Malipayon Sa Iyang Red Lady Nga Kapayas

NIADTONG Enero 11, nanuroy mi sa umahan ni Ryan Soler sa Brgy. Tandang Kutyo sa Tanay, Rizal. Si Ryan usa ka negosyante ug radio program producer nga dili pa kaayo dugay sa pagpanguma. Napalit niya ang iyang 13 ektaryang luna nga usa ka banwa ug bungatod kaniadtong 2017 ug iya dayon kining giasikaso. Siya mismo ang naggama og karsada sa barangay paingon sa iyang napalit nga luna nga mikabat pod og pipila ka

kilometro gikan sa usa ka dalang probinsiyal.

Labihan niyang lipaya dihang giubanan namo siyang namupo ug nagtilaw sa iyang hinog nga kapayas nga Red Lady. Labihang tam-isa ug puyde kaayo niyang ikapasigarbo sa iyang mga higala ug mga kabanay. Giatiman kini nga wala gamiti og kemikal nga pamatay-dangan ug abono kay lubos ra gyod organikong pamaagi.

Kapin pa lang sa kapatan si Ryan nga usa na ka malamposong magpapatigayon. Aduna siyay gisuplay nga produkto sa usa ka dakong food chain sa Manila. Maong nakahunahuna siyang mopalit og umahan kay buot niyang adunay kalingawan ug makalikay sa matag karon ug unya nga polusyon ug kahuot sa dagan sa trapiko sa dakbayan.

Ang kinadak-an niyang talamnan mao ang duha ka ektaryang dragon fruit nga kapin na sa usa ka tuig. Moabot sa upat ka libo ka punoan ang iyang tanom ug nag-andam pa gani siyag dugang katamnan. Apan ang iyang damgo mao nga makabaton siya sa tanan

nga maayong mga barayti sa bungahoy ug lainlaing matang sa utanon. Sa pagka karon, aduna na siyay tanom nga pipila ka punoan sa rambutan, buongon, mugbo nga lubi, Prante orange, dayap, American lemon, ug uban pa. Lain pang buot niyang itanom sa dinaghan mao ang siling tingala kun kining bag-ong barayti sa kulikot nga mabaligya sa merkado sa mahal nga presyo.

Gusto usab niya ang himunga nga barayti sa talong, kamatis, okra, paliya, siling pangtinuwa, pipino, kalbasa ug daghan pa. Aron pagpiho nga maayo ang pagkaatiman sa mga tanom, nagpabuhat siya og usa ka dakong submersible pump nga may gilawmon nga duha ka gatos ka metro. Dako ning maong investment apan gikinahanglan kaayo sa umahan ang tubig aron magmalamposon.

Gawas sa pagpananom, sugdan na usab ni Ryan sa labing madaling panahon ang pagpamuhi og free-range nga mga manok aron siya ug ang iyang mga bisita magkasalo sa linatang manok o kaha adobong manok samtang anaa sila sa umahan.

Naglabi pa karon ang pagbuhi og puhunan ni Ryan.

Niadtong mingbisita mi kuyog ang kabanay ug kahigalaan, gisugdan na pagtukod ang usa ka pavilion nga mahimong pahigayonan sa lainlaing okasyon sa umahan. Sila si Leo Oril ug Herbert Lelina, usa ka arkitekto, maoy mingtabang sa pagplano sa mga estruktura ug lainlaing buluhaton sa umahan.

Sa among obserbasyon, desidido kaayo si Ryan nga panindoton ang iyang proyekto aron mamahimong modelong organikong umahan. Andam siyang mogasto ug iyang gitunan ang lainlaing aspeto sa agribusiness.—

Mapahiyomon si Ryan Soler uban sa bag-o niyang pinupo nga hinog nga bunga sa Red Lady nga kapayas.

Si Leo Oril nga maoy katabang ni Ryan Soler miposing uban sa dragon fruit nga nag-edad nag usa ka tuig.

Sila si Leo Oril ug Ryan Soler uban sa dagkong mga bunga sa Red Lady nga kapayas.

Si Ryan Soler, Leo Oril, ug Herbert Lelani uban sa hinarbes nilang Red Lady nga kapayas.

Si Ryan Soler nga gitilawan ang tam-is ug dugaon nga bunga sa Red Lady nga kapayas.

Ang pagtilaw sa presko ug higanteng tilapya usa sa labing makapahimuot nga bahin sa pagbisita sa umahan, ingon ni Leo Oril.