Si Nobelista Rudy L. Pescante: Atua Na
SA akong pagtuo, maoy gusto ni Rudy L. Pescante nga ang pulong “nobelista” mahadugtong sa iyang ngalan kay mao kini ang kanunay niyang hisgotan kaniadto sa magkaestoryahay pa kami sa panahon sa among tigom. Gani, sa kataposan niyang text nako kay didto na man siya sa Manila miestar uban sa iyang pamilya, nangutana siya kon nagsulat ba akog nobela kay siya sige man. Mao kadtoy panahon sa padayon nga paggula, kon wa ko masayop, sa iyang ikaupat nga nobela ning magasing Bisaya. Kahinumdoman nga ang una niyang nobela nag-ulohan og “AngMisyon” nga napatik sa Bisaya sa tuig 2014 pa. Unya, nasundan kini sa tuig 2017 hangtod sa 2018.
Ang kamatayon ni Nobelista Pescante gipahibalo kanako pinaagi sa Kanaas, ang opisyal nga mantalaan sa Dakbayan sa Bogo nga diin si Rudy usa sa mga columnist. Wa gayod ako magdahom nga siya motaliwan na kay wa man siya magbitik-bitik sa iyang mga text message nga aduna siyay sakit. Gani, aduna man siyay hulagway sa Bisaya nga nag- hike sa usa sa mga plasa sa Manila. Wa usab siya moteks nga naadmit sa ospital, silabon, human sa kamatayon ni Jun Siasar mga duha na ka tuig ang nakalabay, kami na lang ang kanunay magteksanay.
Una nakong nakaila si Nobelista Pescante sa diha pa siya sa public schools. Ug kay parehas man kamig hilig nga mao ang panulat, nagkasuod kami, ilabi na nga sa diha nga dunay provincial meet nga gihimo sa Bogo diin siya maoy gitahasan ni Mr. Antonio Pepito, ang Schools Division Superintendent nga taga Bogo, sa pagdumala sa usa ka newspaper nga maoy mo- cover sa maong meet. Iya ming gikuha si Jun Saisar isip iyang mga assistant. Kadto maoy nagbug-os sa among panagsuod hangtod nga nagkasabot kaming tulo nga mohimo og mga seminar alang sa panulat. Diha kadtoy tunghaan sa Borbon, Cebu diin si Jun Siasar na- assigned nga maoy among unang gihimoan sa seminar. Sanglit wala pa kamiy sakyanan, minglumon ming duha sa motorsiklo ni Jun. Kapoy tuod apan malipayon mi nga namauli. Sukad niadto, magkita-kita na mi pirme sa Bogo.
Si Rudy daghan og trabaho nga naagian. Gawas sa iyang pagka magtutudlo diin nahimo siyang prinsipal sa usa sa mga tunghaan sa Bogo, nahimo usab siyang kawani sa Office of the Mayor sa panahon ni Mayor Reynaldo Dy diin siya ang tigsulat sa importanteng mga papeles sa maong opisina hangtod nahimo siyang administrator. Ug sanglit daan nga maayong mosulat, gikuha siya ni Mayor Celestino Martinez Jr. isip Municipal Secretary. Sa dayon niyang pagretiro, nahimo siyang Local Civil Registrar hangtod sa pagkahimo nang dakbayan sa kanhi lungsod sa Bogo. Si Rudy daghan og nasulat nga artikulo nga napatik sa Bisaya bahin sa pagkahimong Dakbayan sa Bogo.
Sa among mga tigom diin upat mi ang kanunay motambong: si Rudy, Jun Siasar, Gremer Reyes ug ako, si Rudy moy kanunay nga magdala sa estorya sanglit siya maoy daghan og ikaestorya. Ug kay maayo motabi, ganahan usab kaming maminaw. Gani, kadtong iyang ulahing mga nobela, tinuod man kadtong kaagi sa iyang kinabuhi nga iyang giestorya diha sa among tigom.
Sa dihang unang mitaliwan si Jun Siasar ug si Gremer wala na sab mopatim-aw sa walay pagpahibalo, kami na lang si Rudy ang magteksanay hangtod nga nahibaloan na lang nako nga didto na siya sa kaulohan. Nakaadto pa gani siya sa Boracay kuyog sa iyang pamilya, ug diha pa kadtoy sa gawas sa nasod nga dili ko lang maseguro kon diin kadto. Maong nakaingon ko nga hayahay na gayod ang iyang pagkabutang.
Si Nobelista Pescante mitaliwan kaniadtong Disyembre 8, 2018 didto sa Manila apan ang iyang haya gidala sa Dakbayan sa Bogo kaniadtong Disyembre 13, 2018 ug gihatod kini sa iyang kataposang pahulayan didto sa Bogo Memorial Park kaniadtong Disyembre 16, 2018 sa edad nga 74 anyos.
Ang iyang nagbangotan nga pamilya mao sila si Mrs. Angelina Dulaca Pescante , usa ka retired public school teacher, ug mga anak nga sila si Ann Dyna nga usa ka CPA-Lawyer, Jose Ryan nga usa ka Mechanical Engineer ug si Rudina Ann nga usa ka Chemist. —