MGA UTANON NGA DAGKOG BUNGA, PUYDE RANG ITANOM SA KONTINER
KASAGARANG makita nato dinhi sa atong nasod sa mga utanon nga gipangtanom sa kontiner mao lang tong mga barayti nga dili mobagon sama sa petsay, repolyo, kamatis, talong, ug uban pa. Wala ta magdahom nga lakip diay ang mga utanon nga bagonon ug dagko ang bunga mahimong itanom sa mga kontiner.
Dili pa lang dugay, sa dihang mingbisita mi sa Known-You Seed Research sa Pingtung, Taiwan, nakita namo ang mga kundol ug uban pang tanom nga bagonon nga namunga og dagko nga gipangtanom lang sa kontiner nga igo-igo lang ang gidak-on.
Makapahimuot tanawon, pananglitan, ang kundol nga motimbang og mga upaton ka kilo nga gitanom lang sa plastik nga kontiner nga kapin lang sa
usa ka piye ang bukad. Siyempre, giabagan og higot ang bunga aron dili matagak. Ang kundol paborito sa mga taga Taiwan sanglit mahimong matagoan og dugay-dugayng panahon.
Bisan kalbasa, dagko man kun gagmay ang bunga, mahimo gihapon nga itanom sa kontiner nga mamunga dili lang usa kondili daghan usab. Ug bisan ang pakwan o melon, mahimo gihapong itanom sa kontiner ug mamunga gihapog daghan.
Daghang barayti sab sa pipino nga mahimong itanom sa kontiner. Makapahimuot kaayo kay daghan kinig bunga. Maayong sundogon niadtong namuyo sa mga siyudad nga limitado ang espasyo nga katamnan.
Mahimo kining himoon niadtong mga umahan nga pangturista. Piho nga daghan ang makaayon ug gustong motan-aw sa mga mamungahay nga utanon nga gitanom lang sa kontiner. Sa laing bahin, ang mga tanom nga gitanom na sa kontiner mahimong ibaligya ug mamahimong kahinguhaan pinaagi sa pagbaligya niini. Sanglit nahilahi, mahimong bungatan og taas-taas nga presyo ilabi na kon daghan na daan og bunga.
Mahimo usab kining sundogon sa mga tulunghaan alang sa mga tinun-an aron sila makakat-on sa paghigugma sa pagpananom ug ingon man pagkaon og utanon alang sa kahimsog.
Siyempre, mamunga lang sab kining tanom kon husto ang atong pag-atiman. Angay nga ang mga tanom adunay potting media nga abunda sa organikong sambog. Ang potting media mahimong sinagol nga compost, diyotayng garden soil, inuling nga tahop ug prinosesong organikong abono. Angay sab nga ang mga tanom makadawat og saktong kahayag sa Adlaw ug saktong paagi sa pagbisbis.
Angay sab mapanalipdan ang mga tanom batok sa dangan ug sakit. Lain pang mahinungdanon mao nga mogamit gyod og rekomendadong barayti aron makaani og daghang bunga.
Suwayi ninyo nga mananom og utanon nga bagonon kay mamunga gihapon kini sa kontiner. Piho nga mahimuot mo ilabi na kon mapabunga ninyog maayo ang mga tanom.—