Tangkal

Bisaya - - News -

Mikatawa ko og kusog pagkakita ko sa hungog kinsa ingon sa wala kamatikod nga sa usa ka tangkal siya nabalhog. Diyos-diyos niya nga gilabanan makagagahom matod pa nga dili hitupngan kansang matag pamahayag nga giyamyam naghambin sa tulugkaron nga kahulogan. Busa matag pulong niining ibungat ug matag lakang niini nga gibuhat sa dakong pagdayeg kanunay gidawat ug sa sipang pagakpak mainitong gisugat. Nakapangyam-id ko nga naminaw nakapanlingo ug nakapanaguto nga nagtan-aw daw dili katuo nga naa diay mga tawo nga ingon gyod niana kahanggaw. Dala sa kalagot ug kaluoy nga nagsagol kaniya ako inanay nga nagpaduol, buot ko nga iyang tangkal tay-ogon buot ko nga ang iyang ulo duklon aron siya mahigmata makamatngon. Apan pakyas ang akong intensiyon tungod sa kakuliang wala ko gidahom: kalit akong nadusmo napandol napakong sa tangkal ko nga kaugalingon nga mao pa ko makahimulalong. Ug gikataw-an ko sa kuwanggol. ERIC S.B. LIBRE Dakbayan sa Digos

Newspapers in Cebuano

Newspapers from Philippines

© PressReader. All rights reserved.