Mga Hangyo

Bisaya - - Pangunahing Pahina - ALTON MELVAR M DAPANAS Dakbayan sa Cagayan de Oro

(alang kang M) Dugay ka nang gatuyok-tuyok sa hunahuna Pahulay sa akong kalimutaw, pasagdi sa. Dugay ka nang gipangita sa tibuok siyudad Imong nawong nakita ko na gyod sa akong damgo.

-- “Damgo,” Alunsina Dili ko buot ihunghong kon giunsa paglamoy sa kadulom ang akong handurawan. Karon, adunay mga butang nga mas importante pa kaysa niana. Sa imong pagpauli unya, akong isugyot nimo nga tan-awon ang makasilawng mga suga sa karsada, ang masapnot nga panit sa dalan human ang matag talithi, ang talan-awon sa mga gambalay niining dakbayang wa mahinanok. Bitaw, kini mga suhestiyon lamang. Kini sila way kahulogan kanako. Gikapoy na ko nila. Apan ako mamugos nimo nga lantawon sa makausa pa ang katahom niining mga talan-awon. Adtong miaging gabii, adtong misulti kas pagbati nimo alang niya, imong mga mata kanako nagtutok. Sultihan ko ikaw: niining dakbayan, ang masulub-ong mga pulong hagbay rang gipalayo ngadtos bugos nga kalimot. Diri, ang mga tawo nakakat-on nas pagdawat sa ganansiya sa unsa kahay moabot. Tan-awa kon giunsa pagpakabuhi sa mga makalilimos, kon giunsa pagbaktas sa yanong mga tawo ang mga salidsid, kon giunsa paghulat sa mga manakayay ug mamalitay ang tag-as nga mga linya. Tan-awa kining akong mga anka. Wa na ko masayod kon unsaon ang mga butang nga naa nas ngibingibi sa pagkabungkag. Apan nakakat-on na kog sukol sa mga disbentaha sa mga wa ikasulti ug wa ikaingon. Busa akong itanyag pod nimo: tan-awa kon giunsa pagbitay sa Bulan niining suok nato sa kagabhion, kon giunsa pagnanaw sa mga raya sa kabuntagong Adlaw sa imong dagway. Ayaw na bale-baleha ang undo nga puno sa kabalaka, ang undo nga nagtago pas mga aparador, ang undo nga moikyas panalagsa human ang panihapon aron makigkita og laing undo. Adunay saad niining mga butang. Ihatag ko na ikaw ngadto sa lunsay nga mga kasegurohan. Tugoti gihapon nga ako karon moinsistir nga imong suroyon sa makausa pa kining dakbayang nagsapupo sa imong nalimtang kaugalingon: ikaw lumulupyo niining siyudad, ang siyudad mamahimong ikaw, ikaw mamahimong kaugalingon nimong siyudad. Angay kang masayod nga sukad karon, ang tanan kong saysay mahitungod na kanimo, ang matag memorya ko mahitungod na kanimo. Nasayod kong dili kini lalim. Apan mao ra ni akong kataposang hangyo — paminaw.

Newspapers in Cebuano

Newspapers from Philippines

© PressReader. All rights reserved.