PROJECT SANDUGO
inahang dila nga Binisaya diha sa natagik nilang mga kanta.
Pagsugod sa grupo isip artists collaboration, ang Project Sandugo unang gilangkoban nila ni Jake Bibat ( lead vocals), Francis “Aking” Parilla ( vocals), Kenji “Abay” Cartajena ( lead guitars), Earlan Yap ( lead guitars), Christopher De Loyola ( lead guitars), Nino Son ( former guitarist), Alvin Romero ( former guitarist), Junjun Nazario ( former keyboardist), Rommel Silva ( bass), Raul Joseph ( former bass player and vocals), ug Jiff Jorge ( former percussionist).
Paglabay sa panahon, normal man lang lagi nga sa matag grupo o banda, aduna gyoy mobiya alang sa personal nga mga rason, may pipila sa mga membro nga mao nay palabihon ang pag-atiman sa pamilya. Aduna say uban nga mas gigugol na ang oras sa tawag sa trabaho o kon di ba kaha sa negosyo. Ug duna poy mipadayon pagporsegir sa mas giambisyon nga propesyon.
Maong sa kasamtangan, ang Project Sandugo gitibuok na nilang Rex Jumao-as ( lead vocals), Johnie “John” Gazo ( vocals), Anineth “Don/Neth” Donio ( lead guitars), Ronel “Bata” Ollave ( lead guitars), Wenceslao “JR” Arcuino, Jr. ( bass) ug Philip “Lip” Arcuino ( drums).
Si Rex usa sa orihinal nga founding member sa Project Sandugo. Siya ang master songwriter ug komposer sa grupo ug usa siya ka art sign specialist.
Si John usa ka solo artist nga bag-ohay lang miipon sa banda. Si Don kun Neth usa ka electronics technologist nga gradwado sa Eastern Visayas State University kun EVSU. Eksperto siya sa Digital Recording and Music Arrangement. Kanhi membro siya sa Ormoc City LGU Band. Giila siyang usa sa mga banggiitang gitarista sa Dakbayan sa Ormoc.
Si Bata sab usa ka banggiitang musikero ug all-around performer. Duwa-duwaan lang na niya ang bisan unsang genre sa
musika kon gitik lang sa gitara ang hisgotan. Aw, samot na kon makita nimo siyang motokar sa tablado. Ug sama kang Neth, si Bata giila usab nga usa ka iconic guitarist sa Ormoc.
Ang bahista nga si JR usa ka professional licensed architect ug produkto sa EVSU (kanhi Leyte Institute of Technology). Gitarista usab siya sa Archeadz (bandang gitukod nilang mga Arcuino Brothers). Usa siya ka hobbyist sa Audio Mastering and Video Editing. Direktor ug cinematographer usab siya sa grupo. Ug sama nilang Neth ug Bata, si JR giyukboan usab isip usa ka banggiitang bahista ug gitarista sa Ormoc City.
Ang tambolistang si Lip usa ka elektrisyan nga produkto usab sa EVSU. Negosyante ug maoy tag-iya sa Kah Felimon Lechon Manok & Pabo sa Ormoc. Siya usab giyukboan isip iconic drummer sa ilang dakbayan. Maguwang niya ang bahista nga si JR.
Sinugdanan sa Pagkaporma Sa wa pa gyod hingpit nga maestablisadong Project Sandugo, ang grupo mao ang kanhi iladong banda nga A2-41 sa Dakbayan sa Ormoc niadtong uwahing bahin sa dekada ‘90. Orihinal kining gilangkoban nilang Rex Jumao-as (bokalista), Anineth Donio (gitarista), Rommel Silva (bahista) ug Philip Arcuino (tambolista). Bisan adtong panahona wala pa ang init nga eksplosyon sa Bisrock pero una na silang nagtagik og kantang Binisaya nga gitaytolag “Gugmang Giatay”. Ang unod sa maong awit kinutlo nila gikan mismo sa kaagi sa gugma ug kapakyas sa ilang bokalista ug komposer nga si Rex sa mga sayong tuig nila sa kolehiyo.
Ang “Gugmang Giatay” nahimo dayong hit song sulod sa kampus sa EVSU kun Eastern Visayas State University. Sa lobby o sa bisan asang dakong hawan o abling wanang sulod sa tunghaan, ang awit madunggan nga gikanta-kanta atol sa break time ug ubang bakanteng oras. Niadtong mga tuiga wala pay bisan usa ka lokal nga FM Station ang Dakbayan sa Ormoc. Ug ang pagrekord sa orihinal nilang komposisyon aron ipadala sa mga FM Stations sa Sugbo alang nila tabla rag nangandoy sila nga mahikap ang bituon adtong panahona.
Ang bandang A2-41 nakaangkon og dugang pang luna pagpatublaw sa kantang “Gugmang Giatay” nga gihangop dihadiha sa tagsa-tagsa ka kasingkasing sa tigpaminawng masa ilabi na dihang ang grupo mitokar atol sa Provincial Youth Convention of The Youth For Christ didto sa Palompon, Leyte niadtong Mayo 2002. Sa mao nilang pag- perform, si Jake Bibat ang miawit sa komposisyon sanglit natayming nga si Rex didto sa Samar adtong higayona gumikan sa iyang trabaho ug lisod ang kontak sa komunikasyon adtong tungora.
Mas nilangyab pa ang pagkatap sa “Gugmang Giatay” ngadto sa mga tigpaminaw dihang ang live recording sa ilang pagtokar sa A2-41 didto sa Palompon gipatokar sa kahanginan sa ulahing bahin sa tuig 2002 hangtod na 2003 sa labing unang FM Station sa Dakbayan sa Ormoc nga mao ang 107.1 Hot FM. Ang “Gugmang Giatay” nahimo kanunayng most requested song sa maong panahon. Gumikan niini, mas nadeterminado ang grupo nga moirog pa sa unahan aron pagpalambo sa matahom nga kulturang Bisaya pinaagi sa pagtagik og dugang mga Binisayang kanta.
Adtong higayona nagsugod na pagkuyamang ang kainit sa Bisrock phenomenon diin pipila ka hit songs sa Missing Felimon ug Aggressive Audio kanunay nang gipatokar sa mga FM Stations sa Sugbo. (SUMPAYAN PA)