RR Family Spring Resort:
Bunga sa Gugma ug Paningkamot
A(Ika-2 sa Duha ka Gula) NG magtiayon nga tag-iya sa Rene Regidor Family Spring Resort (RRFSR) dili estranyo sa kapobrehon. Nagkahigugmaay ang duha dihang nagtungha pa sila sa San Isidro College sa Malaybalay City diin ang duha nakatapos sa kursong Bachelor of Science in Commerce.
Naminyo sila niadtong tuig 1983 ug nakabaton og tulo ka anak nga sila si Christopher, Brian ug Airene. Gikan sa kabos nga mga pamilya, ming-asenso ang ilang pagkabutang tungod sa maayong pagsinabtanay ug teamwork, sa makiangayong pagdumala sa ilang mga sinuholan o trabahante ug sa maayong relasyon sa ilang mga kasosyo sa negosyo.
Nagsugod sila sa negosyong pag-angkat ug pagbaligya og isda. Milambo kini ug nahimo silang labing dakong fish dealer sa Bukidnon. Kay nakapanukad nag husto, sayon na sa magtiayon ang pagsulod og laing mga negosyo. Sa kasamtangan, ang ilang negosyo sa fish dealing, resort, lending ug commercial building nakahatag og trabaho ug kabuhian sa kapin sa 200 ka tawo. Gawas pa sa mga kasosyo sa pamaligyag isda ug sa nagtrabaho sa ilang umahan ug kakahoyan.
Sa akong paghunahuna sa ilang rag-to-riches nga kaagi, mahinumdom ko niadtong dugay nang panahon nga ang prayer meeting sa among home cell didto himoa sa ilang gamayng pinuyanan sulod sa abattoir kun ihawan sa lungsod pa ang Valencia. Baho ug daghang langaw sa ilang dapit. Pangomprag isda ang ilang negosyo ug didto sa ihawan ang bagsakan sa isda gikan sa Zamboanga City ug General Santos City. Karon, gawas sa ilang gibalhinan nga balay sa Valencia City, nakapalit silag dagkong balay didto sa Davao City ug Cagayan de Oro City. Ug tagsatagsang nakatukod og maluhong pinuy-anan ang ilang tulo ka anak.
Giila sa magtiayong Rene ug Pepang Regidor nga panalangin ug gasa sa Dios ang paglambo sa ilang mga negosyo ug
pagkabutang. Hugot ang ilang pagtuo ug pagsalig sa Ginoo ug ilang gipuy-an ang ilang pagka Kristiyano diha sa ilang pagkinabuhi. Pobre nga nahimong bahandianon, kon sa panultihon pa, padayong nagdapat sa yuta ang ilang mga tiil. Wala mausab ang ilang taras ug batasan. Nagpabiling yano ang ilang pagka tawo.
Talagsaon ang pagka manggihatagon sa magtiayong Rene ug Pepang Regidor. Grasya sila sa among layko nga kapunongan, ang Banay sa Dios. Tungod sa ilang kaayo, libre ang paggamit sa RRFSR ug Regidor Country Homes (RCH) sa mga kalihokan ug katigoman sa Banay sa Dios. Gitanyag sa magtiayon ang
pasilidades sa RCH (nga nahimutang sa Valencia City) sa among binulang asembliya ug gahimoong ECLS kun Empowered Christian Life Seminar. Sa dugay nang katuigan, gratis ang paggamit sa function hall ug mini-forest sa RRFSR ug RCH sa Lenten retreat, Christmas party ug anniversary celebration sa among layko nga kapunongan. Gigamit sad nga libreng kasakyan ang ilang mini tourist bus sa mga kalihokan sa BSD Choir ug sa mga katilingbanong pag-ampo alang sa patay sa may gilay-on nga mga dapit.
Matod pa ni Fr. Arnold Rangue sa iyang homily sa misa sa pagpasalamat sulod sa mini forest sa RRFSR atol sa pagbukas sa “Pirates Lake” niadtong Oktubre 18, 2018, dili lang panapi ang nagdasig ni Rene ug Pepang sa pagpadako ug pagpaanindot sa RRFSR kondili ang paghatag og kaharuhay ug kahimuot sa mga mosulod sa resort. Matod niya, dakong gasa sa katawhan sa Bukidnon ang katukoran sa RRFSR kay kini nindot ug haom nga dapit alang sa paglulinghayaw, pagpahuway ug pagpamalandong.
Ang mga pasilidad sa RRFSR makahatag og kahumpay sa gibati niadtong gihasi sa problema sa inflation, kamahal sa gasolina ug pagkaon, ingon man niadtong naglisod pagbayad sa ilang utang o sa pagpaningil sa giutang kanila. Ang kabugnaw ug kahilom sulod sa gamayng lasang, takdo alang sa lawom nga pagpamalandong ug pagkalawat sa kinaiyahan ug sa Magbubuhat sa tanang butang.—