Naghandom sa Kabatan-on
EKSAYTED na ming tanan nga mahiligon sa dulang basketball. Kay tiaw moy sulod sa baynte ka tuig namo ning maong buhatan, karon pa mahitabo nga adunay sportfest nga ipahigayon ang among kompaniya. Mga babaye man god ang mga tagdumala maoy hinungdan nga sa nangaging mga anibersaryo, pulos lang binabaye ug binayot ang mga kalingawan. Sama sa dance contest, Miss Gay, singing contest ug parlor games.
Karon, tungod sa paningkamot sa team work (kahugpongan sa mga empleyado) pinangulohan ni Dundun Tesaluna, namunga ang dugay na namong hangyo. Gigahinag pundo sa management ang paugnat sa kusog.
Atol sa among break, nagsabot ming karaang mga empleyado nga magmugna mig team diin langkoban namong mga edaran. Si Dandy Amulo maoy nanglista sa line-up. Si Nelson Sardia ang center position sanglit aduna man kiniy gitas-on. Si Dandy ang among team captain. Small forward si Marcos Oro. Shooting guard si Roel Ortizano ug ako maoy ball handler. Human masuta namo ang mga player sa ubang team, nakita namo nga adia kanamo ang bentaha tungod sa among kasinatian ning maong paugnat sa kusog.
“Kadtong didto pa ko sa Manila, nakaduwa nako silang Adducol ug Ildefonso,” pasiatab ni Nelson. Daghan pa siyag iladong mga basketbolista nga gipanghisgotan.
“Sa wa pa ko magtrabaho dinhi, kanunay nakong ikaduwa silang Almonte ug Mañigo,” lain na sang sikat nga mga player ang gihisgotan ni Dandy.
“Kana silang Juntilla ug Rañeses import na namo niadtong miduwa ko sa liga sa Consolacion,” paambit usab ni Roel.
Sa akong bahin, wala koy kauban nga nahimong ilado sa natad sa basketbol. Apan kaniadto sa dekada nobenta, ako maoy labing ngilngig nga point guard sa among lungsod sa Santander.
Sa among pag- obserbar sa praktis sa among mga kaparang nga team, nakita namo nga kuwang sila sa teknik. Timailhan nga menos sila og kasinatian. OPENING Day. Kami ang nakabunot sa opening game. Unya kaparang namo ang north store team, ang gikonsiderar nga labing huyang.
“Ipakita nato ang atong pagka beterano,” pahimangno ni Roel, ang among kauban sa team nga mao ra say among playing coach. Human sa jump ball, nailog nako ang bola. Mi- fastbreak ko dayon paingon sa among goal. Apan unsa ba nga giyano ra man og ilog sa kontra. Unya yano pa gyod nga milusot sa atubangan sa hugot nga depensa ni Nelson.
Dihang mi- inbound pass ko, gihatag ko dayon ang bola kang Roel nga mipuwesto sa three point area. Apan wa makaabot sa ring ang iyang itsa. Nakiginilogay sa rebound si Nelson ug Dandy apan mas kusog nga molukso ang mga batan- on nga kontra ug kini ang nakakuha sa bola.
Human sa half time diin, sa wala namo damha, gilubong mig taga liog, napugos mig time out kay halos na modiwalwal ang among dila sa kakutas. Samtang wala pay bisan usa sa among kontra nga mihangak.
Diha sa among bench wala na mohimog set play si Roel. Mingisi na lang siya. Hitakdan mi sa iyang katawa. “Laos na gyod ta,” matod pa niya. “Kon gikabagat pa ni natong mga kontraha kaniadto sa mga batan on pa ta, wa gyod ni silay dag- anan nato,” ni Nelson pa usab.
Human niadtong maong game natugkad namo nga ang dulang basketbol maayo lang gyod diay sa mga batan- on pa. Karon, hunahuna na lang gyoy gadako namo.
(KATAPOSAN)
Lig-on ang hunahuna, apan huyang na ang lawas. Kini ang balaod sa kinaiyahan…