Angel Locsin
Gituman ang Pangandoy sa Iyang Amahan
GISUGAT ni Angel Locsin ang Bag-ong Tuig nga hupong sa kalipay. Kini tungod kay hinay-hinay na niyang nahatagan og katumanan ang dugay na nga pangandoy sa iyang amahan, nga nahimo na usab niyang pangandoy sa iyang pagtrabaho sa showbiz.
Sa iyang pagpaningkamot, makaangkon na sila karon og kaugalingong luna alang sa iyang pamilya diin mahimo silang mag- bonding, sa usa ka dapit nga layo sa polusyon ug kagahob sa siyudad. Gawas nga aduna silay kaugalingong lugar nga kapahulayan aron ma- recharge ang lapoy nga lawas, makatabang usab siya sa pagpreserbar sa kanindot sa kinaiyahan.
Dako ang pagpasalamat ni Angel nga nahatagan siyag oportunidad nga makakuhag mga proyekto sa showbiz ug sa gugma sa iyang fans nga nakatabang og dako aron padayon niyang ipataas ang kalidad sa iyang pagka artista.
Sa holiday vacation, giseguro ni Angel Locsin nga makauban niya ang iyang pamilya. Sa iyang IG account, gipakita niya ang mga hulagway sa ilang bakasyon sa Talisayen Cove sa Zambales. Didto nakauban ug nasilbihan niya ang 90-anyos nga amahan. Tungod niini, ang mga sumusunod ni Angel labi pang mingdayeg tungod sa iyang dedikasyon sa pag-atiman sa iyang pamilya. Gani, giandaman pa man niya ang iyang pamilya og usa ka boodle fight.
Gipamatud-an usab sa bida sa “The General’s Daughter” ang iyang paghigugma sa Pilipinhong kapanulundan pinaagi sa pag-andam sa paboritong Filipino street foods sama sa classic ice cream, kwek-kwek, fish ball ug gulaman sa pagsugat sa Bag-ong Tuig.
Sa mga hulagway nga gi- share ni Angel, daghan ang nagreak kon gipalit na ba sa dalaga ang isla o ang dapit ra sa resort. Hinuon, wala kini angkona sa aktres nga iya na kining property, apan wala usab niya i- deny.
Ning Bag-ong Tuig, excited si Angel nga makahatag na usab og kalipay sa iyang fans. Kini tungod kay gisugdan na man sa miaging Enero sa premiere timeslot sa Kapamilya network ang “The General’s Daughter” nga maoy gipuli sa “Ngayon at Kailanman” nila ni Joshua Garcia ug Julia Barretto.
Ang “The General’s Daughter” maoy unang teleserye sa ABS-CBN nga gipagawas sa 2019, diin ang theme song nga “Ikaw Ang Aking Mahal” gikanta ni Regine Velasquez. Kini usab ang ikatulong higayon nga gibidahan ni Angel Locsin ang teleserye nga maoy opening salvo sa Kapamilya network sa pagsugat sa Bag-ong Tuig.
Sa mga nakasunod pagtan-aw aning “The General’s Daughter”, klarong markado na usab ang acting nila ni Albert Martinez, Ryza Cenon, Tirso Cruz III, Arjo Atayde, Paulo Avelino, Maricel Soriano, Eula Valdes, Janice de Belen, JC de Vera, Loisa Andalio, ug Ronnie Alonte.—