Polka Dots

Bisaya - - News -

13. Misugmat ang nagkutoy mong tiyan ug gitugaw ang lawom mong paghinanok 12. – ang takna. 11. Miyahat ka sa pultahan. Init ang inalisngaw sa huyuhoy. Alingisig ang palibot. 10. Naghangos ang imong nanay nga nagdagan paingon sa imong gibarogan. 9. Doy, alsaha ang tanan nga imong madaog, segun sa imong nanay. 8. Sa tumang pagdinali, nahapla siya sa imong atubangan ug nawalis ang polka dots niyang bisteda. 7. Nahibos ang plastik nga iyang gisudlan sa trese ka nagkadaiyang lingin nga prutas. 6. Nagdinaganay ang inyong mga silingan. 5. Wala nimo hisabti ang esena: dunay naghinaguros daw mga kabayo gikan sa luyo, alingisig ang videoke sa unahan, dunay nanagtapok nga nanagtabi. 4. Gihangop sa dakong daob ang balayng kasikbit sa inyong luyong bungbong. Ang itom nga aso daw hunsoy sa agta. 3. Nagsapaw ang mga agulo, singgit, bakho, pangaliyupo ug pag-ampo. 2. Ikaw mahilomong mihangad sa langit ug mibalik og duko. 1. Ang imong nanay maoy bugtong mong nabitbit. Dunay fireworks display sa kalangitan. Sa nalipong mong kalimutaw, nahimong polka dots ang tanan. 0. KENNETH MICHAEL M. BABA Dakbayan sa Talisay (Si KMMB kasamtangang nagtungha sa University of the Philippines-Cebu sa kursong BA in Political Science. Membro sab siya sa Hablon ug TINTA, ang katitikanong organisasyon sa UP-Cebu. Nahilakip siya sa 2018 Cebu Young Writers’ Studio, 2nd Bathalad-Kagis Creative Writers’ Workshop, ug Tagik-Landasan Writing Workshop. Ubayubay na siyag mga artikulo, balak ug sugilanon nga napatik sa Bisaya Magasin. Kining maong balak isiping basehan sa pagapiliong “Labing Masaarong Bag-ong Magsusulat sa Bisaya sa Tuig 2019”.)

Newspapers in Cebuano

Newspapers from Philippines

© PressReader. All rights reserved.