang angayng isilot sa uban pang nalambigit nga mga opisyal ug kawani sa gobyerno.— TNB