Sanga sa Ludabi Misubolsa San Fernando, Sugbo
ANG usa sa mga haligi sa pinulongang Binisaya, si Magsusulat Marcelo Geocallo, nanapit nga tambongan kining kalihokan pagpalambo sa pinulongang Binisaya. Kay matod pa god niya, daghan kunong Bisaya, kon mamulong binisayop, labi na gyod kuno diha sa tukmang paggamit sa mga iglalanggikit ( affixes) ug panitik ( spelling). Usahon na lang unta kuno. Busa ang iyang pagdapit gisanong. Ug niadtong Nobiyembre 24, 2018 (Sabado), alauna ang takna sa kahaponon, nahitabo ang panagtigom.
Apan sa nagsingabot pa ang gitakdang takna sa panagtigom, mibunok ang kusog nga ulan. Naminghoy kining galamhan. Nakaingon ko sa hilom, dili man kaha mahimpos ang pagabuhatong tigom alang sa kalamboan sa pinulongang Binisaya, ang pinulongan ni Lakan Lapulapu. Ang garbo sa mga Bisaya.
Ang unang bayani sa kapupud-ang Pilipinhon.
Apan sa wala pa mapupos ang maong takna, mituang ang ulan. Mataniag ug mihayag ang kalibotan.
Unya inanayng nangabot ang mga dinapit aron paghangop sa katuyoan. Natigayon gayod ang maong kalihokan, nga diha himoa sa balay-balangay ( barrio hall) ning balangay sa Pitalo, lungsod sa San Fernando, Sugbo. Kini ang napiling dapit nga pundokan sa nagpasiugda, Magsusulat Marcelo Geocallo ug iyang mga kauban, lakip usab sa mga dinapit, aron sa makausa pa, hisgotan o lakbitan pagsaysay ang lintunganay sa pinulongang Binisaya.
Atbang kining dapita (giuwang sa nasyonal haywey) sa kapilya ni Senior San Vicente Ferrer, ang balaang patron sa balangay nga gidugokan sa daghang deboto nga nagagikan sa nagkalainlaing dapit ning kapupud-an.
Ug niining higayona, misubol ang “Sanga sa Ludabi-San Fernando, Sugbo” (San Fernando Chapter) nga giunhan ni Magsusulat Mar Geocallo, ug giabagan ni Ratiradong Heneral Alex Abadinas, nga usa usab ka magsusulat sa pinulongang Binisaya. Apan gikasubo lang nga wa makatambong (tungod ba kaha sa ulan) ang laing dagang-agila sa pinulongang Binisaya sa lungsod sa San Fernando, Sugbo, si Magsusulat Ernesto Lariosa.
Gihimo gilayon ang pagpili sa mamunoan ning “Sanga sa Ludabi-San Fernando, Sugbo”. Ug ang nangapili mao kaning mosunod: Pamuno – Liberato (Libe) Tapere Manlosa; Pali-Pamuno – Edfer (Eddie) Cabrera Rigodon; Kalihim – Rolando (Laning) Rias; Mamahandi – Pangulong-Magtutudlo ( principal) – Aniceto Gador; Tigsusipi – Rebecca D. Obial; Media – Jun Juesan; PRO. – Magtutudlo Alan Monterano. Hunta sa mga Direktor (Board of Directors) – Juanito Geocallo; Magtutudlo Erlinda Villarin; Miguel C. Obial; Eutequio Sebial; Magtutudlo Ma. Anna O. Baldonado; Samuel Monterona; Magtutudlo Merlinda Paner; Emelita O. Obaob; Eleanor O. Ortaliz; ug Matutudlo Ma. Sigrid dela Cerna. Mga Magtatambag (Adviser) – Magsusulat Marcelo Geocallo; Magsusulat Hen. Alex Abadinas; ug Magsusulat Ernesto Lariosa.
Kay sa paggitib ning sanga nga nabansagan og “Sanga sa Ludabi-San Fernando, Sugbo” (San Fernando Chapter) gibisibisan man sa tubig sa kahitas-an, nakaingon na sab ako, “Hinaot pa nga molipang kini, aron sa makausa pa, kusganon kining mosapwang pagmantala alang sa kalamboan sa pinulongang Binisaya nga maoy mga daman ug damgo sa haliging mga Bisayista sa Sugbo.
Ug ang dawat-paapil ( induction) sa nangapiling mamunoan ning “Sanga sa Ludabi-San Fernando, Sugbo” (San Fernando Chapter), mahitabo unya sa unang Domingo sa Enero 2019 kun ikaunom nga adlaw sa maong bulan ug tuig.
Tingali mosanay pa unya ang mga sakop niini, kay may gidapit ko nga taga sa San Fernando, ug may ming-ingon usab nga motungtong sila ning maong sanga, aron may masayran pa silang mga Binisaya nga wa pa nila mahibaw-i.—