Hain ang pagbag-o sa Hugpong ng Pagbabago ni Inday Sara?

DIHANG gitukod ni Mayor Sara Duterte ang Hugpong ng Pagbabago (HNB) sa Davao City kaniadtong Hulyo 2018, daghan ang naglaom nga kining maong grupo makapausab sa atong kultura sa politika diin ang tradisyonal nga hiwi ug korap nga mga politiko ang kanunay modaog ginamit ang kuwarta o panghulga. Gipakaingon nato og ang HNB motugpo o mopaluyo sa mga bag-o ug ideyalistikong mga kandidato nga wala pa madahig sa kahugaw sa atong politika sa umaabot nga eleksiyon lokal ug nasyonal sa Mayo 13.

Apan dako ang atong pagkasayop. Niining umaabot nga piliay dili lamang 12 kondili 16 ang mga kandidato nga suportado sa HNP ug kadaghanan kanila mga tradisyonal nga politiko o trapo, ang tulo nag-atubang og mga kasong grap.

Si Inday Sara, nga nagdumili paglansar sa pagka senador bisan sa daghang mga pagdasig gikan sa mga lider ug botante dili lamang sa Davao kondili sa ubang bahin sa nasod, nakahukom hinuon nga magpasubli sa ikatulo ug kataposang termino isip mayor sa Davao City. Mipahayag siya nga dili usa ka partido sa oposisyon ang HNP sahi sa gipahamtang ni kanhi Espiker Pantaleon Alvarez nga maoy hinungdan sa pagpalagpot kaniya sa puwesto isip lider sa Kamara de Representantes.

Matod pa ni Inday Sara, gimugna niya ang HNP “aron kaboton ang mga mithi nga atong gilantaw, usa ka mauswagong rehiyon, haruhay nga panimuyo sa mga mulupyo, maayong pangagamhanan ug epektibong liderato gikan sa mga membro sa atong partido.”

Dihang gilusad ni Mayor Sara ang HNP nagpanon ang mga politiko sa Manila ngadto sa Davao City aron kabendisyonan sa mayora. Kini naglakip sa bilyonaryong si Cynthia Villar ug J.V. Ejercito, duha ka reeleksiyonistang senador. Giingon nga ang milyones nga donasyon sa mga Villar ngadto kang Duterte mao ang nakapausab sa hunahuna sa naulahi sa paglansar pagka presidente human sa dugayng pag-ukun-ukon.

Si J.V. Ejercito, nga anak ni kanhi Presidente Erap Estrada kang karon Mayor Giuia Gomez sa San Juan City, hilabihan ang pagpasalamat dihang giapil siya ni Mayor Sara sa pipila nga iyang giendorso alang sa pagka senador ubos sa HNP. Apan dako ang iyang kahinug-o dihang giapil usab ni Sara sa tiket sa HNP ang iyang igsoon sa amahan nga si kanhi Senador Jinggoy Estrada. Una na niyang gipahayag nga dili angay nga duha ka magsoon ang molingkod pagdungan sa Senado. Sa pagkakaron, si J.V. nagpahayag nga kandidato siya sa Nationalist People’s Coalition ug dili sa HNP.

Bong Revilla ug Enrile

Dihang naabsuwelto si kanhi Senador Bong Revilla sa kasong plunder sa Sandiganbayan, ug bisan pa og aduna pa siyay ubang kasong grap nga giatubang diin piyansado siya, giapil usab siya ni Gng. Sara sa tiket sa HNP. Gisundan si Revilla ni kanhi Senador Juan Ponce Enrile nga gisagop usab sa HNP. Gumikan niini, ang tulo ka kanhing senador— Enrile, Jinggoy ug Bong Revilla— nga pulos nalambigit sa eskandalo sa pork barrel, nagkauban sa tiket sa pagka senador ubos sa HNP. Gipasal-ot pa gayod ni Revilla ang iyang kapartido sa Lakas Party, si Dr. Willie Ong, sa tiket sa HNP.

Ang uban nga anaa sa tiket HNP mao sila si Taguig Representative Pia Cayetano, Ilocos Norte Governor Imee Marcos, kanhi Presidential Spokesperson Harry Roque, kanhi Presidential Political Adviser Francis Tolentino, kanhi hepe sa Philippine National Police Ronald dela Rosa, kanhi Special Assistant to the President Bong Go, Senator Sonny Angara, Senator Aquilino Pimentel III, Maguindanao 2nd District Representative Zajid Mangudadatu ug si TV Reporter Jiggy Manicad.

Sa line-up sa HNP, sila si Manicad, Dela Rosa ug Bong Go lang ang dili trapo.

Pangandam sa 2022?

Tataw nga ang pagtukod sa HNP usa ka pagpangandam sa eleksiyon presidensiyal sa 2022 diin si Mayor Sara ang gituhoan sa kadaghanan nga mobanos sa puwesto sa iyang amahan.

Sa pagkakaron, tulo ka anak ni Duterte ang modagan sa lainlaing puwesto. Gawas kang Sara nga magpasubli pagka mayor, midagan usab si Paolo, ang kamagulangan, pagka kongresman, ug si Sebastian pagka bise mayor sa Davao City. Ug tungod kay wala may klarong oposisyon sa Davao walay duhaduha nga modaog silang tulo.

Samtang si Duterte gianggaan og “The Punisher” tungod sa walay kukaluoy niyang kampanya batok sa krimen, ilabi na sa ilegal nga droga, si Inday Sara usab gianggaan og “The Puncher” tungod sa iyang pagsuntok sa usa ka piskal nga wala mosunod sa iyang mando nga ipahunong ang demolisyon sa mga eskuwater sa Davao pila na ka tuig ang minglabay.

Si Inday Sara usa ka abogado ug adunay tulo ka anak. Mestisa siya tungod kay ang iyang inahan, si Gng. Elizabeth Zimmerman, kanhi asawa ni Presidente Duterte, kagikan man og mga German. Naminyo siya ngadto kang Manases Carpio, nga usa usab ka abogado ug pag-umangkon ni kanhi Ombudsman Conchita Carpio-Morales.

Matod pa sa nakaila kaniya, si Inday Sara hingamiga, daling duolon, mapahiyomon kanunay ug buotan. Apan isog usab siyaug dili moatras sa away ilabi na batok sa mga kriminal ug sa makalapas sa balaod.

Usa si Senador Panfilo Lacson sa unang magdadayeg ni Mayor Sara. Matod pa ni Lacson, si Sara naghupot sa mga hiyas nga gikinahanglan sa usa ka lider: isog, aktibo, maalam ug progresibo ang panlantaw. “Siya ang nag-una sa akong listahan sa mga batanon natong lider,” dugang pa ni Lacson.

Gumikan sa pagkawatak-watak sa oposisyon ug sa kanunayng taas nga rating sa iyang amahan, ingon sa maglayag si Inday Sara paingon sa Malakanyang sa eleksiyon presidensiyal sa 2022. Apan tulo pa ka tuig ang atong hulaton. Sulod sa tulo ka tuig kon magpadayon ang dalaygong mga programa ni Inday Sara ug sa iyang amahan, usa na usab ka anak sa presidente ang molingkod sa Malakanyang sunod kang Noynoy Aquino ug Gloria Macapagal-Arroyo. —

Samtang si Duterte gianggaan og “The Punisher” tungod sa walay kukaluoy niyang kampanya batok sa krimen, ilabi na sa ilegal nga droga, si Inday Sara usab gianggaan og “The Puncher” tungod sa iyang pagsuntok sa usa ka piskal…