PROJECT SANDUGO sa Dakbayan sa Ormoc
DIHANG nagsunoray pag- viral sa social media partikular sa Facebook ang duha ka makalingawng music videos sa kantang “Nice Ang Imong Hair” ug “Walop Sa Kagahapon”, daghang kilay ang ming-iknat. Nakuryoso ang kadaghanan kon kinsa ug taga diin kining bandang Project Sandugo nga maoy orihinal nga nagmugna sa duha ka instant hit songs. Laliman kag duha pa lang ka adlaw sukad gi- upload pero mihakop dayon kinig dul-an sa 44 mil ka views ug sobra sa liboan ka shares diha sa Facebook. Hinuon, sa wala pa mag- viral ang maong mga music videos, daan nang naglanog-lanog sa mga FM Stations sa Dakbayan sa Sugbo ug Ormoc ang maong duha ka komposisyon.
Aw, unsay dugayan? Di lang nato pasiplatan, kondili, ato gyong tutokan. Kay kon sa pagka karon daghan nang matawag natog iconic bands sa Bisrock nga sarang ikapasigarbo sa Sugbo, Bohol, Negros, Davao, Cagayan de Oro ug uban pang silingang mga dakbayan ug lalawigan sa Kabisay-an ug Mindanao nga may mga talentadong musikero nga nagtuboy pagpalambo sa musikang Bisaya, hah, FYI, ang Dakbayan sa Ormoc, Bay, aduna say ikapanghambog nga Project Sandugo. Kinsa ni silang grupoha? Buyno, atong dutdotog subay…
Ang Project Sandugo naporma niadtong tuig 1999 pinaagi sa kolaborasyon sa nagkalainlaing talentadong musikero ug artists nga Ormocanon. Sa sinugdanan, gitukod nila ang grupo para lang nga sila malingaw agig pagpalabay sa oras diha sa pagtokartokar sa hilig nilang tirada sa musika. Apan sa ngadto-ngadto ilang natugkad nga determinado silang maoy moabli sa ganghaan alang sa kalamboan sa kaugalingong lokal nga kisaw sa musika sa Dakbayan sa Ormoc.
Tuod man, ang Project Sandugo usas mga unang banda nga nahimong modelo sa pagpalipang sa Ormoc Original Music. Miabag usab ang grupo pag-agak sa ubang may potensiyal nga mga Ormocanong local artists aron mapalambo ang mga gihuptan niining talento sa musika.
Ang Project Sandugo maoy pinal nga gibunyag sa banda kay, matod pa nila, ang maong ngalan nagtimailhan sa pag-ula sa dugo alang sa hugot nga panag-igsoonay sa mga Ormocanong musikero ug artists. Sa laing pagkasulti, usa kini ka blood compact sa modernong panahon diin ang bugtong tumong mao ang pagkultibar sa arte sa musika sa Dakbayan sa Ormoc gamit ang